Gitantlem Git 7:1-13

  • Raza (1-9a)

    • ‘Tum kitlem mhunn borem, mogachea cheddva’ (6)

  • Tornattem cheddum (9b-13)

    • “Hanv mhojea mogiachem, ani to mhaka axeta” (10)

7  “Borea sobhavache dhuve,Tujea zoteamnim tuje paim kitle sobit! Tujea zangllancho akar sorpolle bhaxen,Ji eka kolakaran aplea hatamnim toiar kelea.  2  Tuji bombli ek pelo zaun asa. Tantunt drakxancho soro* kednanch unno zaina zaum. Tujem pott gonvanchi ek ras,Zachea bhonvtonnim fulam* asat.  3  Tujim don horddim* horonnachea* don poram* bhaxen asat,Chitollachea* zunvlleam bhaxen asat.  4  Tuji man hotʼtinchea dantam thaun kelʼlea gopura bhaxen, Tuje dolle Heshbonachea tolleam bhaxen,Jim Bath-rabimachea darvonttea lagim asat. Tujem nak Lebanonachea gopura bhaxen,Jem Damaska vatten polloita.  5  Tujea toklechi sobitkai Karmel Dongra bhaxen,Ani tuje kongre kens* zambllea vula bhaxen. Varean ubtole tuje kens razak piso kortat.*  6  Tum kitlem mhunn sobit ani kitlem mhunn borem,Tunch mhojea kallzak khub khuxalkai haddtta, mogachea cheddva!  7  Tuji kudd khazurachea zhadda* bhaxen,Ani tujim horddim* khazurachea ghonsam bhaxen.  8  Hanvem mhunnttlem, ‘Hanv follam kaddunk,Khazurachea zhaddacher choddttolom.’ Tujim horddim* drakxanchea ghonsam bhaxen zaum,Tuzo svas apolachea pormolla bhaxen zaum,  9  Ani tujem tondd samkea borea drakxanchea sorea bhaxen zaum.” “Ho drakxancho soro mhojea mogiachea vonttam voilean suddsuddaien denvom,Zaka lagon bori nhid poddtta. 10  Hanv mhojea mogiachem,Ani to mhaka axeta. 11  Mhojea moga, ieo,Ami bhair xetant ia,Mhendichea* zhaddam modem ami ravom-ia. 12  Ami sokallim fuddem utthom-ia ani drakxanchea molleant ia,Drakxanche valik kombreo aileat kai,Teo fulʼleat kai,Dallimachea zhaddak kolle aileat kai mhunn ami pollounk thoim ia. Thoim hanv tuzo kitlo mog kortam tem tuka dakhoitolem. 13  Dudha-follam* aplo pormoll posraitat,Amchea daram lagim soglea torechim borim-borim follam asat. Mhojea moga, hanvem tajim toxench sukoilolim* follam,Tujea pasot samballun dovorleant.

Footnotes

^ Vo “mosale aslolo drakxancho soro.”
^ Vo “lily.”
^ Inglez bhaxent “breasts.”
^ Vo “mervachea.”
^ Inglez bhaxent “fawn.”
^ Horonnachi ek zat. Inglez bhaxent “gazelle.”
^ Utran utor, “tuji tokli.”
^ Vo “Varear ubtolea tujea kensamnim razak koidi kela.”
^ Hem oslem ek khazurachem zhadd jem Palestinant zata.
^ Inglez bhaxent “breasts.”
^ Inglez bhaxent “breasts.”
^ Utran utor, “Henʼnachea.”
^ Hem oslem foll jem khailear bhurgim zaunk modot zatoli mhunn bailo chintʼtalim. Inglez bhaxent “mandrakes.”
^ Utran utor, “adlim.”