Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA RAI NI IVOLATABU

Cava e Yaco Nida sa Mate

Cava e Yaco Nida sa Mate

E dau veiletitaki ena lotu na kedra ituvaki na mate. Ia e vakamacalataka vakamatata na iVolatabu na kedra ituvaki.

Eda na dewa ena dua tale na vuravura meda bula tiko kina?

KA ERA TUKUNA ESO

Era vakabauta e levu nida na lai bula tale tiko ena dua na vuravura nida sa mate. So tale era vakabauta nida na sucu tale meda dua na ka bula vou. E tiko tale ga o ira na vakabauta nida na lako i lomalagi se i eli.

KA E KAYA NA IVOLATABU

E sega ni bau tukuna na iVolatabu nida na dewa ina dua tale na vuravura meda bula tiko kina. E sega ni tukuni kina ni na bula tale tiko e dua na ka, baleta ni sa suka tale ina qele na yago e mate. Na gauna e totogitaki Atama kina na Kalou e kaya vua ni na suka ina kuvuniqele, sa na sega ni ka bula tale me vaka ga na kuvuniqele a buli mai kina.

“Ni o kuvuniqele ga, o na suka mo kuvuniqele tale.”Vakatekivu 3:19.

E vakacava tu na kedra ituvaki na mate?

KA E KAYA NA IVOLATABU

Nida sa mate sa na “sega” tale “na cakacaka se na vakasama se na kilaka se na vuku ena iBulubulu.” (Dauvunau 9:10) E kaya vakadodonu na iVolatabu ni dua e mate e “lesu o koya ina qele, sa takali na nona vakanananu ena siga oya.” (Same 146:4) O koya e mate sa sega tale ni dua na ka e cakava rawa, e dau vakatauvatana gona na iVolatabu na kena ituvaki me vaka ga e dua e “moce” tu.—Maciu 9:24.

CAVA E BIBI KINA?

Ni mate e dua o dau lomana, o na via kila eso na isaunitaro qo: Era sa tu e vei? E vakacava tu na kedra ituvaki? Era vakararawataki tiko? Me vaka ni tukuna na iVolatabu ni sa sega tale ni dua na ka era vakila tu na mate, eda lomavakacegu nida kila nira sa sega tale ni qai rarawa tiko na noda daulomani.

“O ira na mate era sega sara ga ni kila e dua na ka.”Dauvunau 9:5.

 E tiko na nodra inuinui na sa mate?

KA E KAYA NA IVOLATABU

E yalataka na Kalou ni nanumi ira tu na sa mate, ena vakaturi ira ena dua na vuravura vou ni yalododonu. O ira na vakaturi qori era na qai bula ga ni sa vakabulai ira tale na Kalou. E vinakata sara ga na Kalou Kaukaua Duadua me vakayagataka nona kaukaua me vakaturi ira na mate. Eda lomavakacegu tale ga nida kila ni yalataka tu o Jiova ni na vakayadrati ira tale na sa mate tu mera bula ena dua na gauna se bera mai.Aisea 26:19.

“Era na bula na nomuni mate.”Aisea 26:19.