Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 VAKATAROGI | BRETT SCHENCK

“Au Vakadeitaka ni Bulia na Veikabula na Kalou”

“Au Vakadeitaka ni Bulia na Veikabula na Kalou”

O Brett Schenck a dua tu na daunivakasala ni veikabula mai Merika. A vulica na sala era cakacaka vata kina na kau, manumanu, kei na nodra itikotiko. Na cava e vakabauta kina na Dauveibuli? A vakatarogi koya na Yadra! me baleta na nona cakacaka vakasaenisi kei na nona vakabauta.

Vakamacalataka mada nomu isususu.

E idinia o tamaqu qai dau vakamacalataka vei au na veika me baleta na fika kei na ka vakasaenisi. Niu se gone, au dau taleitaka na kau kei na manumanu era bula ena tobu kei na drekeniwai volekata neitou vale mai New Paris, Ohio, Merika. Qori na vuna au lai vulica kina ena Purdue University na veikabula.

O dau taleitaka na lotu?

Io. A uqeti au o tamaqu meu kila vinaka na lotu keitou lewena na Lutheran. Au vulica na vosa kilai levu vaKirisi na Koine, e dua vei ira na vosa a volai taumada kina na iVolatabu. Au doka vakalevu na iVolatabu.

Cava mada nomu rai me baleta na bula vakaidewadewa?

E duavata na neitou lotu kei na ivakavuvuli qori. Era vakabauta tale ga noqu itokani, au mani sega ni via vaqaqa na kena dina. Au vakabauta tale ga na Kalou qai nanuma ni rau salasalavata kei na ivakavuvuli ni bula vakaidewadewa. Au doka na iVolatabu, ia au sega ga ni vakabauta ni vakavuna na Kalou na kena volai.

Na cava e veisau kina nomu rai me baleta na iVolatabu?

E dua na veiwatini iVakadinadina i Jiova o Steve kei Sandy, rau sikovi keirau mai kei Debbie na watiqu. Erau vakaraitaka ni sega ni ivola vakasaenisi na iVolatabu, ia e donu na veika vakasaenisi e volai kina. Kena ivakaraitaki, e kaya na iVolatabu me baleta na Kalou: “Sai koya ga sa tiko maicake ka toka era ko vuravura [se “vuravura mokimokiti,” NW].” (Aisea 40:22) E tukuna tale ga: “Sa vakarubeci vuravura e na ka sa sega.” (Jope 26:7) Au drukataka sara ga na ka e tukuna na tikinivolatabu qori baleta niu dau vakayagataka ena gauna ya na itaba ni satellite meu dikeva kina na veikabula. Na tikinivolatabu qori a volai makawa sara ni bera ni dua a tabaka na vuravura mokimokiti e ciri tu e maliwalala. Ena nodrau veivakavulici o Steve  kei Sandy, keirau kila kina na parofisai era sa vakayacori, ivakasala yaga ena neirau bula, qai veivakacegui tale ga na ka erau tukuna. Ni toso na gauna au vakadinata ni Vosa dina ni Kalou na iVolatabu.

Na cava e veisautaka na nomu rai me baleta na itekitekivu ni bula?

Sa qai vakaraitaka vei au o Steve na ka sara ga e tukuna na iVolatabu: “A sa bulia na tamata na Kalou ko Jiova mai na kuvu ni qele.” (Vakatekivu 2:7) Na imatai mada ga ni tamata e tiko na kena volaitukutuku. Au mani lomatarotarotaka: E tokona beka na iVolatabu na veika vakasaenisi? A uqeti au o Steve meu vakadidike kina, au mani cakava sara.

Na cava o dikeva me baleta na bula vakaidewadewa?

E levu dina na ka. Meu tukuna mada ga e dua, o ira na vakabauta na bula vakaidewadewa era via vakamacalataka na itekitekivu ni bula. Na veikabula e tiko na tikiniyagodra mera bula kina me vaka na uto, yatevuso, kei na mata. E laurai tale ga ena iloilo ni vakalevutaki ka, na vakasakiti ni nodra cakacaka na sela somidi. O cei a bulia na cakacaka ni sela qori? Era kaya na vakabauta na bula vakaidewadewa ni yaco ga vakacalaka na nodra digitaki na sela vinaka me rawa ni vinaka cake tiko ga kina na ibulibuli ni dua na ka bula. Ia na ivakavuvuli qori e sega ni saumi kina na taro: O cei e bulia na nodra cakacaka vakasakiti na sela? E levu na saenitisi era vakabauta ni sega ni sauma rawa na taro qori na ivakavuvuli ni bula vakaidewadewa. A tukuna vei au e dua na parofesa e dau dikeva na manumanu ni sega ni vakabauta na ivakavuvuli ni bula vakaidewadewa. Ia a sega ni via saqata na ivakavuvuli qori de na qai vakacegui mai na nona cakacaka.

Vakacava e vakaukauataka nomu vakabauta nomu vulica na veikabula?

Io. E okati ena noqu cakacaka na noqu vulica na nodra cakacaka vata na veikabula. Era cakacaka vata na ka bula kece e vuravura. Kena ivakaraitaki, na oni kei na senikau. Na roka ni senikau, totoka ni kena iboi, kena wai kamica, e buli mera taleitaka na oni, me rawa tale ga ni kabiti ira na kuvunikau. Nodra cakacaka na oni mera gunuva na wai kamica ni senikau qai kauta na kuvunikau mera vakamautaki kina eso tale na senikau. Koya gona, era buli na senikau kei na oni mera cakacaka vata.

‘Niu vakasamataka na vakasakiti ni nodra itikotiko na veikabula, au vakadeitaka ni bulia na ka kece na Kalou’

Eda vakadinadinataka na nodra dau cakacaka vata na veikabula nida raica na nodra itikotiko. De dua era bula kina e vica vata na udolu na veimataqali manumanu, kau, beketiria kei na karou (fungi). Na manumanu kece era vakararavi ena kau me vakarautaka na kedra kei na cagi bulabula mera ceguva, e levu tale ga na senikau era vakararavi ena manumanu. E vakasakiti dina na nodra itikotiko na veikabula, e rawarawa tale ga mera vakaleqai na ka era bula kina, ia era se rawa ga ni bula me vica vata na udolu na yabaki. Ke benuci mada ga na itikotiko qori, ena rawa ni vakavoutaki koya tale ni toso na gauna. Niu vakasamataka gona na vakasakiti ni nodra itikotiko na veikabula, au vakadeitaka ni bulia na veikabula na Kalou.

Na cava o dua kina na iVakadinadina i Jiova?

Au kauaitaka vakalevu na nodra vakacacana tiko na tamata na nodra itikotiko na veikabula. Au kila ni rawa nira bula dede na veikabula e vuravura, ia era rawa tale ga ni vakarusai. Au vulica vei ira na iVakadinadina i Jiova na ka e kaya na iVolatabu, ni Kalou ena “vakawabokotaki ira . . . na vakarusai vuravura tiko.” (Vakatakila 11:18) E uqeti au dina na vosa qori. Niu tomana noqu vulica na iVolatabu, au sa qai kila ni na yaco dina na ka e yalataka na iVolatabu.

Au marautaka na noqu dau vunautaka vei ira eso tale na noqu vakabauta, au sa vakavulici ira tale ga eso na saenitisi ena iVolatabu. Au vakacegu mai na noqu cakacaka niu sa yabaki 55, me levu kina noqu gauna ena nodra vakavulici na tamata mera kila na Dauveibuli kei na nona inaki me baleta na noda vuravura vakasakiti.