Ama kabiri oku Bakorinto 11:1-33
11 Nakasimire mundembere oku sire lyani ligeke. Aliko okuderha okuli, muli mwandembera.
2 Bulala ndi nabayunvira obongwa, obongwa burhengere emwa Mungu; bulala nyenyine nalibalaganyize oku mwashabwa na mulume muguma, nabalerha n’embere za Kristu nka babikira.
3 Aliko nyubahire oku mu njira nguma changwa eyindi, nka kulala enjoka yarhebekaga Eva kugerera amayeri mayo, hali okuntu obwenge bwenyu bwakahindamuka bwanaleka obwimana n’olugenzi lwenyu luchere lukwanene Kristu.
4 Nderhere ntyo bulala, nk’omuntu ayinjire akahubiri owindi Yesu olekere eyi rhuli rhwahubiri, muli mwayemera eby’omuntu oli nk’oyola aderhere; changwa nka hali eyindi misi elonzeze kuyerekeza obwenge bwenyu erhali kuguma n’eyaliri yabuyerekeza, muli mwayiyemera buzira chibazo; changwa omuntu akalerha eyindi myazi minja olekere eyi mwayemeraga, muli mwayemera eby’omuntu oli nk’oyola aderhere.
5 Mbwazize oku nta chintu n’echiguma nayerekenemo oku ndi w’eshishi kulusha entumwa zenyu zinachibona nka zilushire abandi.
6 Aliko chiro akaba oku ntenji kuderha bwinja, ntabulire obumenyi bowe; rhwanabiyerekene bwinja mu buli njira n’omu bintu byoshi.
7 Nagwarhire obusime b’okubatangaziza emyazi minja ya Mungu buzira kubalipisa. Bobola si najirire echaha omu kuchicha bufi ntyo yi mwabo muzamulwa?
8 Ebindi bibaga bye byampere ebi nkenere. Nabere nk’owabisahwire y’ingala kubakolera mwabo.
9 Nechi, amango naliri naba omu bulagirire ey’indi haguma nenyu, ntabaga muzigo oku muntu n’omuguma, bulala bene-berhu be Makedoniya balimpere bintu binene nkenere. Nechi, omu njira zoshi nachilangire ntababeraga muzigo, nantyo ku nanagenderera kujira.
10 Kweri amango moshi okuli kwa Kristu kwaba kundimo, ntaleka kuchitapira* echola omu materitware me Akaya.
11 Bulagurhe? Bulala ntabazigiire si? Mungu yenyine ayinji oku mbazigiire.
12 Aliko ebi ndi nakola nagenderera kubikola, omu kuntu abali balonza bayemeze oku bali ntumwa kuguma nerhu barhabonaga echi bafarhirako omu bi bali bachihalira.
13 Bulala abantu bali nk’abola zili ntumwa z’obubeshi, bakozi banarhebekana, banachihindamula omu kuntu bashushe nka bali ntumwa za Kristu.
14 Birhanasomeze, bulala Shetani naye yenyine ali agenderera kuchihindamula omu kuntu ashushe nka malayika w’omwangaza.
15 Che chirhumire birhasomeze okubona abakozi bage nabo bali bagenderera kuchihindamula omu kuntu bashushe nka bakozi banakola ebikwanene. Aliko obuzinda bwabo nji bwaba kuguma n’ebijiro byabo.
16 Namashuba kuderha: Nta muntu owazage oku nasirehere. Aliko akaba mwabwene oku nasirehere, munyemere nka muntu wasirehere, omu kuntu nani nchitape* bugeke.
17 Ebi ndi naderha ntabiderhere nk’oku Waliha akabiderhere, aliko nk’oku omuntu osirehere akabiderhere, omu kuchitapa* n’okuchilangalira.
18 Bulala bantu banene bali bachitapira* eby’omubiri, nani nachitapa.
19 Bulala mwabo muherhe “obwenge” bwenene, mulembere oku busime abasirehere.
20 Nechi, munalembera owabajirire baja, owabalire ebyenyu, owabanyegere byoshi muherhe, owachizamwire ku mwabo, n’owabashurhire omu masu.
21 Birhukozeze eshoni okuderha ntyo, bulala byakarhuma rhwabonekena nka rhuli bazamba.
Aliko akaba abandi bakolere n’obushiru; leka nderhe nka musire, nani mba muntu onakola n’obushiru.
22 Akaba bali Baebraniya, nani ndi Muebraniya. Akaba bali Baizraeli, nani ndi Muizraeli. Akaba bali b’omu luburho lwa Abrahamu, nani ndi w’omu luburho lwa Abrahamu.
23 Akaba bali bakozi ba Kristu, nashubiza nka musire; bibonekene bwinja oku ndi mukozi wa Kristu kubalusha: Nakolere bwenene kubalusha, nashwekerwe kanene kubalusha, nashurhirwe enkoni zirhakaganjwa, nanabwira nafa turu zinene.
24 Karhano koshi Abayahudi banshurhire nkoni 40 zibulirwe mu nguma,
25 banshurhire orhurhi kasharhu, bambandire amabale liguma, nazikire kasharhu, nagezeze obudufu n’ezuba lyoshi omu muhengeri;
26 nabere omu lugenzi turu zinene, nahurene obuhanya bw’enyinji zizibuzibu, obuhanya b’okubuganana n’ebishambo, obuhanya burhengerere oku bantu b’omu buko bwani, obuhanya burhengerere oku bantu b’amashanja, obuhanya omu vile, obuhanya omu rungu, obuhanya omu nyanja, obuhanya omu banalumbwa* mpu bene-berhu.
27 Nakolere akasi k’okuyuha echuka n’okukoboka, turu zinene nagezeze obudufu buzira kuj’ero, nayunvirhe enzara n’enyorha, nabulire eby’okulya mango manene, nashurhirwe n’emboho, nabula n’emyambaro.
28 Olekere ebila bibazo birhengerere embuga, hali echindi chintu chili chanderhera omulago lusiku oku lwindi: okulaga oku bibaga byoshi.
29 Inde wabere muzamba nkafunda kuba muzamba? Nde wagomere nkafunda kukaliha?
30 Akaba nkwanene kuchitapa,* nachitapira ebintu bili byayerekana obuzamba bwani.
31 Mungu kandi Eshe wa Waliha Yesu, Olala okwanene kusingizwa esiku n’amango, amenyere oku ntali nabesha.
32 Omu Damasko, guvernere wa mwami Aretase aliri alanga evile y’Abanyadamasko y’anfarha,
33 aliko banyandagaza omu karhanda kugerera edirisha lyaliri omu chibambazi ch’evile, nantyo namufuma.
