DE DUA o na kurabuitaka ni rau veiwatini ga o Inise kei Vereti.

O Vereti e vakataki ira ga e levu era dau vakayacora na ivalavala kaukaua e vale, e dau yalovinaka ga nira rai tu na tamata, se o rau na vugona. Ia e dau voravora ni rau tu ga vakaveiwatini.

E levu na tagane vakataki Vereti era susu ena vuvale e dau yaco kina na ivalavala kaukaua. Nira sa uabula era nanuma ni sega ni  cala ke ra vakayacora na ivalavala kaukaua, era nanuma tale ga ni sa ivakarau ga ni noda bula. Ia e sega ni dina qori, ni levu mada ga era kurabuitaka na nodra dauvakalolomataki watidra na tagane.

Ia sa qai levu tiko ga na ivalavala kaukaua e yaco e vale. Kena ivakaraitaki e Merika, e laurai ena dua na vakadidike ena vanua era dau kere ivakasala kina na lewenivanua me baleta na itovo kaukaua e vakayacori e vale, ni rauta e 16 na qiri e ciqomi ena veiyadua na miniti ena dua na siga. Sa yaco tale ga e veiyasa i vuravura na ivalavala kaukaua e dau caka e vale, e laurai mada ga ena itovo vakavanua, vanua ni cakacaka, kei na levu na isoqosoqo. E sega ni vakabekataki ni tubu tiko ga na iwiliwili ni ivalavala kaukaua e vale baleta ni levu mada ga na kisi era sega ni ripotetaki. *

Na ripote ni ivalavala kaukaua e vale e vakavuna mera taroga kina e levu: E rawa vakacava vua e dua na tagane me vakalolomataki ira nona lewenivuvale, vakabibi o watina? E rawa beka nira vukei mera veisautaka na nodra itovo?

Era vakabauta na iVakadinadina i Jiova, era vakarautaka na mekesini qo, ni ivakasala yaga ena iVolatabu ena veisautaka na nona itovo e dua na isa ni vakawati e dau vakayacora na ivalavala kaukaua. E sega ni rawarawa qori, ia e rawa nira veisau. E levu era sa muduka nodra ivalavala kaukaua nira vulica na iVolatabu, era sa dau yalololoma qai veidokai. (Kolosa 3:8-10) Dikeva mada na nodrau ivakaraitaki o Troy kei Valerie.

Vakacava na nomudrau veimaliwai e liu?

Valerie: A sabaki au o Troy ena bogi keirau veimusumusuki kina, mani dabuiloa tu na  mataqu me dua na macawa. A kere veivosoti qai yalataka ni na sega ni cakava tale. Ia au vuki rogoca ga na vosa qori ni oti e vica na yabaki neirau vakawati.

Troy: Au dau cudruvaka na ka kece ga—ke bera mada ga na vakarautaki ni kakana. Dua na siga au mokuti Valerie ena dakai. Dua tale na gauna au mokulaki koya sara ga vakaca, au nanuma ni sa mate. Au vakarerei koya mada ga ena noqu biuta e domoi luvei keirau tagane na isele qai tukuna niu na vakamatei koya.

Valerie: Au dau rerevaki Troy. So na gauna au dro mai vale, qai lesu tale ni sa malumu na nona cudru. Dina ni mosimosi na nona dau mokulaki au, ia e mosimosi sara na vosa e tauca.

Troy, e sa ivakarau ga ni nomu bula na ivalavala kaukaua?

Troy: Io, e se tekivu niu se gone. E voravora na ivakarau ni bula au susugi kina. Au dau rai sara tu ga ni mokulaki Na o Ta, e dau mokulaki ratou tale ga na taciqu. Ni rau sa veibiu, a tiko vata tale o Na kei na dua na tagane, e dau mokulaki koya tale ga. A kucuvi au kei ganequ, mani bala kina e valeniveivesu. Ia qori e sega ni ulubale ni noqu itovo kaukaua.

Valerie, na cava o sega ni via biubiu kina?

Valerie: Niu rere. Au dau veinanuyaka, ‘Vakacava ke saga me vakamatei au kei rau na noqu itubutubu? Keu ripotetaki koya, sa na qai ca sara na ka ena cakava.’

A veisau vakacava na ituvaki?

