Ani Yesu Ji Nyɔŋmɔ Ofe Lɛ?

Hetoi ni mɛi fɔɔ hamɔ:

▪ “Hɛɛ, Yesu ji Nyɔŋmɔ Ofe lɛ.”

▪ “Yesu ji Nyɔŋmɔ ni ejie ehe kpo yɛ heloo mli.”

Mɛni Yesu wie?

▪ “Nyɛmiisumɔ mi kulɛ, nyɛaaná miishɛɛ akɛ miiya tsɛ lɛ ŋɔɔ, ejaakɛ mitsɛ da fe mi.” (Yohane 14:28) Yesu kɛɛ akɛ ekɛ e-Tsɛ lɛ yeee egbɔ.

▪ “Miiya ŋwɛi yɛ mitsɛ kɛ nyɛ hu nyɛtsɛ kɛ mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.” (Yohane 20:17) Yesu ekɛɛɛ akɛ lɛ ji Nyɔŋmɔ, shi ekɛɛ akɛ esoro Nyɔŋmɔ yɛ lɛ Yesu lɛ he.

▪ “Mi lɛ mitooo mi diɛŋtsɛ miyi miwieee; shi tsɛ ni tsu mi lɛ, lɛ moŋ ewo mi kita, nɔ ni mikɛɛ kɛ nɔ ni miwie.” (Yohane 12:49) Yesu tsɔɔmɔi lɛ jeee enɔŋ; amɛjɛ Tsɛ lɛ ŋɔɔ.

YESU kɛɛ akɛ eji Nyɔŋmɔ Bi, shi jeee Nyɔŋmɔ Ofe. Kɛ́ Yesu ji Nyɔŋmɔ kulɛ, namɔ esɔle eha lɛ lɛ beni eyɔɔ shikpɔŋ lɛ nɔ lɛ? (Mateo 14:23; 26:26-29) Ekã shi faŋŋ akɛ, Yesu ekwaaa efeee ehe tamɔ nɔ ni ekɛ mɔ kroko miiwie!

Beni Yesu kaselɔi lɛ ateŋ mɛi enyɔ bi lɛ koni eha amɛ hegbɛi krɛdɛɛi komɛi yɛ e-Maŋtsɛyeli lɛ mli lɛ, ekɛɛ amɛ akɛ: “Mininejurɔ kɛ mibɛku nɔ taramɔ lɛ, ejeee minɔ ni mikɛhaa, shi moŋ mɛi ni mitsɛ esaa eto amɛ lɛ anɔŋ.” (Mateo 20:23) Ani no mli lɛ Yesu miimale beni ekɛɛ amɛ akɛ ebɛ hegbɛ akɛ etsuɔ amɛnibimɔ lɛ he nii ehaa amɛ lɛ? Dabi kwraa! Yɛ no najiaŋ lɛ, ejɛ heshibaa mli ekpɛlɛ nɔ akɛ Nyɔŋmɔ pɛ yɔɔ hegbɛ akɛ ekpɛɔ yiŋ ni tamɔ nɛkɛ. Yesu tsɔɔ mli po akɛ, nibii komɛi yɛ ni lɛ loo ŋwɛibɔfoi lɛ leee, ja e-Tsɛ lɛ pɛ.—Marko 13:32.

Ani beni Yesu yɔɔ shikpɔŋ lɛ nɔ akɛ gbɔmɔ lɛ pɛ ji be ni ebaa shi fe Nyɔŋmɔ? Dabi. Beni Yesu gbo ni atee lɛ shi lɛ sɛɛ po lɛ, awie ehe yɛ Biblia lɛ mli akɛ ebaa shi fe Nyɔŋmɔ. Bɔfo Paulo kaiɔ wɔ akɛ, “Kristo yitso ji Nyɔŋmɔ.” (1 Korintobii 11:3) Biblia lɛ kɛɔ akɛ wɔsɛɛ “beni aŋɔ nii fɛɛ ato bi lɛ shishi lɛ, no lɛ lɛ diɛŋtsɛ hu eeeŋɔ ehe eto mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ ayitso.”—1 Korintobii 15:28.

Eyɛ faŋŋ akɛ, Yesu jeee Nyɔŋmɔ Ofe. No hewɔ ni etsɛ́ e-Tsɛ lɛ akɛ “mi-Nyɔŋmɔ” lɛ.—Kpojiemɔ 3:2, 12; 2 Korintobii 1:3, 4. *—w09 02/01-E.

[Shishigbɛ niŋmaa]

[Wiemɔ ni akɔ ni akɛmiitsu nii ni yɔɔ baafa 7]

Yesu kɛɛ akɛ, nibii komɛi yɛ ni lɛ loo ŋwɛibɔfoi lɛ leee, ja e-Tsɛ lɛ pɛ