Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 SANE 115

Paradeiso Hee Ko Yɛ Shikpɔŋ Nɔ

Paradeiso Hee Ko Yɛ Shikpɔŋ Nɔ

KWƐMƆ nakai tsei kakadaji, kɛ fɔfɔii fɛfɛji kɛ gɔji ni kwɔlɔ lɛ. Ani biɛ bɛ fɛo? Kwɛmɔ bɔ ni adowa lɛ yeɔ nii yɛ gbekɛ bibioo lɛ dɛŋ lɛ. Ni kwɛmɔ jatai kɛ okpɔŋɔi ni damɔ shi yɛ he ni amɛyeɔ nii yɛ lɛ. Ani osumɔŋ ni ohi shi yɛ shia ni yɔɔ he ko ni tamɔ nɛkɛ mli?

Nyɔŋmɔ miitao ni ohi shi kɛya naanɔ yɛ shikpɔŋ nɔ yɛ paradeiso mli. Ni etaooo ni ona piŋmɔi kɛ amanehului ni gbɔmɛi naa ŋmɛnɛ lɛ eko. Enɛ ji shiwoo ni Biblia lɛ kɛhaa mɛi fɛɛ ni baahi shi yɛ paradeiso hee lɛ mli lɛ: ‘Nyɔŋmɔ kɛ amɛ aaahi shi. Ni gbele aloo yaafo loo piŋmɔ ko bɛ dɔŋŋ. Tsutsu nibii lɛ eho etee.’

Yesu baakwɛ koni nɛkɛ tsakemɔ ni yɔɔ naakpɛɛ nɛɛ aba mli. Ani ole be ni ebaafee? Hɛɛ, ebaafee yɛ be mli ni etsuu shikpɔŋ nɛɛ he kɛjɛ efɔŋfeemɔ kɛ efɔŋfeelɔi fɛɛ ahe lɛ. Kaimɔ akɛ, beni Yesu yɔɔ shikpɔŋ nɔ lɛ, etsá gbɔmɛi ni yeɔ helai srɔtoi fɛɛ, ni etee gbɔmɛi ashi kɛjɛ gbohii ateŋ po. Yesu fee enɛ koni ekɛtsɔɔ nɔ ni ebaafee yɛ shikpɔŋ muu lɛ fɛɛ nɔ beni ébatsɔ̃ Nyɔŋmɔ maŋtsɛyeli lɛ nɔ Maŋtsɛ lɛ.

Bo lɛ susumɔ bɔ ni nibii baafee naakpɛɛ yɛ paradeiso hee lɛ mli yɛ shikpɔŋ nɔ lɛ he okwɛ! Yesu, kɛ mɛi ni ehala lɛ ateŋ mɛi komɛi baaye maŋtsɛ yɛ ŋwɛi. Nɛkɛ nɔyelɔi nɛɛ baakwɛ mɔ fɛɛ mɔ nɔ yɛ shikpɔŋ nɛɛ nɔ koni amɛkwɛ ni mɔ fɛɛ mɔ ana miishɛɛ. Nyɛhaa wɔkwɛa nɔ ni ehe hiaa ni wɔfee, bɔni afee ni wɔna nɔmimaa akɛ Nyɔŋmɔ baaha wɔ naanɔ wala yɛ eparadeiso hee lɛ mli.