Mẹsusu ko lẹn wayi dọ opodo aihọn tọn na wá to 21 décembre 2012. Sọgbe hẹ nuhe yé donukun dọ e na jọ to azán enẹ ji, e yọnbasi dọ yé na ko tindo numọtolanmẹ kọgbọ, flumẹjijẹ kavi todido hinhẹnbu tọn. Be ehe lọsu ma dohia dọ hopàdọ wẹ dọdai he gando opodo lọ go lẹ yin ya?

Etẹwẹ dogbọn “opodo aihọn tọn” he yin nùdego to Biblu mẹ dali? (Matiu 24:3, Biblu Wiwe lọ—Gun Alada) Mẹdelẹ nọ dibu dọ aigba na yin fifiọ. Mẹdevo lẹ to jejeji nado mọ nuhe na jọ to opodo aihọn tọn. Podọ agbọ́ tlẹ ko pé mẹsusu nado nọ sè dọ opodo aihọn tọn ko sẹpọ. Ṣigba be numọtolanmẹ enẹlẹ tintindo sọgbe ya? Etẹwẹ yin nugbo lọ gando whẹho ehe go?

Nuhe Biblu dọ gando opodo aihọn tọn go sọgan paṣa we. E ma yin whẹwhinwhẹ́n he wutu mí dona nọ donukun dọ opodo aihọn tọn na wá lẹ kẹdẹ wẹ Biblu na gba, ṣigba e sọ dohia dọ mẹdelẹ sọgan jẹflumẹ eyin opodo lọ ma wá to whenue yé lẹn do. Mì gbọ mí ni gbadopọnna gblọndo kanbiọ delẹ tọn he gando opodo aihọn tọn go.

GBLỌNDO BIBLU TỌN: “[Jiwheyẹwhe] ko do [aigba] ai do dòdó etọn lẹ ji, bọ e ma nado yin tẹnsẹna gbede.”—PSALM 104:5.

Aigba ma na yin vivasudo, vlavo gbọn miyọ́n kavi nudevo depope dali. Kakatimọ, Biblu plọn mí dọ aigba na yin owhé gbẹtọvi lẹ tọn kakadoi. Psalm 37:29 dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 115:16; Isaia 45:18.

To whenue Jiwheyẹwhe ko dá aigba godo, ewọ dọ dọ e “yọ́n tlala,” podọ ewọ gbẹsọ tindo numọtolanmẹ dopolọ to egbehe. (Gẹnẹsisi 1:31) Jiwheyẹwhe ma tindo linlẹn lọ nado và aigba sudo pọ́n gbede, kakatimọ ewọ dopagbe nado “husudo mẹhe to aigba husudo lẹ” podọ nado basi hihọ́na aigba bọ e ma na yin vivasudo gbede.—Osọhia 11:18.

Ṣigba, 2 Pita 3:7 dọ dọ: “Olọn lẹ po aigba lọ po he tin todin yin whiwhla na miyọ́n.” Be ehe ma dohia dọ aigba na yin fifiọ ya? Na nugbo tọn, to whedelẹnu, Biblu nọ yí hogbe lọ lẹ “olọn lẹ,” “aigba” po “miyọ́n” po zan to yẹhiadonu-liho. Di apajlẹ, to whenue Psalm 96:1 dọmọ: “Mì jihàn hlan OKLUNỌ, mì aigba lẹpo,” gbẹtọvi lẹ wẹ “aigba” lọ nọtena.

Lẹdo 2 Pita 3:7 tọn dohia dọ olọn lẹ, aigba, po miyọ́n lọ po yin yiyizan to yẹhiadonu-liho. Wefọ 5 po 6 po dlẹnalọdo Singigọ azán Noa tọn gbè tọn. To nujijọ enẹ whenu, aihọn hohowhenu tọn de yin vivasudo, ṣogan aigba lọ gbẹ́ tin kakajẹ din. Enẹwutu, “aigba” he yin vivasudo to Singigọ lọ whenu nọtena danuwatọ lẹ. (Gẹnẹsisi 6:11) Podọ “olọn lẹ” he Singigọ lọ vasudo nọtena aṣẹpatọ ojlẹ lọ mẹ tọn lẹ. To aliho dopolọ mẹ, dọdai he tin to 2 Pita 3:7 mẹ dohia dọ mẹylankan lẹ po aṣẹpatọ egbezangbe tọn lẹ po na yin vivasudo mlẹnmlẹn, kẹdẹdile miyọ́n nọ fiọ onú do.

