Ama kabiri oku Bakorinto 1:1-24
1 Nyono Paulo ntumwa ya Kristu Yesu kugerera obulonza bwa Mungu, ndi na Timoteyo mwene-werhu, oku chibaga cha Mungu chili omu Korinto kuheba mu n’abachesibwa boshi bali omu Akaya yoshi:
2 Darha Mungu na Waliha Yesu Kristu babahe olukogo rhurhakwanene n’omurhula.
3 Mungu kandi Eshe wa Nahamwerhu Yesu Kristu asingizwe, Darha w’olukogo lunene na Mungu w’echirhulirizo choshi,
4 onarhurhuliriza* omu malibuko merhu moshi yi nerhu rhugala kurhuliriza abandi bali omu malibuko ma buli lubero, kugerera echirhulirizo rhunapata kurhenga emwa Mungu.
5 Nka kulala rhunalibuka bwenene eju ya Kristu, ntyo ku rhwapata n’echirhulirizo chinene kugerera Kristu.
6 Akaba rhuli rhwalibuka, rhuli rhwalibuka yi murhulirizwa munapate obuchunguke; n’akaba rhuli rhwarhulirizwa, rhuli rhwarhulirizwa yi nenyu murhulirizwa n’echola chirhulirizo chabarhabala kulembera ebibazo nerhu rhuli rhwalembera.
7 Obunihire bwerhu oku bibalolere buserere, bulala rhumenyere oku nka kulala muli mwalibuka haguma nerhu, ntyo ku nji mwanarhulirizwa haguma nerhu.
8 Bene-berhu, rhurhalonzeze mukafunda kumenya amalibuko rhwahuranaga omu Aziya. Byalirhukomerere bwenene omu kuntu rhurhakagalire kubilembera oku buhashe bwerhu, rhurhanalimenyere chiro akaba kweri rhwalama changwa nanga.
9 Kweri, rhwalichiyunvirhe nka barhuchirire echihano ch’olufu. Byabaga ntyo yi rhurhachilangalira rhwenyine, si yi rhulangalira Mungu onafula abafire.
10 Omu buhanya b’olufu buli nk’obola mu Mungu arhufumyaga, anashuba kurhufumya, rhunaherhe obulangalire mu yewe oku agenderera kurhufumya.
11 Nenyu mwakarhurhabala omu kulakirira Mungu oku birhulolere, omu kuntu banene babwire Mungu koko oku birhulolere eju y’olukogo rhunapata kugerera ebishubizo by’amasala ma bantu banene.
12 Rhuherhe empanvu y’okuchishinga bulala ezamiri zerhu zili zahamiriza oku mu linola gulu n’ahanene ahakagarhi kenyu rhwachigendeseze n’omurhima guchere n’okuli birhengere emwa Mungu, arhali n’obwengehe bwa linola gulu, si n’olukogo lwa Mungu rhurhakwanene.
13 Bulala kweri rhurhabayandikire oku bilolere echintu choshi-choshi olekere ebi mwakagala kusoma* n’okuyunva, nandangalire oku mwagenderera kuyunva ebila bintu bwinja-bwinja,
14 nka kulala mwayunvirhe oku mugwerhe empanvu y’okuchishinga eju yerhu, nerhu nji rhwachishinga eju yenyu oku lusiku lwa Nahamwerhu Yesu.
15 Bobola eju y’obola bwizere ngwerhe, nalipangire oku narhanga kuyinja emwenyu, omu kuntu mupate orozo lwa kabiri l’okugwarha obusime,*
16 bulala nalipangire okunagera emwenyu omu kuja e Makedoniya, nanashuba kugerayo hanola ntenga e Makedoniya, buzinda nenyu mube nka mwamperekeza hanola nja e Yudeya.
17 Amango naliherhe ogola mupango, naliri narhola ebintu ntya-ntya si? Changwa nampanga ebintu omu kukulikiza amakanuni m’abantu, omu kuntu nanaderha “Nechi, nechi” na buzinda nanaderha “Nanga, nanga” si?
18 Mwakalangalira Mungu oku ebi rhuli rhwababwira bili by’okuli. Rhurhakarhanga kuderha “nechi” na buzinda rhukaderha mpu “nanga.”
19 Kandi Mugala wa Mungu Yesu Kristu, eyi nyono na Silvano* na Timoteyo rhwaliri rhwabatangaziza, arhaliri aderha “nechi” na buzinda akaderha “nanga”, s’ahubwe “nechi” wage, esiku zoshi aliri aba “nechi.”
20 Bulala chiro ebilagane bya Mungu byaba binene kangana gurhe, byabere “nechi” kugerera yewe. Che chirhumire kugerera yewe, rhunabwira Mungu “Ame” eyi rhwamusalira, na ntyo rhwanamuha obukuuze.
21 Aliko olala onayemeza oku mwabo nerhu rhuli bantu ba Kristu, warhushigire n’amavurha, ali Mungu.
22 Anarhuhebere kw’akashe kage, arhuhere n’echikinja ch’ebintu byayinja, k’okuderha eroho omu mirhima yerhu.
23 Impamagere Mungu abe muhamirizi wani oku akaba ntaza kuyinja e Korinto, kuli kubayunvira obonjo kurhumire.
24 Arhali k’okuderha oku rhuli bakulu b’obwemere bwenyu, aliko rhuli benyu bakozi yi mugwarha obusime, bulala muyimangire kugerera obwemere bwenyu.
