Raica sara na lewena

Raica na lewenivola

 NA RAI NI IVOLATABU

Bula

Bula

E kauaitaka na Kalou na ka eda cakava e yagoda?

“Mo kakua ni tiko kei ira era daugunu waini, kei ira era daukusikusima.”Vosa Vakaibalebale 23:20.

VUNA E BIBI KINA

Na iVolatabu e sega ni ivola vakavuniwai; se me lewa na ka kece meda cakava na tamata. Ia ena vukei iko mo kila na rai ni Kalou me baleta na bula.

KA E KAYA NA IVOLATABU

E levu na tikinivolatabu e vakamacalataka na rai ni Kalou me baleta na ka eda cakava e yagoda. Kena ivakaraitaki, e vakacala na iVolatabu eso na ka e rawa ni veivakaleqai ke vakayagataki vakasivia, me vaka na kakana kei na gunu. (Vosa Vakaibalebale 23:20) Na Lawa ni Kalou a soli vei ira na Isireli, a vakamacalataki kina eso na ka mera cakava mera kua kina ni tauvimate. E okati tale ga ena Lawa qori eso na idusidusi matata mera muria me kua kina na vakacalaka. (Vakarua 22:8) Koya gona na iVolatabu e uqeti keda meda taqomaka noda bula, e vakamacalataka tale ga na sala meda bulabula vinaka kina.

 Na cava e tukuna na iVolatabu me baleta na vu ni noda tauvimate?

“Ena vuku ni dua ga na tamata e curu kina i vuravura na ivalavala ca kei na mate ena vuku ni ivalavala ca.”Roma 5:12.

KA ERA TUKUNA ESO

Era vakabauta e levu ni tauvimate e dua ga na vakacalaka a vu mai na bula vakaidewadewa. Era nanuma eso tale nira vakavuna na tauvimate na ka bula vakayalo tawarairai, me vakataki ira na timoni.

KA E KAYA NA IVOLATABU

E vakamacalataki ena iVolatabu nida tauvimate baleta ni rau a talaidredre na vuda vua na Kalou. (Roma 5:12) Rau a uasivi tu o Atama kei Ivi ni bera ni rau talaidredre. Erau kila vinaka sara tu ga ni rau na mate ke rau sega ni muria na ivakasala ni Kalou. (Vakatekivu 2:16, 17) Ia erau nakita me rau saqata na Kalou, rau vakayalia kina nodrau bula uasivi. *

Ni rau sa sega tale ni uasivi na vuda, era sa sega tale ga ni uasivi na nodrau kawa. Koya gona, se mani vakacava na noda sasaga meda vakaotia na tauvimate, eda na tauvimate tiko ga.

KA O RAWA NI CAKAVA

E vakavulica na iVolatabu nida na marautaka na bula uasivi ena dua na vuravura parataisi ke da muria na ivakasala vuku ni Kalou. (Aisea 33:24) E yalataka na Kalou ni na vakaotia na rarawa, tauvimate kei na mate.Vakatakila 21:3, 4.

E vakacala beka na iVolatabu na veiqaravi vakavuniwai?

“E sega ni yaga na vuniwai vei ira na bula vinaka, e yaga ga vei ira na tauvimate.”Maciu 9:12.

KA ERA TUKUNA ESO

Eso era uqeta na veimasulaki mai na veiqaravi vakavuniwai.

KA E KAYA NA IVOLATABU

E vakadonui ira na vuniwai na Kalou mera qaravi ira na nona tamata ena gauna vakaivolatabu. (Vakatekivu 38:28; Kolosa 4:14) E sega ni tukuni ena iVolatabu ni cata na Kalou na vakayagataki ni draunikau me wainimate, na waiwai, na kana musu, kei na so tale na veiqaravi. O Jisu mada ga a tukuna ni “sega ni yaga na vuniwai vei ira na bula vinaka, e yaga ga vei ira na tauvimate.”Maciu 9:12.

Ia eso na mataqali veiqaravi e vakacala na iVolatabu. Kena ivakaraitaki, e sega ni uqeta na iVolatabu na veimasulaki e caka tu nikua. E sega tale ga ni vakadonuya na Kalou na veivakabulai e okati kina na vakatevoro. (Kalatia 5:19-21) Eda na sega gona ni muria na ivakarau ni veiqaravi e vakacala na iVolatabu, ia eda na saga ena kena gauna totolo duadua meda qara na veiqaravi veiganiti ke tiko.

^ para. 10 Ena vakayagataki tiko ena ulutaga qo na vosa “uasivi,” me dusia na nodrau bulabula vinaka na imatai ni tamata a bulia na Kalou, erau sega ni tauvimate, erau sega tale ga ni mate.