Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ APRIL 2009

Wɔkɛ Miishɛɛ Miifɔ̃ Bo Nine

Wɔkɛ Miishɛɛ Miifɔ̃ Bo Nine

EKOLƐ otsɔ Yehowa Odasefoi a-Maŋtsɛyeli Asa ni yɔɔ okutso lɛ mli lɛ he pɛŋ, ni obi ohe akɛ mɛni kwraa afeɔ yɛ jɛi. Ani ole akɛ mɔ fɛɛ mɔ ni miisumɔ lɛ baanyɛ aya kpeei ni amɛfeɔ daa otsi lɛ eko? Amɛyɛ he miishɛɛ waa akɛ amɛaahere gbɔi kɛba amɛteŋ.

Shi ekolɛ oyɛ saji komɛi ni obaasumɔ ni obi. Mɛni hewɔ Yehowa Odasefoi kpeɔ kutuu lɛ? Mɛni afeɔ yɛ kpeei nɛɛ ashishi? Ni mɛni gbɔi ni jeee Yehowa Odasefoi lɛ kɛɔ yɛ kpeei lɛ ahe?

“Abua Maŋ lɛ Fɛɛ Naa Kɛkpe”

Kɛjɛ blema beebe lɛ, gbɔmɛi buaa amɛhe naa kutuu koni amɛjá Nyɔŋmɔ ni amɛkase ehe nii. Aaafee afii 3,500 ni eho nɛ lɛ, akɛɛ Israelbii lɛ akɛ: “Abua maŋ lɛ fɛɛ naa kɛkpe, hii kɛ yei kɛ gbekɛbii kɛ gbɔi ni yɔɔ nyɛmaji lɛ amli lɛ, koni amɛbo mlai lɛ atoi ni amɛkase bɔ ni afee ni amɛshe Yehowa, nyɛ-Nyɔŋmɔ lɛ, gbeyei koni amɛjwɛŋ nɔ ni amɛye mla nɛɛ mli wiemɔi lɛ fɛɛ anɔ.” (5 Mose 31:12, Ga Biblia Hee) No hewɔ lɛ, yɛ Israel lɛ, atsɔɔ gbekɛbii kɛ onukpai fɛɛ anii koni amɛjá Yehowa Nyɔŋmɔ ni amɛbo lɛ toi.

Afii ohai abɔ sɛɛ beni ato Kristofoi asafo lɛ shishi lɛ, kpe ni akpeɔ kutuu lɛ tee nɔ efee anɔkwa jamɔ mli nifeemɔi ni he hiaa lɛ ateŋ ekome. Bɔfo Paulo ŋma akɛ: “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa.” (Hebribii 10:24, 25) Taakɛ bɔ ni wekukpãa ni yɔɔ weku mlibii ateŋ lɛ mli waa kɛ́ amɛkpe kutuu lɛ, nakai nɔŋŋ suɔmɔ wekukpãa ni kã mɛi ni miisumɔ akɛ amɛsɔmɔ Nyɔŋmɔ lɛ mli waa kɛ́ Kristofoi kpe kutuu kɛha jamɔ lɛ.

Yɛ Ŋmalɛ mli nɔkwɛmɔnii nɛɛ kɛ gbeekpãmɔ naa lɛ, Yehowa Odasefoi kpeɔ kutuu yɛ amɛ-Maŋtsɛyeli Asai lɛ anɔ shii enyɔ daa otsi. Kpeei lɛ yeɔ ebuaa mɛi ni yaa shishi lɛ koni amɛhiɛ asɔ Biblia mli shishitoo mlai, amɛnu shishi, ni amɛkɛtsu nii. Bei pii lɛ, afeɔ nɔ kome too lɛ nɔŋŋ yɛ kpeei nɛɛ ashishi yɛ jeŋ fɛɛ, ni kpeei lɛ ateŋ eko fɛɛ eko yɛ oti krɛdɛɛ ko hewɔ ni ato he gbɛjianɔ. Dani abaaje kpeei lɛ ashishi kɛ beni akpa sɛɛ lɛ, mɛi ni yɔɔ kpeei lɛ ashishi lɛ kɛ sanegbaa ni tswaa mɔ emaa shi ‘shɛjeɔ amɛmii’ loo amɛkɛwowoɔ amɛhe hewalɛ. (Romabii 1:12) Mɛni afeɔ yɛ kpeei nɛɛ ateŋ eko fɛɛ eko shishi?

