Hẹn “Todido Whlẹngán Tọn” Towe Họnwun!
Hẹn “Todido Whlẹngán Tọn” Towe Họnwun!
“Mí ni ze dogo . . . taidi ogangbakun todido whlẹngán tọn.”—1 Tẹsalonikanu lẹ 5:8.
1. Nawẹ “todido whlẹngán tọn” nọ gọalọ to akọ́ndonanu mẹ gbọn?
TODIDO nado yin whinwhlẹngán tọn sọgan gọalọna mẹde nado zindonukọn etlẹ yin to ninọmẹ he ylan tlala lẹ mẹ. Mẹhe tọjihun etọn gbà he tẹdo nuhe fòtọ de go sọgan sinyẹnlin tlala eyin e yọnẹn dọ alọgọ tin to yakẹ. Mọdopolọ, na owhe fọtọ́n susu lẹ, todido to “whlẹngán OKLUNỌ tọn” mẹ ko hẹn sunnu po yọnnu yisenọ lẹ po to ojlẹ tukla tọn lẹ mẹ lodo, podọ todido ehe ma ko dekọtọn do flumẹjijẹ mẹ pọ́n gbede gba. (Eksọdusi 14:13; Psalm 3:8; Lomunu lẹ 5:5; 9:33) Apọsteli Paulu yí “todido whlẹngán tọn” jlẹdo “ogangbakun” heyin gbaja gbigbọmẹ Klistiani de tọn go. (1 Tẹsalonikanu lẹ 5:8; Efesunu lẹ 6:17) Mọwẹ, jidide tintindo mítọn dọ Jiwheyẹwhe na whlẹn mí gán nọ basi hihọ́na nugopipe nulẹnpọn tọn mítọn, bo nọ gọalọna mí nado hẹn lẹnpọn mítọn go mahopọnna yajiji, nukundiọsọmẹ, po whlepọn po.
2. To aliho tẹlẹ mẹ wẹ “todido whlẹngán tọn” yin dodonu na sinsẹ̀n-bibasi nugbo te?
2 “Todido gando sọgodo go ma yin walọyizan aihọn kosi lẹ tọn tọn gba,” yèdọ aihọn he lẹdo Klistiani owhe kanweko tintan tọn lẹ, wẹ The International Standard Bible Encyclopedia dọ. (Efesunu lẹ 2:12; 1 Tẹsalonikanu lẹ 4:13) Etomọṣo, “todido whlẹngán tọn” yin nugonu tangan sinsẹ̀n-bibasi nugbo tọn. Nawẹ e yinmọ gbọn? Tintan, whlẹngán devizọnwatọ Jehovah tọn lẹ tọn yin kinkọndopọ hẹ oyín edetiti tọn. Psalm-kàntọ Asafu hodẹ̀ dọmọ: “Gọalọna mí, Jiwheyẹwhe whlẹngán mítọn tọn E, na gigo oyín towe tọn: whlẹn mí.” (Psalm 79:9; Ezekiẹli 20:9) Humọ, jidide tintindo to dona dopagbe Jehovah tọn lẹ mẹ yin dandannu to haṣinṣan dagbe de tintindo hẹ ẹ mẹ. Paulu dọ ẹ to aliho ehe mẹ dọmọ: “Matin yise, e gló nado hẹn homẹ etọn hùn: na ewọ he ja Jiwheyẹwhe dè, ma sọgan nọma yise dọ e tin, podọ ewọ wẹ ahọsutọ yé he whesọ do dín in lẹ tọn.” (Heblu lẹ 11:6) Humọ, Paulu basi zẹẹmẹ dọ whlẹngán mẹhe lẹnvọjọ lẹ tọn wẹ yin whẹwhinwhẹ́n tangan de na aigba ji wiwá Jesu tọn. E lá dọmọ: “Nugbonọ wẹ ohó lọ, e sọ jẹ na alọkẹyi popo, dọ Klisti Jesu wá aihọn mẹ nado whlẹn ylandonọ [lẹ].” (1 Timoti 1:15) Podọ apọsteli Pita dlẹnalọdo whlẹngán taidi ‘opodo [kavi, kọdetọn godo tọn] yise mítọn tọn.’ (1 Pita 1:9) E họnwun dọ, nuhe sọgbe wẹ e yin nado tindo todido na whlẹngán. Ṣigba etẹwẹ whlẹngán yin na taun tọn? Podọ etẹwẹ yin bibiọ nado mọ ẹn yí?
