Wolo Ni Ji Enyɔ Ni Akɛmaje Korintobii Lɛ 1:1-24

  • Ŋamɔ (1, 2)

  • Nyɔŋmɔ shɛjeɔ wɔmii yɛ amanehului fɛɛ amli (3-11)

  • Paulo tsake gbɛ ni kulɛ ebaafã lɛ (12-24)

1  Paulo, Kristo Yesu bɔfo yɛ Nyɔŋmɔ suɔmɔ naa, kɛ wɔnyɛmi Timoteo,+ kɛ wolo nɛɛ miimaje Nyɔŋmɔ asafo ni yɔɔ Korinto lɛ, kɛ mɛi krɔŋkrɔŋi fɛɛ ni yɔɔ Akaia fɛɛ lɛ:+  Dromɔ kɛ toiŋjɔlɛ ni jɛ Nyɔŋmɔ, wɔ-Tsɛ lɛ, kɛ Nuŋtsɔ Yesu Kristo dɛŋ lɛ ahã nyɛ.  Ajie wɔ-Nuŋtsɔ Yesu Kristo Nyɔŋmɔ kɛ e-Tsɛ lɛ,+ musuŋtsɔlɛi a-Tsɛ*+ lɛ kɛ miishɛjemɔ fɛɛ Nyɔŋmɔ lɛ yi,+  mɔ ni shɛjeɔ wɔmii* yɛ wɔmanehului* fɛɛ amli,+ koni wɔ hu wɔnyɛ wɔkɛ miishɛjemɔ ni wɔnáa kɛjɛɔ Nyɔŋmɔ dɛŋ+ lɛ ashɛje mɛi krokomɛi ni naa amanehulu fɛɛ amanehulu* lɛ amii.+  Ejaakɛ bɔ ni amanehului ni wɔnaa yɛ Kristo hewɔ lɛ faa kɛtekeɔ nɔ yɛ wɔmli lɛ,+ nakai nɔŋŋ miishɛjemɔ ni wɔnáa kɛtsɔɔ Kristo lɛ nɔ lɛ hu faa kɛtekeɔ nɔ.  Agbɛnɛ, kɛ́ wɔkɛ shihilɛi ni mli wawai miikpe* lɛ, nyɛmiishɛjemɔ kɛ nyɛyiwalaheremɔ hewɔ ni; ni kɛ́ aashɛje wɔmii lɛ, no shɛjeɔ nyɛmii, ni miishɛjemɔ nɛɛ tsuɔ nii kɛyeɔ ebuaa nyɛ koni nyɛfi shi yɛ amanehului ni nyɛkɛkpeɔ ni wɔ hu wɔkɛ nakai amanehului lɛ nɔŋŋ kpeɔ lɛ amli.  Ni hiɛnɔkamɔ ni wɔyɔɔ yɛ nyɛgbɛfaŋ lɛ hosooo, ejaakɛ wɔle akɛ, bɔ ni nyɛnaa amanehului lɛ eko lɛ, nakai nɔŋŋ nyɛbaaná miishɛjemɔ lɛ hu eko.+  Ejaakɛ, nyɛmimɛi, wɔsumɔɔɔ ni wɔkɛ amanehulu ni wɔkɛkpe yɛ Asia kpokpaa lɛ nɔ lɛ atee nyɛ.+ Wɔyaje nɔnyɛɛ kpele shishi fe bɔ ni wɔbaanyɛ wɔkɛ wɔ diɛŋtsɛ wɔhewalɛ adamɔ naa, ni wɔhiɛ kãaa wɔwala nɔ po.+  Anɔkwa, wɔnu he akɛ abu wɔ gbele fɔ. Enɛ ba lɛ nakai koni wɔkɛ wɔhiɛ akafɔ̃ wɔ diɛŋtsɛ wɔhe nɔ, shi moŋ wɔkɛfɔ̃ Nyɔŋmɔ ni teɔ gbohii ashi lɛ nɔ.+ 10  Ejie wɔ kɛje nɔ ko wulu tamɔ gbele mli, ni ebaajie wɔ, ni wɔyɛ hiɛnɔkamɔ yɛ emli akɛ ebaaya nɔ hu ejie wɔ.+ 11  Nyɛ hu nyɛbaanyɛ nyɛkɛ hiɛdɔɔ asɔle kɛkpa fai yɛ wɔhewɔ kɛye nyɛbua wɔ.+ Kɛ́ nyɛfee nakai lɛ, no baahã mɛi babaoo ada shi ahã wɔ, ejaakɛ wɔná dromɔ yɛ mɛi babaoo asɔlemɔi* ni ahã hetoo lɛ hewɔ.+ 12  Ejaakɛ nɔ ni wɔshwãa yɛ he lɛ nɛ, wɔhenilee yeɔ he odase akɛ, wɔkɛ krɔŋkrɔŋfeemɔ kɛ tsui krɔŋŋ ni jɛ Nyɔŋmɔ ŋɔɔ lɛ baa wɔjeŋ yɛ je lɛ mli, titri lɛ yɛ nyɛteŋ, jeee kɛ heloo gbɛfaŋ hiɛshikamɔ,+ shi moŋ kɛ Nyɔŋmɔ dromɔ. 