Tsi Obɛŋkɛ Nyɔŋmɔ

Kojolɔ ni Feɔ Nɔ ni Ja Be Fɛɛ Be

1 Mose 18:22-32

JALƐSANEYELI. Mɔ ni akɛyeɔ jogbaŋŋ. Mɔ hiɛaŋ ni akwɛɛɛ. Onyaa sui ni tamɔ nɛkɛ lɛ ahe, aloo jeee nakai? Eji adesai afɔmɔ su akɛ amɛaakpa gbɛ akɛ akɛ amɛ aaaye jogbaŋŋ. Dɔlɛ sane ji akɛ, jalɛsane ni ayeee efa babaoo yɛ je lɛŋ ŋmɛnɛ. Shi kojolɔ ko yɛ ni esa akɛ wɔmu wɔfɔ̃ enɔ—lɛ ji Yehowa Nyɔŋmɔ. Efeɔ nɔ ni ja be fɛɛ be. Anaa enɛ faŋŋ yɛ sanegbaa ko ni tee nɔ yɛ Yehowa kɛ Abraham teŋ lɛ mli, ni aŋma enɛ he sane yɛ 1 Mose 18:22-32. *

Beni Yehowa kɛɛ Abraham akɛ, ekpɛ eyiŋ akɛ ebaayakwɛ kɛji nibii ni enu yɛ Sodom kɛ Gomora ahe lɛ yɛ mli lo lɛ, Abraham she gbeyei akɛ ekolɛ no baaha akpata jalɔi ni yɔɔ jɛi, ni ewɔfaase Lot fata he lɛ ahiɛ. Abraham kpa Yehowa fai akɛ: “Ani oookpata jalɔ kɛ gbɔmɔ fɔŋ fɛɛ hiɛ shikome lo? Ekolɛ benɛ jalɔi nyɔŋmai enumɔ yɛ maŋ lɛŋ: aso no hu . . . oŋɔfaŋ maŋ lɛ yɛ jalɔi nyɔŋmai enumɔ lɛ ni yɔɔ mli lɛ hewɔ?” (Kuku 23, 24) Nyɔŋmɔ kɛɛ akɛ kɛji ena jalɔi 50 pɛ yɛ maji lɛ amli lɛ, ekpataŋ maji lɛ ahiɛ. Abraham kpa Yehowa fai shii enumɔ ekoŋŋ kɛfata he, ni egbɔ yibɔ lɛ nɔ fiofio aahu kɛyashi eshɛ mɛi nyɔŋma. Yɛ eko fɛɛ eko mli lɛ, Nyɔŋmɔ kɛɛ akɛ ekpataŋ maji lɛ ahiɛ, kɛji ana jalɔi ayibɔ ni tamɔ nakai yɛ jɛi.

Ani enɛ tsɔɔ akɛ Abraham kɛ Nyɔŋmɔ miitaa naa? Jeee nakai kwraa! Kulɛ no baatsɔɔ akɛ, Abraham ji henɔwolɔ kpanaku. Gbɛ nɔ ni Abraham tsɔ ewie lɛ tsɔɔ akɛ ekɛ woo haa Nyɔŋmɔ ni ebaa ehe shi. Ekɛɛ akɛ, “sũ kɛ lamlu kɛkɛ ji mi.” Kɛfata he lɛ, Abraham wiemɔi lɛ tsɔɔ akɛ eyɛ hekɛnɔfɔɔ yɛ Yehowa mli akɛ ebaaye sane ni ja. Abraham kɛɛ shii enyɔ akɛ, enyɛŋ ‘egbale’ loo ebaŋ Nyɔŋmɔ jwɛŋmɔŋ kɔkɔɔkɔ akɛ eeekpata jalɔi ahiɛ eshi efɔŋfeelɔi anɔ. Blematsɛ anɔkwafo nɛɛ kɛ nɔmimaa wie akɛ “shikpɔŋ fɛɛ nɔ kojolɔ lɛ” baakojo “jalɛ kojomɔ.”—Kuku 25.

Ani nibii ni Abraham wie lɛ ja? Hɛɛ kɛ dabi. Susumɔ ni ená akɛ, kɛ́ hooo lɛ jalɔi nyɔŋma yɛ Sodom kɛ Gomora lɛ ejaaa. Shi esane ja jogbaŋŋ akɛ ekɛɛ akɛ, Nyɔŋmɔ ‘kpataŋ jalɔ kɛ gbɔmɔ fɔŋ fɛɛ hiɛ shikome.’ Sɛɛ mli beni Nyɔŋmɔ kpata nakai maji ni efɔŋfeemɔ eyi mli lɛ ahiɛ lɛ, ŋwɛibɔfoi ye amɛbua jalɔ Lot kɛ ebiyei enyɔ lɛ koni amɛje maŋ lɛŋ shweshweeshwe.—2 Petro 2:7-9.

Mɛni wɔkaseɔ yɛ Yehowa he yɛ sane nɛɛ mli? Beni Yehowa wo Abraham toi nɔ akɛ, eyaakwɛ maji lɛ amli lɛ, ekɛ no feemɔ tsɔɔ akɛ eesumɔ ni Abraham atsɔɔ ejwɛŋmɔ. No sɛɛ lɛ, eto etsui shi ni ebo eshieŋtsɛ Abraham toi beni Abraham fɔseɔ etsuiŋ susumɔi eshwieɔ shi lɛ. (Yesaia 41:8) Kwɛ bɔ ni enɛ tsɔɔ wɔ jogbaŋŋ akɛ, Yehowa ji Nyɔŋmɔ heshibalɔ ni kɛ woo haa etsuji ni yɔɔ shikpɔŋ lɛ nɔ lɛ, ni ewoɔ amɛhiɛ nyam hu! Eyɛ faŋŋ akɛ, wɔyɛ yiŋtoi babaoo ni wɔɔdamɔ nɔ wɔkɛ wɔhe afɔ̃ Yehowa, ni ji Kojolɔ ni feɔ nɔ ni ja be fɛɛ be lɛ nɔ kwraa.—w09 01/01-E.

[Shishigbɛ niŋmaa]

[Mfoniri ni yɔɔ baafa 32]

Abraham kpa Yehowa fai yɛ Sodom kɛ Gomora hewɔ