Etẹwẹ Whlẹngán Yin?
3. Whlẹngán wunmẹ tẹwẹ devizọnwatọ ojlẹ hohowhenu Jehovah tọn tọn lẹ tindo numimọ etọn?
3 To Owe-wiwe Heblu tọn lẹ mẹ, “whlẹngán” nọ saba zẹẹmẹdo túndote kavi hihọ́ sọn kọgbidinamẹ kavi sọn danuwiwa de mẹ, yèdọ okú azán mape do tọn. Di dohia, yiylọ Jehovah dọ ‘Awuwledaitọ whlẹngán tọn,’ Davidi dọmọ: “Jiwheyẹwhe [wẹ] osé ṣie, . . . fibẹtado ṣie; Whlẹngántọ ṣie, hiẹ whlẹn mi sọn [danuwiwa] si. Yẹn na to OKLUNỌ ylọ, mẹhe tin jẹhẹ yè nado nọ pà: mọwẹ yè na whlẹn mi sọn kẹntọ ṣie lẹ si.” (2 Samuẹli 22:2-4) Davidi yọnẹn dọ Jehovah nọ dotoai to whenuena devizọnwatọ Etọn lẹ dawhá na alọgọ.—Psalm 31:22, 23; 145:19.
4. Todido na sọgodo tẹwẹ devizọnwatọ Jehovah tọn he tin jẹnukọnna ojlẹ Klistiani tọn lẹ tindo?
4 Devizọnwatọ Jehovah tọn he jẹnukọnna ojlẹ Klistiani tọn lẹ tindo todido ogbẹ̀ sọgodo tọn ga. (Job 14:13-15; Isaia 25:8; Daniẹli 12:13) Na nugbo tọn, susu to opagbe hihọ-basinamẹ tọn lẹ mẹ heyin mimọ to Owe-wiwe Heblu tọn lẹ mẹ yin dọdai whlẹngán daho hugan de tọn—yèdọ dehe na planmẹ biọ ogbẹ̀ madopodo mẹ. (Isaia 49:6, 8; Owalọ lẹ 13:47; 2 Kọlintinu lẹ 6:2) To azán Jesu tọn gbè, susu Ju lẹ tọn wẹ tindo todido na ogbẹ̀ madopodo, ṣigba yé gbẹ́ nado kẹalọyi Jesu taidi họ̀nhungàn lọ nado mọ todido yetọn yí. Jesu dọna nukọntọ sinsẹ̀n tọn ojlẹ etọn mẹ tọn lẹ dọmọ: “Mì [Owe-wiwe] lẹ dinmọ, na mì lẹndọ yé mẹ mì tindo ogbẹ̀ madopodo te wutu; podọ ehelẹ sọ wẹ yé he to kunnudena mi.”—Johanu 5:39.
5. Yigodo-yinukọn, etẹwẹ whlẹngán zẹẹmẹdo?
5 Gbọn Jesu gblamẹ, Jiwheyẹwhe de obá he mẹ zẹẹmẹ whlẹngán tọn gblo jẹ hia. E bẹ túndote sọn gandudomẹji ylando tọn mẹ, sọn kanlinmọgbenu sinsẹ̀n lalo tọn, sọn aihọn he tin to anademẹ Satani tọn glọ mẹ, sọn obu gbẹtọ tọn mẹ, podọ etlẹ yin sọn obu okú tọn mẹ hẹn. (Johanu 17:16; Lomunu lẹ 8:2; Kọlọsinu lẹ 1:13; Osọhia 18:2, 4) Yigodo-yinukọn, na devizọnwatọ nugbonọ Jiwheyẹwhe tọn lẹ, e mayin dọ whlẹngán gbọn Jiwheyẹwhe dali zẹẹmẹdo whlẹngán sọn kọgbidinamẹ po ayimajai po kẹdẹ si wẹ gba ṣigba dotẹnmẹ hundote lọ nado tindo ogbẹ̀ madopodo ga. (Johanu 6:40; 17:3) Jesu plọnmẹ dọ na “lẹngbọpa pẹvi” de, whlẹngán zẹẹmẹdo finfọnsọnku yetọn do ogbẹ̀ olọn mẹ tọn mẹ nado tindo mahẹ hẹ Klisti to gandudu Ahọluduta tọn mẹ. (Luku 12:32) Na pipòtọ gbẹtọvi lẹ tọn, whlẹngán zẹẹmẹdo hinhẹngọwa ogbẹ̀ pipé de po haṣinṣan tintindo hẹ Jiwheyẹwhe po mẹ he Adam po Evi po duvivi etọn to jipa Edẹni tọn mẹ whẹpo yé do waylando. (Owalọ lẹ 3:21; Efesunu lẹ 1:10) Ogbẹ̀ madopodo to ninọmẹ paladisi tọn mọnkọtọn mẹ yin lẹndai dowhenu Jiwheyẹwhe tọn na gbẹtọvi lẹ. (Gẹnẹsisi 1:28; Malku 10:30) Nalete, nawẹ hinhẹngọwa jẹ ninọmẹ mọnkọtọn lẹ mẹ yọnbasi gbọn?
