Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

 SANE 18

Yakob Tee Haran

Yakob Tee Haran

ANI ole hii ni Yakob kɛ amɛ wieɔ nɛɛ? Beni efã gbɛ gbii pii lɛ, Yakob kɛ amɛ kpe yɛ nubu ko he. Amɛmiikwɛ amɛtooi. Yakob bi amɛ akɛ: ‘Nɛgbɛ nyɛjɛ?’

Amɛha hetoo akɛ: ‘Haran.’

Yakob bi akɛ: ‘Ani nyɛle Laban?’

Amɛha hetoo akɛ: ‘Hɛɛ, naa ebiyoo Rahel kɛ etooi baa lɛ.’ Ani oona Rahel ni baa yɛ jɛmɛ lɛ?

Beni Yakob na Rahel kɛ etsɛkwɛ̃ Laban tooi lɛ, etee ni eyajie tɛ lɛ kɛjɛ nubu lɛ naa koni tooi lɛ anyɛ anu nu. Kɛkɛ ni Yakob shɔ Rahel naa, ni etsɔɔ lɛ mɔ ni eji. Ena miishɛɛ waa, ni etee shia eyakɛɛ epapa Laban.

Laban na miishɛɛ waa akɛ Yakob kɛ amɛ aaahi shi. Ni beni Yakob bi akɛ eesumɔ ni ekɛ Rahel ahi shi akɛ eŋa lɛ, Laban na he miishɛɛ. Shi ekɛɛ Yakob akɛ etsu nii afii kpawo yɛ eŋmɔ mli dani ekɛ Rahel aha lɛ. Akɛni eesumɔ Rahel waa hewɔ lɛ Yakob fee nakai. Shi beni gbalashihilɛ be lɛ shɛ lɛ, ani ole nɔ ni ba?

Laban kɛ ebiyoo onukpa Lea moŋ ha Yakob yɛ Rahel najiaŋ. Beni Yakob kpɛlɛ nɔ akɛ ebaatsu nii afii kpawo kroko eha Laban lɛ, Laban kɛ Rahel hu ha lɛ akɛ eŋa. Yɛ nakai bei lɛ amli lɛ, Nyɔŋmɔ ŋmɛ gbɛ koni hii aná nɔ ni fe ŋa kome. Shi agbɛnɛ, taakɛ Biblia lɛ tsɔɔ lɛ, esa akɛ nuu aná ŋa kome pɛ.