13  Ejaakɛ wɔŋmaaa nɔ ko nɔ ko wɔhãaa nyɛ akɛ ja nibii ni nyɛbaanyɛ nyɛkane* ni nyɛnu shishi, ni miyɛ hiɛnɔkamɔ akɛ nyɛbaaya nɔ nyɛnu nibii nɛɛ ashishi kɛmɔ shi,* 14  tamɔ bɔ ni nyɛ hu nyɛnuɔ shishi yɛ gbɛ ko nɔ akɛ wɔji nii ni nyɛkɛshwãa, tamɔ bɔ ni wɔkɛ nyɛ hu baashwã yɛ wɔ-Nuŋtsɔ Yesu gbi lɛ nɔ lɛ. 15  No hewɔ lɛ, akɛni miyɛ nɔmimaa yɛ enɛ he hewɔ lɛ, mito miyiŋ akɛ maba nyɛŋɔɔ klɛŋklɛŋ, koni nyɛná hegbɛ ni ji shii enyɔ nɔ kɛná miishɛɛ;* 16  ejaakɛ mito miyiŋ akɛ mabatsɔ nyɛŋɔɔ kɛya Makedonia, ni maku misɛɛ kɛjɛ Makedonia maba nyɛŋɔɔ ekoŋŋ, koni nyɛyajie mi gbɛ kɛya Yudea.+ 17  Anɔkwa, be ni mito miyiŋ nɛkɛ lɛ, mibuuu lɛ shwɛmɔ sane, aloo jeee nakai? Aloo ani heloonaa mitoɔ miyiŋ yɛ nibii ahe, ni mikɛɔ akɛ “Hɛɛ, hɛɛ,” kɛkɛ lɛ etsɔ “Dabi, dabi”? 18  Shi nyɛbaanyɛ nyɛkɛ nyɛhiɛ afɔ̃ Nyɔŋmɔ nɔ akɛ, nɔ ni wɔkɛɔ nyɛ lɛ jeee “hɛɛ” kɛkɛ lɛ etsɔ “dabi.” 19  Ejaakɛ Nyɔŋmɔ Bi, Yesu Kristo, mɔ ni atsɔ wɔ, ni ji mi kɛ Silvano* kɛ Timoteo+ nɔ ashiɛ ehe sane yɛ nyɛteŋ lɛ tsɔɔɔ “hɛɛ” ni esaa etsɔ “dabi,” shi moŋ “hɛɛ” lɛ etsɔ “hɛɛ” yɛ egbɛfaŋ. 20  Ekɔɔɔ he eko bɔ ni Nyɔŋmɔ shiwoi lɛ fa hã lɛ, kɛtsɔ enɔ lɛ, amɛtsɔ “hɛɛ.”+ No hewɔ lɛ, kɛtsɔ enɔ hu lɛ, akɛɔ Nyɔŋmɔ akɛ “Amen,”+ koni atsɔ wɔnɔ awo Nyɔŋmɔ hiɛ nyam. 21  Shi Nyɔŋmɔ ji mɔ ni maa nɔ mi akɛ nyɛ kɛ wɔ fɛɛ ji Kristo nii, ni lɛ nɔŋŋ ji mɔ ni fɔ wɔ mu.+ 22  Ekɛ enaasɔomɔnɔ lɛ hu esɔo wɔnaa,+ ni ehã wɔ nɔ ni baaba lɛ he nɔmimaa,* no ji mumɔ+ lɛ ni ekɛwo wɔtsuii amli lɛ. 23  Agbɛnɛ, miitsɛ Nyɔŋmɔ ni ebaye odase eshi mi,* akɛ mɔbɔ ni minaa nyɛ lɛ hewɔ ni mibako Korinto lolo lɛ. 24  Jeee akɛ wɔji nyɛhemɔkɛyeli lɛ nɔ nuŋtsɔmɛi,+ shi moŋ, wɔji nyɛnanemɛi nitsulɔi yɛ nyɛmiishɛɛnamɔ hewɔ, ejaakɛ nyɛhemɔkɛyeli lɛ hewɔ nyɛdamɔ shi lɛ.

Shishigbɛ Niŋmaa

Loo “Tsɛ ni mɔbɔnalɛ eyi lɛ obɔ.”
Loo “woɔ wɔ hewalɛ.”
Loo “shihilɛi ni mli wawai ni wɔkɛkpeɔ.”
Loo “ni kɛ shihilɛ ni mli wa fɛɛ shihilɛ ni mli wa kpeɔ.”
Loo “wɔmiina amanehulu.”
Loo “yɛ hiɛi babaoo asɔlemɔi.”
Shishitsɔɔmɔi komɛi kɛɔ akɛ, “nibii ni nyɛle jogbaŋŋ momo.”
Greek sht. ŋm., “kɛyashi naagbee.”
Shishitsɔɔmɔi komɛi kɛɔ akɛ, “nyɛná he sɛɛ shii enyɔ.”
Atsɛɔ lɛ Sila hu.
Loo “shiŋmɛɛnɔ (shika ni akɛfɔ̃ɔ shi kɛtsɔɔ akɛ abaahé nɔ ko lɛɛlɛŋ); nɔ ni baaba lɛ he shiwoo.”
Loo “misusuma.”