Dodonu na Whlẹngán—Yèdọ Ofligọ Lọ
6, 7. Etẹwẹ yin azọngban Jesu tọn to whlẹngán mítọn mẹ?
6 Whlẹngán madopodo yọnbasi kiki gbọn avọ́sinsan ofligọ Klisti tọn dali. Etẹwutu? Biblu basi zẹẹmẹ dọ whenuena Adam waylando, e “sà” ede po kúnkan sọgodo tọn etọn lẹpo po, he mẹ mí tin te, do ylando mẹ—gbọnmọ dali ofligọ de yin dandannu eyin gbẹtọvi lẹ na tindo todido he lodo depope. (Lomunu lẹ 5:14, 15; 7:14) Dọ Jiwheyẹwhe na wleawuna ofligọ de na gbẹtọvi lẹpo yin didohia jẹnukọn gbọn avọ́sinsan kanlin tọn lẹ dali to Osẹ́n Mose tọn glọ. (Heblu lẹ 10:1-10; 1 Johanu 2:2) Jesu wẹ yin mẹhe avọ́sinsan etọn hẹn yẹdide dọdai tọn enẹlẹ di. Angẹli Jehovah tọn lá jẹnukọnna jiji Jesu tọn dọmọ: “Ewọ wẹ na whlẹn omẹ etọn lẹ gán sọn ylando yetọn lẹ mẹ.”—Matiu 1:21; Heblu lẹ 2:10.
7 Jesu yin jiji to azọ́njiawu-liho gbọn awhli Malia dali, podọ taidi Visunnu Jiwheyẹwhe tọn, e ma dugu okú tọn sọn Adam dè gba. Nugbo ehe to pọmẹ hẹ aliho gbẹzan pipé nugbonọ-yinyin tọn etọn hẹn ogbẹ̀ etọn tindo nuhọakuẹ he nuhudo etọn tin nado vọ́ gbẹtọvi lẹ họ̀ sọn ylando po okú po mẹ. (Johanu 8:36; 1 Kọlintinu lẹ 15:22) To vogbingbọn mẹ na gbẹtọ devo lẹpo, Jesu ma yin whẹgbledo nado kú na ylando wutu gba. E de sọn ojlo mẹ bo wá aigba ji “nado yí ogbẹ̀ etọn do basi ofligọ na omẹ susu.” (Matiu 20:28) To whenuena e ko wàmọ, Jesu he ko yin finfọnsọnku bosọ yin zizedo ofìn ji lọ tin to otẹn de mẹ nado na whlẹngán mẹhe jẹ nubiọtomẹsi Jiwheyẹwhe tọn kọ̀n lẹpo.—Osọhia 12:10.
Etẹwẹ Yin Bibiọ Nado Mọ Whlẹngán Yí?
8, 9. (a) Nawẹ Jesu na gblọndo kanbiọ togán jọja de tọn gbọn gando whlẹngán go? (b) Nawẹ Jesu yí nujijọ ehe zan nado plọnnu devi etọn lẹ gbọn?