Biblia mli Shiɛmɔ

Kpee ni mɛi babaoo fɔɔ shishi yaa klɛŋklɛŋ ji shiɛmɔ ko ni damɔ Biblia lɛ nɔ ni ato he gbɛjianɔ kɛha maŋbii, ni bei pii lɛ afeɔ enɛ yɛ otsi lɛ naagbee. Yesu Kristo ha maŋshiɛmɔi shii abɔ—amɛteŋ ekome ji Gɔŋ nɔ Shiɛmɔ ni ehe gbɛi waa lɛ. (Mateo 5:1; 7:28, 29) Bɔfo Paulo shiɛ etsɔɔ Ateenebii lɛ. (Bɔfoi lɛ Asaji 17:22-34) Yehowa Odasefoi nyiɛɔ Kristo kɛ Paulo nɔkwɛmɔnɔ lɛ sɛɛ, ni yɛ amɛkpeei ashishi lɛ, ahaa wiemɔ ni ato he gbɛjianɔ kɛha maŋbii titri ni maŋbii nɛɛ ateŋ mɛi komɛi yɛ ni no ji klɛŋklɛŋ kpee ni amɛyaa.

Akɛ lalai ni yɔɔ wolo ni ji Nyɛláa Yijiemɔ Lala Nyɛhaa Yehowa * lɛ mli lɛ ateŋ ekome jeɔ kpee lɛ shishi. Mɛi fɛɛ ni miisumɔ ni amɛdamɔ shi ni amɛfata he kɛla lala lɛ baanyɛ afee nakai. Beni asɔle kuku sɛɛ lɛ, wielɔ ko ni he esa kɛ nitsɔɔmɔ lɛ kɛ minitii 30 haa wiemɔ. (Kwɛmɔ akrabatsa ni ji  “Shiɛmɔi ni Sɛɛnamɔ Yɔɔ He Kɛha Maŋbii” lɛ mli.) Ewiemɔ lɛ damɔ Biblia lɛ nɔ tuuntu. Wielɔ lɛ fɔ̃ɔ toibolɔi lɛ aninefɔ̃ɔ koni amɛgbele ŋmalɛi ni kɔɔ sane ni ewieɔ he lɛ he ni amɛnyiɛ sɛɛ beni ekaneɔ ŋmalɛi nɛɛ. No hewɔ lɛ, obaanyɛ okɛ bo diɛŋtsɛ o-Biblia aba, loo obi Yehowa Odasefoi lɛ ateŋ mɔ kome ni eha bo Biblia lɛ eko dani aje kpee lɛ shishi.

Buu-Muu Nikasemɔ

Yɛ Yehowa Odasefoi asafoi babaoo amli lɛ,  nɔ ni nyiɛɔ maŋshiɛmɔ lɛ sɛɛ ji Buu-Muu Nikasemɔ, ni ji sanebimɔ-kɛ-hetoohamɔ ni heɔ ŋmɛlɛtswaa kome ni akɛsusuɔ Biblia mli saneyitso ko he. Kpee nɛɛ woɔ mɛi ni eba shishi lɛ ahewalɛ koni amɛkase Beroiabii ni hi shi yɛ Paulo beaŋ ni ‘jie amɛyitsoŋ amɛmɔ wiemɔ lɛ mli, ni kpa ŋmalɛi lɛ amli amɛkwɛ’ lɛ anɔkwɛmɔnɔ lɛ.—Bɔfoi lɛ Asaji 17:11.

Alaa lala kome kɛjeɔ Buu-Muu Nikasemɔ lɛ shishi. Sane ni asusuɔ he kɛ sanebimɔi ni nikasemɔ lɛ nɔkwɛlɔ lɛ biɔ lɛ fɛɛ yɛ wolo tɛtrɛɛ nɛɛ nikasemɔ nɔ̃ lɛ mli. Obaanyɛ obi Yehowa Odasefoi lɛ ateŋ mɔ kome koni eha bo nikasemɔ nɔ̃ lɛ eko. Saneyitsei ni asusu he nyɛsɛɛ nɛɛ lɛ ateŋ ekomɛi nɛ: “Fɔlɔi—Nyɛtsɔsea Nyɛbii lɛ yɛ Suɔmɔ Mli,” “Nyɛkaŋɔa Efɔŋ Nyɛtoa Mɔ ko Mɔ ko Efɔŋ Najiaŋ,” kɛ “Nɔ Hewɔ ni Etsɛŋ ni Nɔnaa Fɛɛ Sɛɛ Baafo.” Eyɛ mli akɛ atsɔɔ sanebimɔ-kɛ-hetoohamɔ nɔ afeɔ kpee nɛɛ moŋ, shi toibolɔi lɛ jɛɔ amɛsuɔmɔ mli amɛhaa sanebimɔi lɛ ahetoo, ni mɛi ni fɔɔ hetoohamɔ ji mɛi ni etsɔ hiɛ amɛkane ni amɛsusu sane lɛ kɛ emli ŋmalɛi ni fiɔ sɛɛ lɛ ahe. Akɛ lala kome kɛ sɔlemɔ muɔ kpee lɛ naa.—Mateo 26:30; Efesobii 5:19.

