Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 iVakasala ina Vuvale | VAKAWATI

iWali ni “Veigaluvi”

iWali ni “Veigaluvi”

ITUVAKI DREDRE

E rawa vakacava me rau veigaluvi tu vakadede e rua erau bubuluitaka ni rau na veilomani ena nodrau bula taucoko? De dua rau na kaya, ‘sa bau cegu mada ga kina neirau veiba.’ Ia qori e sega ni iwali ni leqa.

VUNA E YACO KINA

Sauma lesu. Eso na veiwatini era veigaluvi mera sauma lesu na ka e cakava na kedra isa. Kena ivakaraitaki, de dua a tuvanaka o tagane e dua na ka ena muanimacawa qai sega ni tukuna vei watina. Ni kila qori o watina, dua na ka nona cudru qai tukuna vei tagane ni sega ni dauveinanumi. E tukuna vua o tagane ni dau kauaitaka vakasivia na ka. E biubiu o yalewa ena levu ni nona cudru qai galuvi watina. E vaka ga e tukuna tiko: “Au na sauma na ka o cakava.”

Yaco ga na lomadra. Eso na veiwatini era veigaluvi me yaco kina na lomadra. Kena ivakaraitaki, vakasamataka mada ni rau tuvanaka na veiwatini me rau gade, qai vinakata o yalewa me lako tale ga na nona itubutubu. E sega ni taleitaka qori o tagane. E kaya: “Au lewai iko, sega ni o rau nomu itubutubu.” Na ka e cakava o yalewa e vakavuna me galuvi koya o watina me yaco kina na lomana.

E macala ni yaga na nodrau veigaluvi me rawa ni ruru kina na cudru ke sa katakata na veivosaki. Ni kaya na iVolatabu ni tiko na “siga me tiko lo kina.” (Dauvunau 3:7) Ia ke caka qori me saumi kina na ka e cakava e dua se me yaco na lomana, erau na veicudruvi tiko ga qai sega ni veidokai. Ena wali vakacava qori?

 KA O RAWA NI CAKAVA

Me rau kila taumada na veiwatini ni sega ni iwali ni nodrau leqa na veigaluvi. E dina ni na saumi kina na ka e cakava o watimu, se na yaco kina na lomamu, ia o na cakava beka qori vua o bubuluitaka mo lomana? E levu tale tu na sala e rawa ni wali kina na veiba.

Dauveikauaitaki. E kaya na iVolatabu ni “sega ni cudrucudru” na loloma. (1 Korinica 13:4, 5) Kua gona ni cudru ni o rogoca eso na vosa mosimosi me vaka: “O sega ni dau vakarorogo” se “O dau bera tu ga.” Ia saga mo kila na vuna e cavuti kina na vosa qori. Kena ivakaraitaki: Ke tukuni, ni “o sega ni dau vakarorogo” e rawa ni kena ibalebale: “Au raica ni o sega ni dau kauaitaka na noqu rai.”—iVakavuvuli vakaivolatabu: Vosa Vakaibalebale 14:29.

Drau saga vakaveiwatini mo drau walia vata na leqa

Vosa vakamalua. Ena katakata tiko ga na veiba ke sega ni tarovi. Ena yasana adua, o rawa ni tarova me kua ni tini vaka ca. Na cava mo cakava? E kaya na ivola Fighting for Your Marriage: “E levu na gauna e dau iwali ga ni veiba na vosa vakamalua, kei na nomu kauaitaka na rai nei watimu.”—iVakavuvuli vakaivolatabu: Vosa Vakaibalebale 26:20.

Dauveinanumi. E kaya na iVolatabu: “Me kua ni dua e qara na ka e yaga ga vua, me qara tale ga na ka e yaga vei ira tale eso.” (1 Korinica 10:24) Ke drau dau saga vakaveiwatini mo drau walia vata na leqa, drau na sega ni veicudruvi, veiba, se veigaluvi.—iVakavuvuli vakaivolatabu: Dauvunau 7:9.

Na veigaluvi e sega ni tokona na ka e tukuna na iVolatabu: “Ia o kemuni na tagane moni lomana tale ga na dui watimuni me vaka ga nomuni lomani kemuni; ia na yalewa me dokai watina vakalevu.” (Efeso 5:33) Vakacava mo drau veivosakitaka vakaveiwatini ni drau na sega tale ni veigaluvi?