8 To ojlẹ de mẹ, togán jọja adọkunnọ Islaelivi de kanse Jesu dọmọ: “Etẹwẹ yẹn na wà, bọ yẹn nado dugu ogbẹ̀ madopodo tọn?” (Malku 10:17) Kanbiọ etọn sọgan ko do linlẹn he gbayipe Juvi lẹ tọn to ojlẹ etọn mẹ hia—dọ Jiwheyẹwhe nọ biọ azọ́n dagbe delẹ podọ gbọn azọ́n mọnkọtọn lẹ wiwà jẹ obá de mẹ dali, mẹde sọgan mọ whlẹngán yí sọn Jiwheyẹwhe dè. Ṣigba mẹdezejo wunmẹ aṣa tọn enẹ sọgan wá sọn mẹwhinwhàn ṣejannabi tọn lẹ mẹ. Azọ́n mọnkọtọn lẹ gboawupo nado wleawuna todido heyin jide-dego whlẹngán tọn, to whenuena e yindọ gbẹtọvi mapenọ depope ma sọgan jẹ obá nujinọtedo Jiwheyẹwhe tọn lẹ kọ̀n po awubibọ po.
9 To gblọndo nina hlan kanbiọ dawe lọ tọn mẹ, Jesu flin in poun dọ e dona setonuna gbedide Jiwheyẹwhe tọn lẹ. Togán jọja lọ hẹn Jesu tindo nujikudo po awuyiya po dọ emi ko nọ payi yé go sọn ovuwhenu emitọn gbọ́n. Gbeyiyi etọn whàn Jesu nado tindo numọtolanmẹ owanyi tọn na ẹn. Jesu dọ na ẹn dọmọ: “Onú dopo wẹ pò na we; yì, bo sà onú depope he hiẹ tindo, bo yí na wamọnọ lẹ, hiẹ nasọ tindo adọkunnu to olọn mẹ: bo wá, . . . hodo mi.” Ṣigba, dawe lọ yì to awubla mẹ, “na ewọ yin mẹde he tindo adọkun susu wutu.” To enẹgodo Jesu zinnudeji hlan devi etọn lẹ dọ titẹdo nutindo aihọn ehe tọn lẹ go glanglan nọ glọnalina whlẹngán mimọyi. E yidogọ dọ mẹdepope ma sọgan mọ whlẹngán yí gbọn vivẹnu edetiti tọn dali gba. Ṣigba Jesu zindonukọn nado vọ́ jide na yé dọmọ: “Gbẹtọ dè wẹ ehe gló te, ṣigba e ma yin to Jiwheyẹwhe dè gba: na onú lẹpo wẹ wiwà na Jiwheyẹwhe.” (Malku 10:18-27; Luku 18:18-23) Nawẹ whlẹngán yọnbasi gbọn?
10. Nubiọtomẹsi tẹlẹ kọ̀n wẹ mí dona jẹ nado mọ whlẹngán yí?
10 Whlẹngán yin nunina de sọn Jiwheyẹwhe dè, ṣigba e ma nọ wá na ede gba. (Lomunu lẹ 6:23) Ninọmẹ tangan delẹ tin he kọ̀n mẹdopodopo dona jẹ nado pegan na nunina enẹ. Jesu dọmọ: “Jiwheyẹwhe yiwanna aihọn sọmọ bọ e yí Ovi detọ́n etọn dopo akàn namẹ, na mẹdepope he yí ì sè ma nado dọ̀n, ṣigba e nido tindo ogbẹ̀ madopodo.” Podọ apọsteli Johanu yidogọ dọmọ: “Mẹhe yise to Ovi mẹ tindo ogbẹ̀ madopodo: mẹhe ma yise to Ovi mẹ ma to na mọ ogbẹ̀.” (Johanu 3:16, 36) E họnwun dọ, Jiwheyẹwhe nọ biọ yise po tonusise po sọn mẹdopodopo he tindo todido nado mọ whlẹngán madopodo yí lẹ dè. Mẹdopodopo dona basi nudide nado kẹalọyi ofligọ lọ bosọ hodo afọdòmẹ Jesu tọn lẹ.