Asafoŋ Biblia Nikasemɔ

Daa otsi lɛ, Yehowa Odasefoi ŋɔɔ gbɛkɛ kome yɛ otsi lɛ mli ni amɛkpeɔ ekoŋŋ yɛ Maŋtsɛyeli Asa lɛ nɔ kɛha kpee ko ni ajara mli awo fãi etɛ amli, ni kpee nɛɛ heɔ ŋmɛlɛtswaa kome kɛ minitii 45. Klɛŋklɛŋ fã lɛ, ni ji Asafoŋ Biblia Nikasemɔ lɛ heɔ minitii 25. Eyeɔ ebuaa mɛi ni yaa lɛ koni amɛle Biblia lɛ mli jogbaŋŋ, amɛtsake amɛsusumɔi kɛ amɛjeŋba, ni amɛya amɛhiɛ akɛ Kristo kaselɔi. (2 Timoteo 3:16, 17) Taakɛ afeɔ yɛ Buu-Mɔɔ Nikasemɔ lɛ shishi lɛ, akɛ sanebimɔ-kɛ-hetoohamɔ susuɔ Biblia mli saneyitso ko he yɛ kpee nɛɛ shishi. Mɛi ni haa hetoi  lɛ jɛɔ amɛsuɔmɔ mli amɛfeɔ nakai. Bei pii lɛ, Biblia kasemɔ wolo ni akɛtsuɔ nii yɛ kpee nɛɛ shishi ji woji ni Yehowa Odasefoi efee lɛ ateŋ ekome.

Mɛni hewɔ akɛ Biblia kasemɔ woji tsuɔ nii yɛ kpeei nɛɛ ashishi lɛ? Yɛ Biblia beaŋ lɛ, Nyɔŋmɔ Wiemɔ lɛ ni aaakane lɛ kɛkɛ faaa. No mli lɛ, ‘atsɔɔ shishi, koni anu nɔ ni akaneɔ lɛ shishi.’ (Nehemia 8:8) Yɛ nyɛsɛɛ afii ni eho lɛ amli lɛ, woji ni gbalaa Biblia mli woji ni ji Yesaia, Daniel, kɛ Kpojiemɔ lɛ amli lɛ ni akase lɛ eye ebua mɛi ni tee kpee nɛɛ shishi lɛ ni amɛnu Biblia mli woji nɛɛ ashishi.

Teokrase Sɔɔmɔ Skul

Kɛ́ agbe Asafoŋ Biblia Nikasemɔ lɛ naa lɛ, akɛ Teokrase Sɔɔmɔ Skul lɛ tsaa nɔ. Ato kpee nɛɛ ni heɔ minitii 30 lɛ he gbɛjianɔ koni akɛye abua Kristofoi ni amɛle ‘bɔ ni atsɔɔ nii ahaa.’ (2 Timoteo 4:2) Ákɛ nɔkwɛmɔnɔ lɛ, ani obi loo onaanyo ko ebi bo sane ko ni kɔɔ Nyɔŋmɔ loo Biblia lɛ he ni onaaa bɔ ni ooofee oha lɛ hetoo kpakpa pɛŋ? Teokrase Sɔɔmɔ Skul lɛ baanyɛ aye abua bo ni ole bɔ ni ooofee ojɛ Biblia lɛ mli oha sanebimɔi ni mli wawai ahetoo kɛwo mɛi ahewalɛ. No hewɔ lɛ, wɔ hu wɔbaanyɛ wɔná gbalɔ Yesaia niiashikpamɔ lɛ eko beni ejaje akɛ: “Nuŋtsɔ Yehowa eha mi nikaselɔi alilɛi, koni male bɔ ni mikɛ mɔ ni etɔ lɛ lɛ aaawie yɛ be ni sa mli.”—Yesaia 50:4.