Troy: A tekivu vulica o watiqu na iVolatabu kei ira na iVakadinadina i Jiova. Au vuvutaki ira ena imatai ni gauna, au nanuma tale ga meu taqomaki koya mai na matalotu dau “muri tamata” ya. Qori sa qai voravora ga kina noqu itovo vei Valerie kei ira na iVakadinadina. Ia dua na siga a curu i valenibula o Daniel na luvei keirau tagane yabaki va e dau manumanusoni, e rauta e tolu na macawa nona curu tu. Ena gauna kece qori, dua na ka nodra veivuke na iVakadinadina—era veivuke tale ga ena nona qaravi o Desiree na luvei keirau yalewa yabaki ono. E dau yadravi Daniel ena bogi o Valerie, qai dau bole e dua na iVakadinadina me sosomitaki koya ena siga me rawa ni vakacegu o Valerie. E tarai au sara ga na nodra yalololoma na iVakadinadina—o ira sara ga au dau sevaka.  Niu raica nodra ivakaraitaki, au sa qai kila nira lotu vaKarisito dina, au mani kerea mera vakavulici au ena iVolatabu. Au vulica kina na ka e dodonu me cakava na tagane vei watina kei na ka e sega ni dodonu me cakava. Au muduka na noqu ivakarau ni bula voravora. Toso na gauna, au sa dua na iVakadinadina i Jiova.

Na ivakavuvuli vakaivolatabu cava a vukei iko mo veisau?

Troy: E levu sara na ivakavuvuli vakaivolatabu e vukei au. E tukuna na 1 Pita 3:7, ni dodonu meu “dokai” watiqu. E uqeti au na Kalatia 5:23 meu dau “yalomalua” qai ‘lewai au vinaka.’ E vakacala na “vosavakacaca” na Efeso 4:31. E tukuna na Iperiu 4:13 ni “luvawale qai laurai levu na ka kece” vua na Kalou. E raica gona na Kalou na noqu ivalavala, dina nira sega ni raica eso tale. Au vulica tale ga ni dodonu meu biuta noqu ilala makawa, ni “ilala ca e vakacacana na itovo vinaka.” (1 Korinica 15:33) O ira ga na noqu ilala makawa era dau uqeta me voravora noqu itovo. Era nanuma ni dodonu mera mokulaki na yalewa me rawa nira vakarorogo.

Cava nomu rai ena gauna qo me baleta na nomudrau vakawati?

Valerie: Sa 25 na yabaki qo nona dua na iVakadinadina i Jiova o Troy. Ena gauna kece qori e dau lomani au, yalololoma qai kauaitaki au dina.

Troy: Au na sega ni veisautaka rawa na ca au vakavuna ena noqu vuvale, e cala tale ga na ka au dau cakava vei watiqu. Ia au vakanamata ena gauna sa na vakayacori kina na Aisea 65:17, nida sa na sega ni vakasamataka tale na veika ca eda cakava tu e liu.

Dua nomudrau ivakasala vei ira na vuvale era vakila tiko na ivalavala kaukaua?

Troy: Ke dau kaukaua na nomu vosa se voravora nomu ivalavala vei ratou e vale, ena vinakati mo cakava kina e dua na ka. E levu na ka e rawa ni vukei iko. Ia au muduka rawa noqu ivakarau ni bula voravora ena noqu vulica na iVolatabu kei ira na iVakadinadina i Jiova, kei na noqu dau maliwai ira.

Valerie: Kua ni vakatauvatana na kemu ituvaki kei na dua tale se rogoca na ka era nanuma eso me baleta na ivakarau ni bula e ganiti iko. Dina ni na sega ni tautauvata na ka eda vakatulewataka, ia au marau ga niu sega ni biuti watiqu, qai vinaka na neirau veimaliwai.

E tukuna na iVolatabu: “E vakavuna na Kalou na volai ni iVolatabu kece, e yaga me veivakavulici, me veivunauci, me veivakadodonutaki.” (2 Timoci 3:16) Me vakataki Troy sa cavuti oti mai, e levu era dau vakayacora na ivalavala kaukaua vei watidra era sa veisautaka nodra rai kei na nodra itovo nira muria na ivakasala ena iVolatabu.

O via kila e levu tale na sala ena yaga kina ena nomu vakawati na iVolatabu? Me ikuri ni ivakamacala, taroga e dua na iVakadinadina i Jiova se rai ena www.jw.org.