Ama kabiri oku Bakorinto 3:1-18
3 Bihemere rhushube rhuchimenyese oku rhukwanene kuba bakozi ba Mungu si? Changwa kuguma na bantu baguma, rhukenere amaruba maderha bwinja oku birhulolere si? Changwa bihemere mwabo muyandike amaruba mali nk’amola eju yerhu? Nanga.
2 Mwabo mwe maruba merhu mayandikirwe oku mirhima yerhu, mamenyikene manali masomwa n’abantu boshi.
3 Bulala mwabonekene oku muli maruba ma Kristu rhwayandikaga rhwabo nka bakozi, marhayandikwaga n’obwino si n’eroho lya Mungu olamire, arhali oku mabamba m’amabale s’oku mabamba m’omubiri, oku mirhima.
4 Rhuherhe echola chemezo emwa Mungu kugerera Kristu.
5 Arhali k’okuderha oku rhwewe rhwenyine rhuyeneze ebihemerwe yi rhukola okola kasi, s’aliko obuhashe rhuherhe bunarhenga emwa Mungu,
6 onarhuma rhwayeneza ebihemerwe yi rhuba bakozi b’endagano mpyahya, arhali b’amarhegeko mayandikirwe si bakozi b’eroho; bulala amarhegeko mayandikirwe manalerha echihano ch’olufu, aliko eroho linalerha akalamo.
7 Akaba amarhegeko manalerha olufu maliyandikirwe n’eherufi zichongerwe oku mabale, malibonekene n’obukuuze bunene omu kuntu Abaizraeli barhakagalire kulola Musa eju y’obukuuze bwaliri omu malanga mage, n’obo obola bukuuze bwalikwanene kuhwa,
8 bulagurhe eroho linalerha akalamo lyowe lirhakagwarha bukuuze bunene chiro bulushire obola?
9 Bulala akaba amarhegeko manahaana obuhane maliherhe obukuuze, kweri, akasi kanarhuma abantu baba banyakunali kakwanene kugwarha obukuuze kulusha!
10 Omu bukweri, chiro n’echintu chaliherhe obukuuze mira, chakulirwe k’obola bukuuze bulala hali obwindi bukuuze bubulushire.
11 Bulala akaba echintu chikwanene kuhwa chalilerherwe n’obukuuze, echikwanene kuyorha chikwanene kugwarha obukuuze bunene kulusha!
12 Bulala rhugwerhe obola bulangalire, rhuli rhwaderha n’obuhuru bunene,
13 rhurhanali rhwajira kuguma na Musa wahebaga echitambara oku malanga, omu kuntu Abaizraeli barhabonaga obuzinda bw’echintu chalikwanene kuhwa.
14 Obwenge bwabo burhapataga obuhashe b’okuyunva ebintu. Bulala kuhika zene, ey’endagano ya mira yasomwa, echola chitambara chiba eyi chinachiliho, bulala chinakulwa kugerera Kristu yenyine.
15 Kweri, kuhika zene, buli mango ey’ebi Musa ayandikaga byasomwa, echitambara chiba eyi chili oku mirhima yabo.
16 Aliko amango omuntu amahindamukira emunda Yehova ali, echitambara chanakulwa.
17 Yehova aba roho, n’ahantu eroho lya Yehova lili haba obuhuru.
18 Nerhu rhweshi bulala rhugwerhe amalanga marhali ku chitambara, rhunagalula obukuuze bwa Yehova nka kulala echiyo chinagalula omwangaza; rhunagenda rhwahindamulwa rhwanaba chishushanyo chage, kurhenga oku bukuuze rhwanaja oku bukuuze bukwirire bwenene nk’oku Yehova oli roho analonzeze.
