Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 VEIYASA I VURAVURA

Dikevi o Urope

Dikevi o Urope

E dau kilai tu o Urope me vanua e kaukaua kina na lotu, ia qo sa sega. O na qoroqoro ga ena so na kena itukutuku wale tiko ga qo e semati tiko ena veika vakaivolatabu.

YAGA NI DOMO NI TINA

ra kaya na dauvakadidike e Milan, mai Itali, ni o ira na gone era sucudole e rawa ni totolo nodra bulabula nira rogoca tiko na domo i tinadra ena veivuke ni dua na ka e vesu toka e ligadra, nira se tiko e valenibula. Na iwalewale qo e sagai kina me rogoca tiko na domo i tinana me vaka ga nona se tiko ena katonigone. E tukuni tale ena vakadidike: “E yaga sara vakalevu vei ira na gone sucudole na kena dau vakarogoi totolo va qori na domo i tinadra vei ira.”

KA E KAYA NA IVOLATABU: “E maravu qai vakanomodi na noqu bula vaka na gone sa kali vei tinana.”—Same 131:2.

UQETI ME NANUMI KOYA VAKASIVIA

Era vakaitavi ena dua na vakadidike mai Necaladi e 565 na gone. E laurai kina ni tiko eso na itubutubu era dau vakabekabei ira na luvedra nira “uasivi vei ira na kena vo,” e ganiti ira tale ga na “veiqaravi e uasivi.” Era na tini sakitaki ira ga kina na gone ni vakatauvatani kei ira na nodra icaba, ra nanuma ni sega ni dua tale e uasivi ira, dodonu tale ga me caka vei ira na ka. E kaya e dua e vola na veika e vakadikevi: “Era na vakabauta ga na gone nira tukuna nodra itubutubu nira uasivi ira na kena vo. Ena rairai sega ni vinaka qori vei ira se nodra bula veimaliwai.”

KA E KAYA NA IVOLATABU: “Au tukuna kina vei kemuni me kua ni dua e sivia na ka e nanuma me baleti koya, me yalomatua ga.”—Roma 12:3.

DONU TIKO GA NODRA RAI

E volaitukutukutaki ena dua na ripote ena univesiti mai Jamani na Heidelberg University nira sega ni via mate o ira na sa yabaki 100, ia era sa malumalumu qai yalani na ka era rawa ni cakava. E vakatarogi e va, laurai ni tolu eratou sega ni via mate, ratou qai saga me ratou marautaka vakalevu na nodratou bula. E donu tiko ga nodratou rai me baleta na bula, ni vakainaki qai marautaki, na ka tale ga ratou vinakata eratou cakava sara. E dei na nodratou vakabauta vakalotu kei na nodratou vakaduiduitaka na vinaka mai na ca.

ME VAKASAMATAKI: Me vaka e volai ena Dauvunau 3:11, na cava e rairai vakavuna meda via bula tiko ga?