Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 SANE 91

Yesu Tsɔɔ Nii Yɛ Gɔŋ Ko Nɔ

Yesu Tsɔɔ Nii Yɛ Gɔŋ Ko Nɔ

KWƐMƆ Yesu ni ta shi yɛ biɛ lɛ. Eetsɔɔ gbɔmɛi nɛɛ fɛɛ nii yɛ gɔŋ ko nɔ yɛ Galilea. Mɛi ni tara emasɛi kpaakpa lɛ ji ekaselɔi lɛ. Ehala amɛteŋ mɛi 12 akɛ bɔfoi. Yesu kaselɔi krɛdɛɛi ji bɔfoi lɛ. Ani ole amɛgbɛi?

Simon Petro yɛ mli, kɛ enyɛmi nuu Andrea. Agbɛnɛ hu Yakobo kɛ Yohane fata he, ni nyɛmimɛi ji amɛ hu. Atsɛɔ bɔfo kroko ko hu akɛ Yakobo, ni atsɛɔ mɔ kroko hu akɛ Simon. Atsɛɔ bɔfoi lɛ ateŋ mɛi enyɔ akɛ Yuda. Mɔ kome ji Yuda Iskariot, ni akɛ gbɛi Tadeo lɛ hu tsɛɔ Yuda kroko lɛ. Agbɛnɛ hu Filipo kɛ Natanael (ni atsɛɔ lɛ akɛ Bartolomeo) hu yɛ, kɛ Mateo kɛ Toma.

Beni amɛku amɛsɛɛ kɛjɛ Samaria lɛ, Yesu je shishi ni eshiɛ klɛŋklɛŋ kwraa akɛ: ‘Ŋwɛi maŋtsɛyeli lɛ eshɛ shi eta.’ Ani ole nɔ ni nakai maŋtsɛyeli lɛ ji? Eji Nyɔŋmɔ nɔyeli diɛŋtsɛ. Yesu ji enɔ maŋtsɛ. Ebaaye maŋtsɛ kɛbaajɛ ŋwɛi ni ekɛ toiŋjɔlɛ baaba shikpɔŋ lɛ nɔ. Nyɔŋmɔ maŋtsɛyeli lɛ baafee shikpɔŋ muu lɛ fɛɛ paradeiso fɛfɛo.

Yesu miitsɔɔ gbɔmɛi lɛ nibii ni kɔɔ maŋtsɛyeli lɛ he yɛ biɛ. Eetsɔɔ amɛ akɛ: ‘Nyɛsɔlea nɛkɛ: Wɔ-Tsɛ ni yɔɔ ŋwɛi, ha ogbɛi lɛ he atse. Ha omaŋtsɛyeli lɛ aba. Ha afee nɔ ni osumɔɔ yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.’ Mɛi pii tsɛɔ enɛ akɛ ‘Nuŋtsɔ lɛ Sɔlemɔ Lɛ.’ Mɛi krokomɛi tsɛɔ lɛ ‘Wɔ-Tsɛ ni Yɔɔ Ŋwɛi.’ Ani obaanyɛ okɛɛ sɔlemɔ muu lɛ fɛɛ?

Yesu miitsɔɔ gbɔmɛi lɛ hu bɔ ni esa akɛ amɛkɛ amɛhe ahi shi aha. Ekɛɛ akɛ: ‘Nɔ fɛɛ nɔ ni osumɔɔ ni mɛi krokomɛi afee aha bo lɛ, bo hu feemɔ nakai oha amɛ.’ Kɛ mɛi krokomɛi kɛ bo ye yɛ mlihilɛ mli lɛ, ani osumɔɔɔ? No hewɔ lɛ, Yesu miikɛɛ akɛ, wɔkɛ mɛi krokomɛi aye yɛ mlihilɛ mli. Ani efeŋ nɔ ni yɔɔ naakpɛɛ akɛ mɔ fɛɛ mɔ aaafee enɛ yɛ paradeiso shikpɔŋ lɛ nɔ?