Témwen a Jéova vlé édé fanmi a yo men yo vlé édé osi tout fanmi ki alantou a yo vin pli fò. Sé Bondyé ki kréyé lafanmi, é nou ni onlo rèspé pou-y parapòt a sa (Jénèz 2:21-24 ; Éfézyen 3:14, 15). Grasa Labib, i ka ba moun-mayé ki ka viv toupatou si latè sèwten prensip ki ka édé-yo rété soudé é ki ka fè-yo ni tchè-kontan.

Ka Témwen a Jéova ka fè pou édé sé fanmi-la vin pli fò ?

 Nou ka fè tousa nou pé pou apliké konsèy a Labib pas yo ka édé-nou vin dé pibon mari, dé pibon madanm é dé méyè paran (Pwovèb 31:10-31 ; Éfézyen 5:22–6:4 ; 1 Timoté 5:8). Sé prensip-la ki an Bib-la plen sajès, kifè toutmoun adan fanmi-la pé ni tchè-kontan, menmsi yo pa adan menm rèlijyon-la (1 Pyè 3:1, 2). Ni moun ki pa Témwen a Jéova é ki mayé èvè on moun ki vin Témwen a Jéova plita. Mi sa yo ka di :

•   « Pannan sé 6 prèmyè lanné-la nou viv ansanm, nou té toujou an chiraj é yonn té ka désèvwa lòt toutlè. Lèwvwè Ivete vin Témwen a Jéova, i vin pli dous é i vin ni onlo pasyans. Sé chanjman-la i fè la sové mayé an nou » (Clauir, Brézil).

•   « Lèwvwè mari an mwen, Chansa, koumansé étidyé Labib èvè sé Témwen a Jéova la, an pa té dakò èvè sa menm, pas an té ka kwè sé dézòd yo té ka mèt adan fanmi a moun. Men anfinaldikont, an konstaté kè Labib édé-nou adan mayé an nou » (Agness, Zanbi).

 Lè nou ka préché, nou ka montré pwochen an nou kè konsèy a Labib plen sajès é kè si on moun ka apliké-yo, sa pé édé-y :

•   Chwazi on mari oben on madanm évè sajès

•   Fasadé èvè prèmyè lanné a mayé a-y

•   Antann-li byen èvè bèlmè a-y é bopè a-y

•   Jéré lajan a-y

•   Arété fè kòlè

•   Aprann padonné

•   Lévé timoun a-y

Lè mari a-w oben madanm a-w ka chanjé rèlijyon, ès sa ka mété pwoblèm adan mayé a-w ?

 Sé vré kè dépawfwa, sa pé rivé adan on fanmi. Pa ègzanp, an 1998, on antrèpriz ki ka fè rèchèch non a-y sé Sofres pibliyé on étid asi sa. Étid-lasa montré kè asi 20 mayé, ni yonn ki jwenn pwoblèm davwa mari-la oben madanm-la chanjé rèlijyon pou vin Témwen a Jéova.

 Jézi té anonsé kè dépawfwa moun ki té’é suiv ansègnman a-y té’é trapé pwoblèm adan fanmi a yo (Matyé 10:32-36). Will Durant, on èspésyalis a Listwa, fè on komantè asi sa yo té ka rèpwoché sé krétyen-la anba gouvènman women la. Mi sa i maké : « Sèlon sa moun té ka di, sé krétyen-la té ka détwi sé fanmi-la a. » Sé menm biten yo ka di asi sèwten Témwen a Jéova jòdijou. Men ès sa vlé di kè si ni dézòd an fanmi-la, sé akòz dè moun-la ki Témwen a Jéova la ?

 Konm ni moun ki té ka akizé sé Témwen a Jéova la dè détwi sé fanmi-la, tribinal-la yo ka kriyé Cour européenne des droits de l’homme té ni on désizyon a pran anrapò èvè sa. I di kè souvantfwa, sé sila ki pa Témwen a Jéova la ki ka mèt dézòd an fanmi-la. Pou ki rézon ? Pas i vé pa kè « fanmi a-y ki Témwen suiv sa rèlijyon a-y ka anségné-y é i vé pa kè i menné vi a-y dapré kwayans a-y nonplis, alòskè i andwa fè sa ». Mi sa i ka di osi : « Adan on fanmi, dèstan sé moun-la pa ni menm rèlijyon-la, yo ka jwenn sitiyasyon-lasa. Sé sa ki ka fèt pou sé Témwen a Jéova la osi b. » Menmsi ni moun ki pa ka rèspèkté rèlijyon a yo,Témwen a Jéova ka fè tousa yo pé pou suiv konsèy-lasa, kè nou ka touvé adan Labib :« Lè on moun fè-w ditò, pa fè-y ditò. [...] Si sa posib, dépi ou pé, viv byen èvè toutmoun » (Women 12:17, 18).

Poukwa Témwen a Jéova ka di kè fò yo mayé sèlman èvè Témwen a Jéova kon yo ?

 Sé Témwen-la ka suiv on komandman a Labib ki ka di mayé « sèlman [...] èvè on disip a Ségnè-la », kivédi èvè on moun ki ni menm fwa ki yo (1 Korentyen 7:39). Non sèlman lòd-lasa ka vin dè Labib men anplisdisa sa ka bay bon rézilta lè ou ka suiv-li. Pa ègzanp, dapré on awtik ki sòti an 2010 adan Journal of Marriage and Family, « lè dé moun-mayé ni menm rèlijyon-la, lè yo ka viv menmjan-la é yo ka kwè adan menm biten-la c », pli souvan ki rarman, yo ka antann-yo pibyen.

 Men a pa paskè on Témwen mayé évè on moun ki pa Témwen a Jéova kè fò i kité-y. Témwen a Jéova pa ka ankourajé sa ditou. Dayè, Labib ka di : « Si on frè ni on madanm ki pa ka kwè an Bondyé, men madanm a-y dakò pou rété èvè-y, fò pa i kité madanm a-y ; é si on madanm ni on mari ki pa ka kwè an Bondyé é mari a-y dakò pou rété èvè-y, fò pa i kité mari a-y » (1 Korentyen 7:12, 13). Témwen a Jéova ka suiv lòd-lasa.