Ama kabiri oku Bakorinto 13:1-14
13 Obula b’obwa kasharhu nayinja emunda muli. “Buli chintu chikwanene chibonekane oku chili ch’okuli eyi chayemezezwe na bantu babiri changwa basharhu.”
2 Chiro akaba oku bunola ntali nenyu, ndi nk’oli haguma nenyu obwa kabiri. Na buli yeshi walikolere echaha burhanzi, n’abandi boshi namaba nabaha omukonge embere w’akasanzi, oku nji nkashuba kuyinja nji ntabashishiriza,
3 bulala muli mwalonza echemezo chiyerekene oku Kristu ali anderheramo, n’obo Kristu arhali muzamba ahakagarhi kenyu s’ahubwe ali ayerekana emisi yage minene.
4 Bulala kweri alimanikirwe oku murhi eju y’obuzamba, aliko alamire kugerera emisi ya Mungu. Kweri, nerhu rhuli bazamba haguma naye, aliko nji rhwalama haguma naye kugerera emisi ya Mungu eli yabakolamo.
5 Mugenderere kuchilola bwinja akaba munali omu bwemere; mugenderere kuchisuzuma yi mumenya muli bantu nyabachi. Murhenji oku Kristu ali omu buguma nenyu si? Changwa nkabaga mube eyi mwalahirwe.
6 Kweri ndangalire oku mwarhegera oku rhwabo rhurhasaga kulahirwa.
7 Rhuli rhwasalira emwa Mungu murhajiraga echintu chibi. Arhali mpu rhulonzeze rhubonekane oku rhwayemererwe, si rhulonzeze mujire ebinja, chiro byahema oku rhwabo rhulahirwe.
8 Bulala nta chintu rhwakajira ch’okulwisa okuli, si rhunajira eby’okushigikira okuli.
9 Kweri, rhunasima amango moshi rhuzambire aliko eyi mwabo mugwerhe emisi. Rhuli rhwahema Mungu oku muchigalukeko.
10 Echola che chirhumire nabayandikira ebila bintu eyi ntali haguma nenyu, omu kuntu hanola nji mba haguma nenyu, nji ntarholaga esimikiro zikomere omu kukolesa obuhashe Waliha ampere b’okuyumbaka s’arhali b’okushanda.
11 Omu kumaliriza, bene-berhu, mugenderere kugwarha obusime, mugenderere kuchigalukako, mugenderere kurhulirizwa, mugenderere kuwaza kuguma, mugenderere kulama omu murhula; na Mungu w’obuzigire n’omurhula aba haguma nenyu.
12 Mweshi mulamusane omu kuhaanana ebize nchesibwa.
13 Abachesibwa boshi babarhumire endamuso zabo.
14 Olukogo rhurhakwanene lwa Waliha Yesu Kristu, obuzigire bwa Mungu n’ebintu byoshi binja mushangirire omu roho lichesibwa bibe haguma nenyu mweshi.