GBLỌNDO BIBLU TỌN: “Aihọn to jujuyi po ojlo etọn po ga, ṣigba ewọ he wà ojlo Jiwheyẹwhe tọn na gbọṣi aimẹ kakadoi.”—1 JOHANU 2:17.

To wefọ ehe mẹ, “aihọn” he na juwayi lọ mayin aigba, ṣigba gbẹtọvi he gbẹzan yetọn ma sọgbe hẹ ojlo Jiwheyẹwhe tọn lẹ. Dile doto mẹzẹtọ de nọ de nuhe to tuklado awutunọ de sẹ̀ sọn agbasa etọn mẹ nado whlẹn ogbẹ̀ etọn do, Jiwheyẹwhe na  “sán” ylanwatọ lẹ sẹ̀ sọn aigba ji na mẹdagbe lẹ nido sọgan duvivi ogbẹ̀ tọn. (Psalm 37:9) Enẹwutu, “opodo aihọn tọn” na hẹn ale wá na tonusetọ lẹ.

Lẹdogbedevomẹ Biblu tọn devo lẹ do pọndohlan dagbe mọnkọtọn hia gando “opodo aihọn tọn” go to whenue yé ylọ hogbe ehe dọ, “vivọnu titonu lọ tọn” kavi “vivọnu whẹndo lọ tọn.” (Matiu 24:3; New International Version) To whenuena e yindọ gbẹtọvi lẹ po aigba lọ po na luntọ́n, be e ma sọgbe nado wá tadona lọ kọ̀n dọ gbẹtọvi lẹ na bẹ gbẹzan yọyọ de jẹeji to aigba lọ ji ya? Mọwẹ, na hogbe lọ “titonu he ja” sọawuhia to Biblu mẹ wutu.—Luku 18:30.

Jesu ylọ ojlẹ sọgodo tọn enẹ dọ “ojlẹ onú lẹ hinhẹn jẹ yọyọ tọn.” To ojlẹ enẹ mẹ, ewọ na hẹn gbẹtọvi lẹ wá ninọmẹ he Jiwheyẹwhe jlo na yé to dowhenu lọ mẹ. (Matiu 19:28) To whenẹnu, mí na duvivi nuhe na bọdego ehelẹ tọn:

• Aigba na lẹzun Paladisi, podọ hihọ́ po jijọho po nasọ gbayipe.—Isaia 35:1; Mika 4:4.

• Azọ́n pekọhẹnwanamẹ tọn.—Isaia 65:21-23.

• Azọ̀n lẹpo na gbọ.—Isaia 33:24.

• Mẹdepope ma nasọ yin yọnhonọ ba.—Job 33:25.

• Oṣiọ lẹ na fọnsọnku.—Johanu 5:28, 29.

Eyin mí nọ wà “ojlo Jiwheyẹwhe tọn,” enẹ wẹ nuhe e biọ to mí si lẹ, mí ma tindo whẹwhinwhẹ́n depope nado dibuna opodo aihọn tọn. Kakatimọ, mí na yí jejejininọ do nọtepọn ẹn.

GBLỌNDO BIBLU TỌN: “To whenue mì mọ onú ehelẹ to jijọ, mì ni yọnẹn dọ ahọluduta Jiwheyẹwhe tọn ko sẹpọ.”—LUKU 21:31.

Richard Kyle he yin mẹplọntọ wehọmẹ alavọ tọn wlan dọ, “diọdo ajiji po bẹwlu he gbayipe po sọgan zọ́n bọ gbẹtọ lẹ na jẹ dọdai dọ ji gando opodo aihọn tọn go.” (The Last Days Are Here Again) Yé nọ wàmọ titengbe to whenue e vẹawuna yé nado mọnukunnujẹ diọdo ajiji po bẹwlu enẹlẹ po mẹ.

Ṣigba, yẹwhegán he dọho gando opodo aihọn tọn go to Biblu mẹ lẹ ma to zẹẹmẹ nujijọ dabla he wá aimẹ to azán yetọn gbè lẹ tọn basi gba. Kakatimọ, yé yin gbigbọdo gbọn Jiwheyẹwhe dali nado basi zẹẹmẹ ninọmẹ he na dohia dọ opodo aihọn tọn ko sẹpọ pete lẹ tọn. Gbadopọnna delẹ to dọdai enẹlẹ mẹ bo pọ́n eyin yé to hẹndi mọyi to ojlẹ mítọn mẹ.

•   Awhàn, huvẹ, aigba sisọsisọ, azọ̀n ylankan he nọ yawu bẹplamẹ lẹ.—Matiu 24:7; Luku 21:11.

• Jideji sẹ́nhẹngba tọn.—Matiu 24:12.