11. Nawẹ gbẹtọ mapenọ de sọgan mọ alọkẹyi Jehovah tọn yí gbọn?
11 To whenuena e yindọ mapenọ wẹ mí yin, e ma yin ayilinlẹn jọwamọ tọn mítọn nado setonu podọ e ma yọnbasi na mí nado setonu mlẹnmlẹn gba. Enẹwutu wẹ Jehovah wleawuna ofligọ de nado ṣinyọnnudo ylando mítọn lẹ. Etomọṣo, mí dona dovivẹnu zọnmii nado nọgbẹ̀ to kọndopọmẹ hẹ aliho Jiwheyẹwhe tọn lẹ. Dile Jesu dọna togán jọja lọ do, mí dona yìn gbedide Jiwheyẹwhe tọn lẹ. E mayin dọ mọwiwà nọ hẹn alọkẹyi Jiwheyẹwhe tọn wá kẹdẹ wẹ gba ṣigba nọ hẹn ayajẹ daho tlala wá ga, na “osẹ́n etọn ma sọ yin nupẹnagbanmẹ gba”; yé yin ‘kọfanamẹnu de.’ (1 Johanu 5:3; Howhinwhẹn lẹ 3:1, 8) Ṣogan, e ma bọawu nado tẹdo todido whlẹngán tọn go gba.
“Hoavùn Zògbè na Yise”
12. Nawẹ todido whlẹngán tọn nọ hẹn Klistiani de lodo nado nọavunte sọta mẹtẹnpọn mawé tọn lẹ gbọn?
12 Devi Juda jlo nado wlanwe hlan Klistiani fliflimẹ tọn lẹ gando ‘whlẹngán he yé tindo to kọndopọ mẹ’ go. Ṣigba, ninọmẹ walọ ylankan tọn he to gbigbayipe lọ hẹn ẹn po huhlọn po nado na ayinamẹ mẹmẹsunnu etọn lẹ nado “hoavùn zògbè na yise.” Mọwẹ, nado mọ whlẹngán yí e ma ko pé nado tindo yise, nado tẹdo yise nugbo Klisti tọn go, podọ nado setonu to whenuena nulẹpo to yìyì linsinlinsin. Mẹdezejo mítọn hlan Jehovah dona sinyẹn sọmọ nado gọalọna mí nado nọavunte sọta mẹtẹnpọn lẹ po nuyiwadomẹji mawé tọn lẹ po. Etomọṣo, zanhẹmẹ he gblezọn po wantuntun po, sisi matindo na aṣẹpipa, wiwọ́, po ayihaawe tintindo po to gbigbọ agun owhe-kanweko tintan tọn hẹngble. Nado gọalọna yé nado diahi hẹ ayilinlẹn mọnkọtọn lẹ, Juda na tuli Klistiani hatọ lẹ nado hẹn yanwle yetọn do ahun mẹ hezeheze dọmọ: “Mẹyiwanna emi, he hẹn mìde dote to yise wiwewiwe mìtọn ji, bo to dẹ̀ho to [gbigbọ wiwe] mẹ, mì yí mìde whlá to owanyi Jiwheyẹwhe tọn mẹ, bo to todo lẹblanu Jesu Klisti Oklunọ mítọn tọn hlan ogbẹ̀ madopodo.” (Juda 3, 4, 8, 19-21) Todido whlẹngán mimọyi tọn sọgan na huhlọn yé to avùnhiho yetọn mẹ nado gbọṣi madodiho to walọyizan mẹ.