Ajeɔ Teokrase Sɔɔmɔ Skul lɛ shishi kɛ wiemɔ ni damɔ Biblia lɛ fã ko nɔ ni awo toibolɔi lɛ hewalɛ yɛ otsi ni tsɔ hiɛ lɛ mli koni amɛkane. Kɛ́ wielɔ lɛ gbe ewiemɔ lɛ naa lɛ, efɔ̃ɔ toibolɔ lɛ anine koni amɛkɛ wiemɔi kukuji atsɔɔ saji otii ni amɛna akɛ ehe yɛ sɛɛnamɔ kɛha amɛ yɛ Biblia lɛ fã ni afo akɛ akane lɛ mli. Kɛ́ agbe ŋmalɛ hesusumɔ nɛɛ naa lɛ, mɛi ni kɛ amɛhe ewo skul lɛ mli ni yɔɔ nifeemɔ lɛ batsuɔ amɛnifeemɔi lɛ ahe nii.

Akɛ nifeemɔ woɔ skul nɛɛ mlibii lɛ adɛŋ koni amɛbakane Biblia lɛ fã ko yɛ wiemɔ kpoku lɛ nɔ loo amɛbafee nɔkwɛmɔnɔ ko kɛtsɔɔ bɔ ni aaafee agbala Ŋmalɛ mli sane ko mli atsɔɔ mɔ ko. Kɛ́ agbe nifeemɔ lɛ eko fɛɛ eko naa lɛ, ŋaawolɔ ko ni yɔɔ niiashikpamɔ jieɔ skulnyo lɛ yi yɛ nɔ ni efee lɛ jogbaŋŋ lɛ he, ni edamɔɔ nikasemɔ wolo ni ji Ná Teokrase Sɔɔmɔ Skul Tsɔsemɔ lɛ He  Sɛɛ lɛ nɔ efeɔ enɛ. Sɛɛ mli lɛ, ebaanyɛ ewo skulnyo lɛ ŋaa yɛ bɔ ni eeefee eya ehiɛ lɛ he yɛ teemɔŋ.

Ato Teokrase Sɔɔmɔ Skul lɛ ni emli nifeemɔi yɔɔ kukuji lɛ he gbɛjianɔ koni eye ebua skulnyo lɛ kɛ agbɛnɛ hu toibolɔi ni miisumɔ ni amɛya amɛhiɛ yɛ amɛnikanemɔ, amɛwiemɔ, kɛ amɛnitsɔɔmɔ hesai amli lɛ. Kɛ́ agbe Teokrase Sɔɔmɔ Skul lɛ naa lɛ, akɛ lala kome ni damɔ Biblia mli sane ko nɔ lɛ jeɔ Sɔɔmɔ Kpee lɛ shishi.

Sɔɔmɔ Kpee

Sɔɔmɔ Kpee lɛ ji nɔ ni akɛ muɔ kpee ni ajara mli awo fãi etɛ amli lɛ naa. Atsɔɔ wiemɔi ni ahaa, nɔkwɛmɔnii, saji ni abiɔ mɛi, kɛ toibolɔi lɛ ni akɛgbaa sane nɔ ayeɔ abuaa mɛi ni eba kpee lɛ koni amɛle bɔ ni amɛaatsɔɔ mɛi Biblia mli anɔkwalei yɛ gbɛ ni mɔɔ shi nɔ. Dani Yesu aaatsu ekaselɔi lɛ koni amɛyashiɛ lɛ, ebua amɛnaa ni eha amɛ gbɛtsɔɔmɔi ni yɔɔ fitsofitso. (Luka 10:1-16) Akɛni nakai ni efee lɛ saa amɛ jogbaŋŋ kɛha sanekpakpa jajemɔ nitsumɔ lɛ hewɔ lɛ, amɛná niiashikpamɔi ni yɔɔ miishɛɛ babaoo. Sɛɛ mli lɛ, Yesu sɛɛnyiɛlɔi lɛ babɔ lɛ bɔ ni nibii tee nɔ eha lɛ he amaniɛ. (Luka 10:17) Bei pii lɛ, kaselɔi lɛ kɛ amɛhe gbaa niiashikpamɔi ni amɛnáa lɛ he saji.—Bɔfoi lɛ Asaji 4:23; 15:4.

