Ama kabiri oku Bakorinto 2:1-17
2 Bulala nabwene oku ntabagayisaga hanola nshuba kuyinja emunda muli.
2 Bulala nka namabagayisa, nde wakaja anshagalusa olekere olala nagayisaga?
3 Ebi nabayandikiraga, nabiyandikaga omu kuntu amango nayinja ntagayiswaga na balala bakwanene kunderhera obusime, bulala nchizerere oku ebinanderhera obusime byebinabalerhera obusime nenyu mweshi.
4 Bulala nabayandikiraga eyi ndi omu malibuko manene, eyi mperhe akahinda oku murhima, eyi nandi nalaka bwenene, arhali yi mbagayisa si yi mumenya kangana gurhe mbazigire bwenene.
5 Bobuno, akaba hali omuntu wajirire ebigayisize, arhali ny’agayisize, s’abagayisize mweshi; ntalonzeze nkaderha eby’abagayisa.
6 Okukalihirwa ntyo na bantu banene kutosheze k’oyola muntu;
7 mukwanene kuja mwamubabalira oku bulonza n’okumurhuliriza, omu kuntu arhagwarhaga akahinda kuchubusa olugero.
8 Mbahemere mumuyereke obuzigire.
9 Echila chili omu byarhumire nabayandikira: yi menya akaba mwayerekana oku munakenga omu bintu byoshi.
10 Mukababalira omuntu echintu choshi-choshi, nani namubabalira. Kweri, echintu choshi nababalire (akaba nababalire echintu choshi-choshi) najirire ntyo oku nyungu yenyu embere za Kristu,
11 yi Shetani arharhuhima, bulala rhurhahabire amayeri mage.
12 Amango mpika e Trowa yi ntangaza emyazi minja oku bilolere Kristu eyi n’omulyango gwanchingulirwe mu Waliha,
13 omurhima gwani gurharhuleraga bulala ntabuganaga mwene-werhu Tito. Nantyo nabasezera naja e Makedoniya.
14 Aliko rhubwirire Mungu koko onarhuyerekeza amango rhuli rhwalambagira haguma na Kristu nka basoda barhenga oku vita eyi bahimene. Okumenya Mungu eli nka mpumulo nyinja, anali akolesa akasi rhunakola omu kuntu abantu ba buli hoshi bayunve eyola mpumulo.
15 Bulala embere za Mungu rhuli mpumulo nyinja ya Kristu omu bantu bachunguka n’omu bantu baharabiswa;
16 kw’abola baharabiswa eli mpumulo y’olufu eyerekeze oku lufu, na ku balala bachungulwa eli mpumulo y’akalamo eyerekeze oku kalamo. Inde kanuni oyeneze ebihemerwe y’akola akola kasi?
17 Rhwabo rhwe rhubiyeneze, bulala rhurhachuruza echinwa cha Mungu nka kulala abandi banajira, aliko rhunaderha buzira bulyalya nka bantu barhumirwe na Mungu, nechi, bali embere za Mungu banaherekezwe na Kristu.
