Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 SANE 42

Teji Ko Wie

Teji Ko Wie

ANI onu ni teji miiwie pɛŋ? Ekolɛ obaakɛɛ ‘dabi, kooloi nyɛɛɛ awie.’ Shi Biblia lɛ wieɔ teji ko ni nyɛ ewie lɛ he. Nyɛhaa wɔkwɛa bɔ ni fee ni enyɛ eba lɛ nakai.

Agbɛnɛ Israelbii lɛ efee klalo akɛ amɛbaaya Kanaan shikpɔŋ lɛ nɔ. Moabbii amaŋtsɛ Balak miishe Israelbii lɛ gbeyei. No hewɔ lɛ etsu koni ayatsɛ nuu ko ni le ŋaa, ni atsɛɔ lɛ Bileam lɛ kɛba koni ebalomɔ Israelbii lɛ. Balak kɛɛ ebaaha Bileam shika pii, no hewɔ lɛ Bileam ho eta eteji lɛ nɔ ni eyi gbɛ kɛmiiba ni ebana Balak.

Yehowa sumɔɔɔ ni Bileam abalomɔ E-webii lɛ. No hewɔ lɛ etsu bɔfo ko ni hiɛ klante kakadaŋŋ ko koni ebadamɔ gbɛ lɛ teŋ ni etsĩ Bileam gbɛ. Bileam enaaa bɔfo lɛ, shi eteji lɛ miina lɛ. No hewɔ lɛ, teji lɛ bɔ mɔdɛŋ koni etsi ehe kɛjɛ bɔfo lɛ he, ni yɛ naagbee lɛ ebu shi yɛ gbɛ lɛ nɔ. Bileam mli fu waa, ni ekɛ tso yi eteji lɛ.

Kɛkɛ ni Yehowa ha Bileam nu nɔ ni eteji lɛ kɛ lɛ wieɔ lɛ. Teji lɛ bi lɛ akɛ: ‘Mɛni mifee bo ni oyiɔ mi nɛkɛ?’

Bileam kɛɛ akɛ: ‘Oha mitsɔ tamɔ buuluu. Eji mihiɛ klante kulɛ, mibagbe bo!’

Teji lɛ bi lɛ akɛ: ‘Ani mifee bo nɛkɛ dã?’

Bileam ha hetoo akɛ: ‘Dabi.’

Kɛkɛ ni Yehowa ha Bileam na bɔfo lɛ ni kɛ klante damɔ gbɛ lɛ nɔ lɛ. Ni bɔfo lɛ kɛɛ akɛ: ‘Mɛni hewɔ ni oyi oteji lɛ? Miba koni mibatsĩ bo gbɛ, ejaakɛ esaaa akɛ oyaa ni oyalomɔɔ Israel. Eji oteji lɛ tsiii ehe kɛjɛɛɛ mihe kulɛ, mibatswa bo nii ni magbe bo, shi mifeŋ oteji lɛ nɔ ko.’

Bileam kɛɛ akɛ: ‘Mifee esha. Mileee akɛ odamɔ gbɛ lɛ nɔ.’ Bɔfo lɛ ŋmɛ Bileam gbɛ akɛ eya, ni Bileam tee ni eyana Balak. Ebɔ mɔdɛŋ lolo akɛ ebaalomɔ Israel, shi, yɛ no najiaŋ moŋ lɛ, Yehowa ha ejɔɔ Israel shii etɛ sɔŋŋ.