• Husudo aigba tọn gbọn gbẹtọvi lẹ dali.—Osọhia 11:18.

• Gbẹtọvi he yiwanna yedetiti, akuẹ po gbẹdudu po kakati nido yin Jiwheyẹwhe lẹ.—2 Timoti 3:2, 4.

• Gbakija whẹndo tọn.—2 Timoti 3:2, 3.

• Mẹsusu ma nọ kiyana kunnudenu he dohia dọ opodo lọ ko sẹpọ lẹ.—Matiu 24:37-39.

• Yẹwheho wẹndagbe Ahọluduta Jiwheyẹwhe tọn didọ lẹdo aihọn pé.—Matiu 24:14.

Dile Jesu dọ do, “onú ehe lẹpo” mimọ wẹ gọalọna mí nado yọnẹn dọ opodo aihọn tọn ko sẹpọ. (Matiu 24:33) Kunnudenu enẹlẹ wẹ hẹn Kunnudetọ Jehovah tọn lẹ kudeji dọ opodo lọ ko sẹpọ, podọ yé nọ dọyẹwheho na gbẹtọ lẹ gando nuyise yetọn lẹ go to aigba 236 ji.

GBLỌNDO BIBLU TỌN: “To whenue yé na to didọmọ: ‘Jijọho po hihọ́ po!’ whenẹnu wẹ vasudo ajiji na wá yé ji to afọdopolọji kẹdẹdile awufiẹsa ajipanu tọn nọ wá yọnnu he to ohò de ji do; yé ma nasọ họ̀ngán to aliho depope mẹ.”—1 TẸSALONIKANU LẸ 5:3.

Biblu yí vasudo aihọn ehe tọn jlẹdo ninọmẹ yọnnu hohonọ he vijiji etọn ko sẹpọ de tọn go, na ajiji mẹ wẹ awufiẹsa nọ wá yọnnu mọnkọtọn ji te, podọ ewọ ma sọgan dapana awufiẹsa enẹlẹ. Ojlẹ he na plan mí jẹ opodo aihọn tọn taidi yọnnu hohonọ de tọn nkọ. Na yọnnu he to ohò de nọ to ayido ohia debọdo-dego lẹ go dọ vijiji etọn to sisẹpọ. Doto sọgan ko dọ ojlẹ he mẹ e na jivi te na ẹn; etomọṣo, eyin vijiji lọ tlẹ dọngbàn, ewọ gbẹ́ nọ kudeji dọ emi na jivi to madẹnmẹ. Mọdopolọ, dile etlẹ yindọ opodo lọ ma wá to ojlẹ he mẹ mẹdelẹ lẹndọ e na wá te, nugbo lọ wẹ yindọ “azán godo tọn lẹ” mẹ wẹ mí tin te.—2 Timoti 3:1.

Hiẹ sọgan nọ kanse dọ, ‘To whenuena e yindọ kunnudenu he dohia dọ opodo lọ ko sẹpọ lẹ họnwun sọmọ, naegbọn mẹsusu ma nọ kiyana ohia ehe?’ Biblu dohia dọ to whenue opodo lọ na sẹpọ, mẹsusu na yí nukunpẹvi do pọ́n nujijọ he dohiagona opodo lọ lẹ. Kakati nado doayi diọdo ayidego tọn lẹ  he dohia dọ mí tin to azán godo tọn lẹ mẹ go, yé na nọ vlẹ mẹhe doayi yé go lẹ kò dọmọ: “Sọn azán he gbè tọgbo mítọn lẹ ko damlọn to okú mẹ, mọ wẹ onú lẹpo gbẹ́ te kẹdẹdile e te do pẹpẹ sọn bẹjẹeji nudida tọn gbọ́n.” (2 Pita 3:3, 4) To hogbe devo mẹ, ohia azán godo tọn lẹ tọn họnwun ganji, ṣigba mẹsusu na dovọ́na ẹn.—Matiu 24:38, 39.

To hosọ ehe mẹ, mí ko gbadopọnna delẹ to kunnudenu Owe-wiwe tọn he dohia dọ opodo lọ ko sẹpọ lẹ mẹ. a Be e na jlo we nado plọn nususu dogọ ya? Eyin mọ wẹ, ma whleawu nado biọ to Kunnudetọ Jehovah tọn lẹ si nado wá plọn Biblu hẹ we vọnu blo. Oplọn ehe sọgan yin bibasi to owhé towe gbè, to fidevo he jlo we, kavi etlẹ yin gbọn alokan ji. Nuhe e na biọ to asi we poun wẹ whenu towe, podọ ale he hiẹ na mọyi lẹ sù taun.