13. Nawẹ mí sọgan dohia dọ mí ma ko gbọ̀ lẹndai lẹblanu majẹhẹ Jiwheyẹwhe tọn go gbọn?
13 Jehovah Jiwheyẹwhe nọ donukun walọyizan dagbe sọn adà mẹhe e na na whlẹngán lẹ tọn mẹ. (1 Kọlintinu lẹ 6:9, 10) Ṣigba, titẹdo nujinọtedo walọdagbe Jiwheyẹwhe tọn go ma zẹẹmẹdo lilẹzun whẹdana mẹdevo lẹ tọ́ gba. E mayin míwlẹ wẹ na magbè sọgodo mavọmavọ gbẹtọ hatọ mítọn lẹ tọn gba. Kakatimọ, Jiwheyẹwhe wẹ na wàmọ, dile Paulu dọna Glẹkinu lẹ to Atẹni do dọmọ: “Ewọ ko dè azán de, ehe mẹ ewọ na dawhẹna aihọn to dodo mẹ to dawe he ewọ ko do dè mẹ”—yèdọ Jesu Klisti. (Owalọ lẹ 17:31; Johanu 5:22) Eyin mí to gbẹnọ gbọn yise dali to ofligọ Jesu tọn mẹ mí ma dona dibu na azán whẹdida tọn he ja gba. (Heblu lẹ 10:38, 39) Onú titengbe lọ wẹ yindọ mí ma dona “kẹalọyi lẹblanu majẹhẹ Jiwheyẹwhe tọn [whẹgbigbọ mítọn hlan ẹn gbọn ofligọ lọ dali] bo gbọ̀ lẹndai etọn go,” gbọn dotẹnmẹ jijodo na mídelẹ nado yin whiwhlepọn biọ nulẹnpọn po walọyizan ylankan po mẹ dali gba. (2 Kọlintinu lẹ 6:1, NW ) To yidogọmẹ, gbọn alọgigọna mẹdevo lẹ nado mọ whlẹngán yí dali, mí nọ dohia dọ mí ma ko gbọ̀ lẹndai lẹblanu Jiwheyẹwhe tọn go gba. Nawẹ mí sọgan gọalọna yé gbọn?
Todido Whlẹngán Tọn Mimá
14, 15. Mẹnu lẹ wẹ Jesu deazọ́nna nado lá wẹndagbe whlẹngán tọn?
14 To hoyidọ sọn yẹwhegán Joẹli dè, Paulu wlan dọmọ: “Yè na whlẹn mẹdepope he na ylọ oyín Oklunọ tọn gán.” Enẹgodo e yidogọ dọmọ: “Nawẹ yé na ylọ oyín mẹhe yé ma yise tọn do? Podọ nawẹ yé na yí mẹhe yé ma ko sèhó etọn gbede sè do? Podọ nawẹ yé na sè do matin yẹwhehodọtọ?” To wefọ kleun delẹ mẹ to godo mẹ, Paulu dlẹnalọdo dọ yise ma nọ wá na ede gba; kakatimọ, e nọ “wá sọn sisè mẹ,” enẹwẹ yin, “ohó Klisti tọn.”—Lomunu lẹ 10:13, 14, 17; Joẹli 2:32.
15 Mẹnu wẹ na hẹn “ohó Klisti tọn” yì kosi lẹ dè? Jesu deazọ́n enẹ na devi etọn lẹ—mẹhe ko yin pinplọn “ohó” enẹ lọ lẹ. (Matiu 24:14; 28:19, 20; Johanu 17:20) To whenuena mí tindo mahẹ to azọ́n yẹwhehodidọ Ahọluduta lọ tọn po gbẹtọ lẹ hinhẹnzun devi lẹ po mẹ, mí to nuhe apọsteli Paulu wlan pẹpẹ lọ wà, to ojlẹ ehe mẹ e yihodọ sọn Isaia mẹ dọmọ: “Nawẹ afọ yé he dọyẹwheho wẹndagbe jijọho tọn, bosọ hẹn owẹ̀n dagbe onú dagbe lẹ tọn wá yọnwhanpẹ sọ!” Yèdọ eyin mẹsusu ma tlẹ kẹalọyi wẹndagbe he mí hẹnwa, afọ mítọn lẹ gbẹsọ “yọnwhanpẹ” hlan Jehovah.—Lomunu lẹ 10:15; Isaia 52:7.
16, 17. Lẹndai awe-to-pọmẹ tẹwẹ azọ́n yẹwhehodidọ tọn mítọn nọ hẹndi?
16 Azọ́ndenamẹ ehe hinhẹndi nọ wazọ́n na lẹndai titengbe awe. Tintan, wẹndagbe lọ dona yin yẹwheho etọn dọ na oyín Jiwheyẹwhe tọn nido yin gigopana bọ mẹhe jlo whlẹngán lẹ na yọ́n fihe yé na lẹhlan. Paulu mọnukunnujẹ adà azọ́ndenamẹ lọ tọn ehe go. E dọmọ: “Na mọwẹ [Jehovah, NW] ko dọ hlan mí, dọ, Yẹn ko ze we dote nado yin hinhọ́n [kosi] lẹ tọn, na hiẹ nido tin na whlẹngán kakajẹ opodo aigba tọn.” Enẹwutu, taidi devi Klisti tọn, dopodopo mítọn dona tindo mahẹ to hinhẹn owẹ̀n whlẹngán tọn yì gbẹtọ lẹ dè mẹ.—Owalọ lẹ 13:47; Isaia 49:6.
