4 Mose 20:1-29

  • Miriam gbo yɛ Kadesh (1)

  • Mose kɛ tso tswa tɛsaa lɛ, efee esha (2-13)

  • Edom hãaa Israel aho (14-21)

  • Aaron gbele (22-29)

20  Yɛ klɛŋklɛŋ nyɔɔŋ lɛ mli lɛ, Israel maŋ muu lɛ fɛɛ ba Zin ŋa lɛ nɔ, ni maŋ lɛ bahi Kadesh.+ Jɛmɛ Miriam+ gbo yɛ, ni jɛmɛ afu lɛ yɛ.  Agbɛnɛ, nu bɛ kɛhã maŋ lɛ,+ ni amɛbua amɛhe naa amɛwo Mose kɛ Aaron.  Maŋ lɛ kɛ Mose bé+ amɛkɛɛ: “Wɔná kulɛ wɔ hu wɔgboi be ni wɔnyɛmimɛi lɛ gboi yɛ Yehowa hiɛ lɛ!  Mɛni hewɔ nyɛkɛ Yehowa asafo lɛ eba ŋa nɛɛ nɔ koni wɔ kɛ wɔkooloi lɛ abagboi yɛ biɛ lɛ?+  Ni mɛni hewɔ nyɛnyiɛ wɔhiɛ kɛshi* Ejipt ni nyɛkɛ wɔ eba he fɔŋ nɛɛ?+ Ejeee he ko ni hi kɛhã nidumɔ kɛ agbami tsei kɛ wain tsei kɛ pomegranet tsei, ni nu hu bɛ ni abaanu.”+  Ni Mose kɛ Aaron je asafo lɛ hiɛ kɛba kpee buu lɛ shinaa lɛ naa, ni amɛkɛ amɛhiɛ bumɔ shi, ni Yehowa anunyam lɛ pue yɛ amɛnɔ.+  Ni Yehowa kɛɛ Mose akɛ:  “Kɔ tso lɛ ní obua maŋbii lɛ anaa, bo kɛ onyɛmi nuu Aaron, ní okɛ tɛsaa lɛ awie yɛ amɛhiɛ koni ejie enu lɛ ehã, ni ojie nu kɛjɛ tɛsaa lɛ mli ohã amɛ, ni ohã maŋbii lɛ kɛ amɛkooloi lɛ nu amɛnu.”+  No hewɔ lɛ, Mose kɔ tso lɛ kɛjɛ Yehowa hiɛ,+ tamɔ bɔ ni efã lɛ lɛ pɛpɛɛpɛ. 10  Ni Mose kɛ Aaron bua asafo lɛ naa yɛ tɛsaa lɛ hiɛ, ni ekɛɛ amɛ akɛ: “Agbɛnɛ, nyɛboa toi, nyɛ atuatselɔi! Ani nyɛmiitao wɔjie nu yɛ tɛsaa nɛɛ mli wɔhã nyɛ?”+ 11  Kɛkɛ ni Mose wó enine nɔ kɛtee ŋwɛi ni ekɛ etso lɛ tswa tɛsaa lɛ shii enyɔ, ni nu babaoo tue, ni maŋbii lɛ kɛ amɛkooloi lɛ bɔi numɔ.+ 12  Sɛɛ mli lɛ, Yehowa kɛɛ Mose kɛ Aaron akɛ: “Akɛni nyɛheee minɔ nyɛyeee,* ni nyɛfeee mi krɔŋkrɔŋ yɛ Israelbii lɛ ahiɛ hewɔ lɛ, nyɛkɛ asafo nɛɛ eyaŋ shikpɔŋ ni mikɛbaahã amɛ lɛ nɔ.”+ 13  Enɛ ji Meriba* nui lɛ,+ he ni Israelbii lɛ kɛ Yehowa bé yɛ, ní no hewɔ lɛ afee lɛ krɔŋkrɔŋ yɛ amɛteŋ lɛ. 14  Ni Mose tsu mɛi kɛjɛ Kadesh kɛtee Edom maŋtsɛ lɛ ŋɔɔ+ akɛ: “Nɔ ni onyɛmi nuu Israel+ kɛɛ nɛ, ‘Bo diɛŋtsɛ ole shihilɛi ni mli wawai fɛɛ ni wɔtsɔmɔ mli lɛ. 15  Wɔtsɛmɛi lɛ tee Ejipt,+ ni wɔhi Ejipt afii* pii,+ ni Ejiptbii lɛ fee wɔ kɛ wɔtsɛmɛi lɛ niseniianii.