Akɛ Sɔɔmɔ Kpee ni heɔ minitii 35 lɛ he gbɛjianɔtoo woɔ adafitswaa wolo ko ni baa daa nyɔɔŋ nɔ, ni atsɛɔ lɛ Wɔ Maŋtsɛyeli Sɔɔmɔ lɛ mli. Saneyitsei ni asusu he yɛ Sɔɔmɔ Kpee lɛ shishi nyɛsɛɛ nɛɛ ekomɛi nɛ: “Nyɛjáa Yehowa akɛ Weku,” “Nɔ Hewɔ ni Wɔkuɔ Wɔsɛɛ Wɔyaa Shii Abɔ,” kɛ “Kasemɔ Kristo yɛ Oshiɛmɔ Nitsumɔ lɛ Mli.” Amuɔ kpee lɛ naa kɛ lala kome, ni ahaa asafo lɛ mlinyo ko basɔleɔ naagbee sɔlemɔ kɛkpaa.

Nɔ ni Gbɔi Ekɛɛ

Asafoi srɔtoi lɛ bɔɔ mɔdɛŋ koni amɛhere mɛi fɛɛ ni baa amɛkpeei lɛ hiɛmɛɛ. Ákɛ nɔkwɛmɔnɔ lɛ, Andrew enu Yehowa Odasefoi ahe saji gbohii babaoo. Shi be ni etee amɛkpee lɛ eko klɛŋklɛŋ kwraa lɛ, bɔ ni ahere lɛ hiɛmɛɛ lɛ ha enaa kpɛ ehe waa. Andrew bɔ amaniɛ akɛ: “Eji he ko ni yɔɔ miishɛɛ waa. Bɔ ni amɛjie naanyobɔɔ su kpo amɛtsɔɔ mi, kɛ bɔ ni amɛná mihe miishɛɛ lɛ ha minaa kpɛ mihe waa.” Oblayoo kpokuafonyo ko ni atsɛɔ lɛ Ashel ni yɔɔ Canada lɛ kɛ Andrew kpãa gbee. Ekɛɛ akɛ: “Kpee lɛ yɛ miishɛɛ waa! Ewaaa akɛ ooonu nifeemɔ ni yaa nɔ lɛ shishi.”

Ale José ni yɔɔ Brazil lɛ yɛ ekutso lɛ mli akɛ mɔ ko ni feɔ basabasa. Fɛɛ sɛɛ lɛ, afɔ̃ lɛ nine kɛtee kpee ko shishi yɛ Maŋtsɛyeli Asa ni yɔɔ he ni eyɔɔ lɛ nɔ. Ekɛɛ akɛ: “Eyɛ mli akɛ mɛi ni yɔɔ Maŋtsɛyeli Asa lɛ nɔ lɛ le mitsutsu subaŋ lɛ moŋ, shi amɛhere mi hiɛmɛɛ.” Atsushi ni yɔɔ Japan lɛ kɛɛ akɛ: “Yɛ anɔkwale mli lɛ, beni mitee Yehowa Odasefoi akpee klɛŋklɛŋ kwraa lɛ, minu he akɛ misaaa jɛmɛ. Fɛɛ sɛɛ lɛ, mibana akɛ amɛjeee mɛi srɔto. Amɛbɔ mɔdɛŋ waa koni amɛha mihiɛ amɛ.”

Wɔmiifɔ̃ Bo Nine ni Oba

Taakɛ mɛi ni wɔtsĩ amɛtã kɛtsɔ hiɛ lɛ awiemɔi tsɔɔ lɛ, kɛ́ otee kpee yɛ Maŋtsɛyeli Asa lɛ nɔ lɛ obaanyɛ oná he sɛɛ babaoo. Obaakase Nyɔŋmɔ he nii, ni Yehowa Nyɔŋmɔ baatsɔɔ bo “nii ni hi hao” kɛtsɔ gbɛtsɔɔmɔi ni damɔ Biblia lɛ nɔ, ni onine aaashɛ nɔ yɛ jɛmɛ lɛ nɔ.—Yesaia 48:17.

Awooo shika ko dani ayaa Yehowa Odasefoi akpeei lɛ, ni aheee shika yɛ mɛi adɛŋ hu yɛ jɛmɛ. Ani obaasumɔ ni oya kpee lɛ eko yɛ Maŋtsɛyeli Asa ni yɔɔ okutso lɛ mli lɛ nɔ? Wɔkɛ miishɛɛ miifɔ̃ bo nine ni ofee nakai.—w09 02/01-E.

^ kk. 10 Yehowa Odasefoi ji mɛi ni fee woji fɛɛ ni atsɛ yisɛɛ yɛ sane nɛɛ mli lɛ.