Por que é importante

1. Que cualidade de Deus se destaca especialmente no libro de Oseas, e que exemplo usa Xehová?

 QUE clase de gobernante é Xehová? Ama de verdade as persoas e interésase polos seus servos? Por suposto que si! O libro de Oseas confirma esta resposta destacando unha das cualidades de Xehová: a misericordia. Xehová usa a relación de Oseas coa súa muller infiel para explicar que está disposto a mostrar misericordia incluso antes de que alguén dea algún sinal de que está arrepentido (3:1). Xehová non puido escoller un exemplo mellor. Queda claro que amou “de boa gana” o seu pobo aínda que era rebelde (14:1-4).

2. Que máis nos ensina o libro de Oseas sobre Xehová?

² A través do libro de Oseas, Xehová tamén demostra outros aspectos da súa personalidade, como a súa lealdade e paciencia (2:19, 20). Aínda que os israelitas abandonaron a Xehová unha e outra vez para adorar outros deuses, Xehová seguiunos acollendo “con brazos de amor” (11:1-4). Aínda así, a paciencia de Xehová ten límites e non vai tolerar que a maldade dure para sempre (10:9-12). Xehová odia a hipocrisía. Por iso, se queremos que estea contento coa nosa adoración temos que servilo por amor (6:4, 6; 10:1, 2).

3. Que importante lección aprendemos no libro de Oseas?

³ A través do libro de Oseas, Xehová ensínanos unha lección importante: seguir a súa guía sempre é o mellor para nós (14:9). O pobo de Israel a pensou que lle iría mellor se poñía a súa confianza noutras nacións e nos seus deuses (7:11; 9:10; 12:1). Pero aquelas nacións estaban a punto de traizoalos e os seus deuses non terían poder para axudarlles (8:8, 9; 10:5). Pola contra, Xehová sempre coidou deles e prometeulles que os bendiciría se o obedecían (2:8, 18).

4. Por que é importante para os cristiáns o libro de Oseas?

⁴ O libro de Oseas foi moi valioso para os cristiáns do primeiro século e tamén o é para nós. Nas Escrituras Gregas Cristiás vemos que Xesús e outros discípulos citaron deste libro. Oseas tamén inclúe profecías que xa se cumpriron (mira o  recadro 28-A). Por exemplo, referíndose ó Mesías, Xehová profetizou: “Chamei o meu fillo para que saíse de Exipto” (11:1). Isto cumpriuse cando os pais de Xesús fuxiron con el a Exipto e regresaron a Israel trala morte de Herodes (Mt 2:14, 15). O apóstolo Paulo explicou que algunhas profecías de Oseas indicaban que persoas que non eran israelitas tamén servirían a Xehová e serían chamadas “fillos do Deus vivo” (1:10; 2:23). Grazas a iso, poderían reinar con Cristo (Rm 9:25, 26; compara con 1Pe 2:9, 10).

O que debes saber sobre este libro

5. Que sabemos do profeta Oseas?

⁵ Escritor: O nome de Oseas é unha forma abreviada de Osaías, que significa “salvado por Xah” ou “Xah salvou” (1:1, nota). Foi profeta principalmente en Israel, o reino do norte, aínda que algunhas das súas profecías estaban dirixidas a Xudá, o reino do sur. Serviu de profeta como mínimo durante 59 anos, dende polo menos o 804 a. n. e. ata despois do 745 a. n. e. Probablemente terminou de escribir o seu libro entre os anos 745 e 740 a. n. e. b O seu labor coincidiu co de Amós e Oded, que tamén profetizaron en Israel, e co de Isaías e Miqueas, que o fixeron en Xudá.

6. Cal era a situación en Israel no tempo de Oseas?

⁶ Contexto: Oseas cumpriu fielmente co seu labor durante décadas, a pesar da difícil situación espiritual e política que había en Israel. Cando empezou a profetizar, o malvado rei Xeroboán II reinaba no país. A pesar diso, a nación gañou moitas batallas e desfrutaba de prosperidade material (2Re 14:24-28). Pero os israelitas abandonaron por completo a Xehová e atribuíronlle tódolos seus éxitos a Baal. Como parte da adoración a este deus falso, emborrachábanse e tiñan relacións sexuais con prostitutas de templo (4:11-13). Despois da morte de Xeroboán, Israel pasou por unha época de inestabilidade política, chea de conspiracións e asasinatos (2Re 15:8-20). Os reis que gobernaron despois trataron de facer alianzas con Exipto e Asiria, pero ningún deses reis confiou en Xehová.

7. Que lles dixo Xehová ós israelitas a través de Oseas?

⁷ A través de Oseas, Xehová presentou o seu caso legal contra Israel. Enumerou tódolos pecados da nación e explicoulles as consecuencias que sufrirían (4:1, 2, 9). Aínda así, Xehová recordoulles que é misericordioso e que está disposto a perdoar. Esta foi a última oportunidade que lles deu para volver a el antes de permitir que Asiria conquistase Samaria e tomase o control da nación.

8. Que podemos dicir sobre o estilo do libro de Oseas?

⁸ Outros datos: A maior parte do libro de Oseas está escrito nun estilo poético e usa moitas figuras retóricas impactantes (4:16; 5:13, 14; 6:3, 4). No libro pódense ver as fortes expresións de condena que Xehová usou para corrixir os israelitas e, ó mesmo tempo, a tenrura coa que lles suplicou que se arrepentisen (10:1; 14:1, 2).

Contido do libro

9. Que lle pediu Xehová a Oseas para representar a súa misericordia?

⁹ Xehová usa o exemplo de Oseas e a súa muller infiel para explicar a misericordia que lles ten ós israelitas (1:1–3:5). Xehová dille a Oseas que case cunha muller que se prostituirá (1:2). Oseas casa con Gómer e teñen un fillo xuntos. Ela ten dous fillos máis, pero ó parecer non son fillos del. c Os significados dos nomes destes tres nenos revelan que Xehová xulgará e rexeitará Israel. No capítulo 2, Xehová predí que despois de castigar os israelitas, perdoaraos e bendiciraos. Para representar ata que punto estaba disposto a perdoar a Israel, Xehová pídelle a Oseas que volva coa súa muller adúltera (3:1).

10, 11. Por que se enfadou Xehová cos israelitas?

¹⁰ Xehová profetiza que castigará os israelitas (4:1–13:16). Oseas presenta o caso legal de Xehová contra Israel e enumera a gran cantidade de pecados que cometeu a nación (4:1, 2). Tamén menciona os pecados de Xudá (5:5). Oseas anima a nación de Israel a que volva a Xehová, pero Israel busca axuda noutras nacións (6:1; 7:11). Israel recollerá as consecuencias do que sementou (8:7-10). Xehová castigará e rechazará a nación (9:17; 10:15).

¹¹ Xehová recórdalles ós israelitas o amor que sempre lles mostrou (11:1-3). Pero eles nunca lle corresponderon da mesma maneira (11:7; 12:1). Son culpables de rebelarse unha e outra vez, e a súa capital, Samaria, caerá (13:16).

12. Que lle promete Xehová ó seu pobo se volve a el?

¹² Último intento para que volvan a Xehová (14:1-9). Xehová anima os israelitas a que volvan a el. Se o fan, promete que lles terá misericordia e lles mostrará o seu amor.