Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | SAGAI NA BULA VEIYALONI E VALE

Sala me Wali Kina na Veiba e Vale

Sala me Wali Kina na Veiba e Vale

VAKACAVA ke dou dau veiba e vale? De sa sivia tale qai kaukaua sara. O na rairai sega tale ga ni kila se cava e vakavuna. Ia dou dau veilomani, dou sega ni vinakata me dua e rarawa.

E bibi mo nanuma tiko ni gauna e yaco kina na duidui e loma ni vuvale, e sega ni kena ibalebale qori nira sa na tawase na lewena. Ena sega ni vakatau na bula veiyaloni se veicati ena nomudou veiba, ia ena sala o saga mo walia kina. Vakasamataka mada eso na sala o rawa ni walia kina na veiba.

1. KUA NI SAUMA LESU NA KA CA.

Ena rawa ni ruru na veivosaki katakata ena gauna e vakarorogo kina e dua vei rau na veiba tiko mai na nona vosa lesu. Mo saga gona mo kua ni sauma lesu na ka ni o vakacudrui. Lewai iko tiko ga vakamatau mo kua kina ni beci, mo dokai tiko ga. E vinaka mo nanuma matua ni bibi sara na veiyaloni ena vuvale mai na kena sagai me kilai o koya e donu ena dua na veiba.

“Ni sega na buka, e boko na yameyame, ni sega na vakaucaca e sega na veiba.”Vosa Vakaibalebale 26:20.

2. KAUAITAKA NA NONA RAI NA LEWE NI NOMU VUVALE.

Ena ruru na cudru qai vakilai tale na veiyaloni ni dua e vakarorogo ena yalololoma, qai sega ni veivakalewai. Me kua ni ca na inaki ni lomamu, ia mo kauaitaka na nona rai o koya drau veivosaki tiko. Meda kua tale ga ni nanuma ni ca na nona inaki, baleta ni rawa ni vu ga mai ena noda se kawa ivalavala ca tiko ga. De dua eda sega ni via sauma na ca e caka, ia e rawa ni vakavuna na tau ni vosa mosimosi nida sega ni vakasamataka vinaka na ka eda kaya se nida rarawa ga.

“Moni vakaisulu ena yalo ni veikauaitaki dina, yalololoma, yalomalumalumu, yalomalua, kei na vosovoso.”Kolosa 3:12.

3. SAGA ME RURU NA NOMU CUDRU.

Ke o dau yalototolo, ena vinaka mo tatau mada mo taubale vakalekaleka me rawa ni ruru kina nomu cudru. De o rawa ni gole ina dua na rumu se taubale me yacova ni o sa yalovinaka tale. Sega ni kena ibalebale qori ni o sega ni veitokoni se mo via vakalecalecava—se o sega ga ni via vosa. Ia e gauna vinaka mo masu kina vua na Kalou mo rawa ni vosota, mo yalomatua qai saga mo kila na ituvaki.

“Ni bera ni tubu na veiba mo biubiu.”Vosa Vakaibalebale 17:14.

 4. VAKASAMATAKA VINAKA NA KA ME TUKUNI KEI NA SALA ME MURI KINA.

Ena sega ni vinaka na ituvaki ke o qara na ka mo kaya me mosi kina na loma i koya drau veiba tiko. De vinaka mo cavuta ga na vosa e veivakacegui. Kua ni tukuna vua na ka o nanuma tiko me baleta na nona lewa na ivakarau ni lomana, ia kerea ga ena yalomalumalumu me vakaraitaka na lomana, vakavinavinakataki koya tale ga ke vukei iko se dusimaki iko vakayalomatua.

“Na vosa vakalialia e vaka na isua ni iseleiwau, ia na yamedra na vuku e veivakabulai.”Vosa Vakaibalebale 12:18.

5. ME MALUMU NA ROROGO NI DOMOMU, ME KUA NI ROGO LEVU.

Ke sega ni dau vosota e dua na lewe ni vuvale ena rawa ni vakavuna nodra cudru na kena vo. Se mani vakacava sara na levu ni nomu vakacudrui, saga me kua ni rogo levu na vosa o tauca, se me gaga se veivakanini. Me kua ni tau na vosa mosimosi va qo, “O sega ni dau kauaitaki au” se “O sega ni dau rogoci au.” Vei ira na veiwatini, de vinaka me tukuni ga vakamalua vei koya e veivakacudrui ni vakavu rarawa na ka e cakava (“Au rarawataka na nomu . . . ”). E sega ni dodonu me vakayacori na veibili, veisaba, veicaqe kei na ivalavala voravora. E vaka tale ga kina na kena dau cavuti eso na yaca me vakaibalebaletaki vei ira eso, ivosavosa e tawaveidokai kei na veivakarerei.

“Me kau tani vei kemuni na yaloca, na cudrucudru, na yalokatakata, na karakara, na vosavakacaca kei na ka ca kece va ya.”Efeso 4:31.

6. TOTOLO NI KERE VEIVOSOTI; VAKAMACALATAKA NA KA O NA CAKAVA MO VAKAVINAKATAKA NA ITUVAKI.

Kua ni vakalaiva na rai cala me vakaseva na nomu saga na veiyaloni. Nanuma tiko qo, ni o veiba kei na dua ena sega na ka drau rawata kina. Ia ke o guta na veiyaloni, drau sa veivakameautaki. E tiko gona na nomu itavi ena gauna e yaco kina na veiba. Ke o nanuma mada ga ni o sega ni cala, mo kere veivosoti ga ni o cudru se cavuta eso na ka e vakararawataki koya, kei na nomu sega ni nakita nomu veivakacudrui. E bibi sara na bula veiyaloni mai na dokadoka kei na nomu saga me kilai ni o donu tiko. Ke dua tale ga e kere veivosoti, mo vosoti koya sara.

“Mo lako, mo vakamalumalumutaki iko, mo vakamasuta totolo na wekamu.”Vosa Vakaibalebale 6:3.

Ni sa oti na veiba, cava o rawa ni cakava mo uqeta kina na veiyaloni ena loma ni vuvale? Ena veivosakitaki qori ena ulutaga tarava.