+ 16  Naagbee lɛ, wɔbolɔ wɔtsɛ Yehowa,+ ni enu wɔgbee, ni etsu ŋwɛibɔfo+ ko ni ebajie wɔ kɛje Ejipt, ni amrɔ nɛɛ wɔyɛ Kadesh, ni ji maŋ ko ni yɔɔ oshikpɔŋ lɛ husu lɛ naa lɛ. 17  Ofainɛ, hã wɔtsɔ oshikpɔŋ lɛ nɔ kɛho. Wɔtsɔŋ ŋmɔ ko loo wain ŋmɔ ko mli, ni wɔnuŋ nubu ko nubu ko mli nu. Wɔbaanyiɛ Maŋtsɛ Gbɛjegbɛ lɛ nɔ kɛkɛ, ni wɔgbáŋ ninejurɔ loo abɛku kɛyashi be ni wɔbaatsɔ oshikpɔŋ lɛ nɔ kɛho.’”+ 18  Shi Edom kɛɛ lɛ akɛ: “Kaabatsɔ wɔshikpɔŋ lɛ nɔ kɛho. Kɛ́ oleee be ni obatsɔ biɛ lɛ, mikɛ klante baaje kpo kɛbanina bo.” 19  Ni Israelbii lɛ hu kɛɛ lɛ akɛ: “Gbɛjegbɛ lɛ nɔ kɛkɛ wɔbaatsɔ,* ni kɛ́ wɔ loo wɔkooloi lɛ nu onu lɛ eko lɛ, wɔbaawo he nyɔmɔ.+ Wɔtaooo nɔ ko nɔ ko, fe akɛ wɔbaanyiɛ wɔnane nɔ kɛho kɛkɛ.”+ 20  Fɛɛ sɛɛ lɛ, ekɛɛ: “Kaabatsɔ biɛ kɛho.”+ Kɛkɛ ni Edom kɛ mɛi babaoo kɛ asraafoi* ni he wala je kpo kɛbanina lɛ. 21  No hewɔ lɛ, Edom ekpɛlɛɛɛ ni Israel atsɔ eshikpɔŋ lɛ nɔ kɛho; enɛ hewɔ lɛ, Israel tsɔ ehe kɛje eŋɔɔ etee.+ 22  Israelbii lɛ, ni ji maŋ muu lɛ fɛɛ, fã kɛshi Kadesh ni amɛba Hor Gɔŋ lɛ he.+ 23  Ni Yehowa kɛɛ Mose kɛ Aaron yɛ Hor Gɔŋ lɛ he, yɛ Edom shikpɔŋ lɛ husu lɛ naa akɛ: 24  “Abaafu Aaron tamɔ afu etsɛmɛi lɛ.*+ Eyaŋ shikpɔŋ ni mikɛbaahã Israelbii lɛ nɔ, ejaakɛ nyɛyi enyɔ lɛ fɛɛ nyɛtse famɔ ni mikɛhã yɛ Meriba nui lɛ ahe lɛ hiɛ atua.+ 25  Ŋɔɔ Aaron kɛ ebinuu Eleazar ni okɛ amɛ akwɔ kɛba Hor Gɔŋ lɛ nɔ. 26  Jiemɔ Aaron atadei lɛ yɛ ehe,+ ní okɛwo ebinuu Eleazar,+ ni Aaron baagbo yɛ jɛmɛ.”* 27  No hewɔ lɛ, Mose fee tamɔ bɔ ni Yehowa fã lɛ lɛ pɛpɛɛpɛ, ni amɛkwɔ Hor Gɔŋ lɛ yɛ maŋbii lɛ fɛɛ ahiɛ. 28  Ni Mose jie Aaron atadei lɛ yɛ ehe, ni ekɛwo ebinuu Eleazar. No sɛɛ lɛ, Aaron gbo yɛ jɛmɛ, yɛ gɔŋ lɛ yiteŋ.+ Ni Mose kɛ Eleazar kpeleke shi kɛjɛ gɔŋ lɛ nɔ. 29  Be ni maŋ muu lɛ fɛɛ na akɛ Aaron egbo lɛ, Israelbii lɛ fɛɛ fó Aaron gbii 30.+

Shishigbɛ Niŋmaa

Loo “kɛkwɔ kɛshi.”
Loo “nyɛhãaa ana akɛ nyɛyɛ hemɔkɛyeli yɛ mimli.”
Eshishi ji, “Naataamɔ.”
Hebri sht. ŋm., “gbii.”
Loo “wɔbaakwɔ kɛtsɔ.”
Hebri sht. ŋm., “nine.”
Hebri sht. ŋm., “Abaabua Aaron naa afata emɛi lɛ ahe.” Eji lalawiemɔ ni akɛtsuɔ nii kɛhãa gbele.
Hebri sht. ŋm., “ni abaabua Aaron naa ni ebaagbo yɛ jɛmɛ.”