17 Awetọ, yẹwhehodidọ wẹndagbe lọ tọn nọ ze dodonu lọ dai na whẹdida dodo Jiwheyẹwhe tọn. Gando whẹdida enẹ go, Jesu dọmọ: “Ṣigba whenuena Ovi gbẹtọ tọn na wá to gigo etọn mẹ, po angẹli lẹpo po e po, whenẹnu wẹ e na sinai to ofìn gigo etọn tọn ji. Nukọn etọn wẹ yè na bẹ akọta lẹpo pli do: e nasọ klán yé dovo sọn yenọzo go, dile lẹngbọhọtọ nọ klán lẹngbọ etọn lẹ sọn gbọgbọẹ lẹ go do.” Enẹwutu whẹdida po mẹkinklan po na yin bibasi to “whenuena Ovi gbẹtọ tọn na wá to gigo etọn mẹ,” azọ́n yẹwhehodidọ tọn to awuwlena dotẹnmẹ hundote na gbẹtọ lẹ to egbehe nado yọ́n mẹmẹsunnu gbigbọmẹ Klisti tọn lẹ bosọ gbọnmọ dali wazọ́n nado nọgodona yé na whlẹngán mavọmavọ yede tọn lẹ.—Matiu 25:31-46.
Hẹn ‘Jidenamẹ Gigọ́ Todido Tọn’ Go
18. Nawẹ mí sọgan hẹn “todido whlẹngán tọn” mítọn họnwun gbọn?
18 Mahẹ tintindo zohunhunnọ mítọn to azọ́n yẹwhehodidọ tọn mẹ sọ yin asisa de nado gọalọna mí nado hẹn todido mítọn họnwun. Paulu wlan dọmọ: “Míwlẹ sọ jlo dọ mì omẹ dopodopo ni to magbọjẹ mọtọn hunkọ sọhia jẹ yinyọnẹn he diun to todido mẹ kakajẹ opodo.” (Heblu lẹ 6:11) To whelọnu lo, mì gbọ dopodopo mítọn ni ze “todido whlẹngán tọn” dogo “taidi ogangbakun,” bo gbọnmọ dali nọ flin dọ “Jiwheyẹwhe ma dè mí na homẹgble gba, adavo nado mọ whlẹngán yí gbọn Jesu Klisti Oklunọ mítọn mẹ.” (1 Tẹsalonikanu lẹ 5:8, 9) Mì gbọ mí ni sọ yí tudohomẹnamẹ Pita tọn do ahun mẹ ga dọmọ: “Mì blá gbaja otùnu mìtọn tọn gligli, mì yin huwhẹnọ, bosọ to todo jẹ opodo na ojọmiọn he yè na hẹnwa na mì.” (1 Pita 1:13) Mẹhe wàmọ lẹpo na mọdọ “todido whlẹngán tọn” yetọn yin hinhẹndi mlẹnmlẹn!
19. Etẹwẹ mí na gbadopọnna to hosọ he bọdego mẹ?
19 To ojlẹ dopolọ mẹ, etẹwẹ dona yin pọndohlan mítọn gando ojlẹ he pò na titonu ehe go? Nawẹ mí sọgan yí ojlẹ enẹ zan nado mọ whlẹngán yí na mídelẹ po mẹdevo lẹ po gbọn? Mí na gbadopọnna kanbiọ ehelẹ to hosọ he bọdego mẹ.
Be Hiẹ Sọgan Basi Zẹẹmẹ Ya?
• Naegbọn mí dona hẹn “todido whlẹngán tọn” mítọn họnwun?
• Etẹwẹ whlẹngán bẹhẹn?
• Etẹwẹ mí dona wà nado mọ nunina whlẹngán tọn yí?
• Etẹwẹ azọ́n yẹwhehodidọ tọn mítọn nọ wadotana to kọndopọmẹ hẹ lẹndai Jiwheyẹwhe tọn?
[Kanbiọ Oplọn Tọn Lẹ]
[Yẹdide to weda 10]
Whlẹngán zẹẹmẹdo hugan yinyin whinwhlẹngán sọn vasudo mẹ poun