AFII lɛ baho, eko nyiɛ eko sɛɛ—afii 10, afii 20, afii 30, afii 39! Ni Israelbii lɛ kã he amɛyɛ ŋa lɛ nɔ lolo. Shi afii nɛɛ amli fɛɛ lɛ, Yehowa kwɛɔ ewebii lɛ anɔ. Ekɛ mana lɛɔ amɛ. Ekɛ atatu nyiɛɔ amɛhiɛ yɛ shwane mli, ni gbɛkɛ lɛ ekɛ la nyiɛɔ amɛhiɛ. Ni afii babaoo nɛɛ mli fɛɛ lɛ, amɛtadei lɛ tsɛrɛɛɛ ni amɛnaji hu waaa amɛhe.

Agbɛnɛ afi ni ji 40 kɛjɛ be mli ni amɛshi Mizraim lɛ mli nyɔŋ ni ji klɛŋklɛŋ nɔ lɛ nɛ. Israelbii lɛ ebabua amɛhe naa ekoŋŋ yɛ Kadesh. Biɛ ji he ni amɛyɔɔ ni atsu maŋ shikpálɔi 12 lɛ koni amɛyasara Kanaan shikpɔŋ lɛ nɔ aaafee afii 40 ni eho nɛ lɛ. Mose nyɛmi yoo Miriam gbo yɛ Kadesh. Ni tamɔ bɔ ni eba lɛ yɛ be ko ni eho lɛ, sane ba yɛ biɛ ekoŋŋ.

Gbɔmɛi lɛ naaa nu ko nu ko. No hewɔ lɛ amɛwie huhuuhu amɛwo Mose akɛ: ‘Wɔna ni kulɛ wɔgboi. Mɛni hewɔ ni nyɛjie wɔ kɛjɛ Mizraim kɛba biɛ nɛɛ ni ehiii nɔ ko dumɔ nɛɛ? Niyenii, loo agbami tso, loo wein tso, loo akutu tso ko bɛ biɛ. Nu ni anuɔ tete po bɛ.’

Beni Mose kɛ Aaron tee kpee buu lɛ mli ni amɛyasɔle lɛ, Yehowa kɛɛ Mose akɛ: ‘Buamɔ gbɔmɛi lɛ anaa. No sɛɛ lɛ okɛ nakai tɛsaa ni yɔɔ jɛmɛ lɛ awie yɛ amɛ fɛɛ amɛhiɛ. Nu pii baajɛ mli aba kɛha gbɔmɛi lɛ kɛ amɛkooloi lɛ fɛɛ.’

No hewɔ lɛ Mose bua gbɔmɛi lɛ anaa, ni ekɛɛ amɛ akɛ: ‘Nyɛboa toi, nyɛ mɛi ni nyɛkɛ nyɛhiɛ efɔɔɔ Nyɔŋmɔ nɔ! Ani Aaron kɛ mi baanyɛ ni wɔna nu kɛjɛ nɛkɛ tɛsaa nɛɛ mli wɔha nyɛ?’ Kɛkɛ ni Mose kɛ etso lɛ tswa tɛsaa lɛ shii enyɔ, ni nu babaoo tue kɛjɛ tɛsaa lɛ mli eshwie shi. Aná nu ni fa pii kɛha gbɔmɛi lɛ kɛ kooloi lɛ fɛɛ.

Shi Yehowa mli fu Mose kɛ Aaron. Ani ole nɔ hewɔ? Nɔ hewɔ ji akɛ, Mose kɛ Aaron kɛɛ akɛ amɛ ji mɛi ni baajie nu lɛ kɛjɛ tɛsaa lɛ mli. Shi Yehowa ji mɔ diɛŋtsɛ ni fee. Ni akɛni Mose kɛ Aaron ewieee anɔkwale yɛ enɛ he hewɔ lɛ, Yehowa kɛɛ akɛ ebaagbala amɛtoi. Ekɛɛ akɛ: ‘Nyɛnyiɛŋ miwebii lɛ ahiɛ kɛyaŋ Kanaan.’

Etsɛɛɛ kɛkɛ ni Israelbii lɛ shi Kadesh. No sɛɛ be fioo lɛ, amɛbashɛ Hor Gɔŋ lɛ he. Gɔŋ lɛ yiteŋ biɛ ji he ni Aaron gbo yɛ. Beni egbo lɛ no mli lɛ eye afii 123. Israelbii lɛ ye awerɛho waa, ni gbɔmɛi lɛ fɛɛ kɛ gbii 30 sɔŋŋ fó Aaron. Ebinuu Eleazar baye esɛɛ akɛ osɔfonukpa kɛha Israel maŋ lɛ.