“Ufiopidem” Omụm Isọn̄—Nte Usọbọ Odu?

ISỌN̄ ke ofiop nte ọmọn̄ obụbede ikan̄. Se itịbede ke obio Newtok ke Alaska owụt ke ufiopidem enen̄ede omụm isọn̄. Ikpehe oro ekedide ice, emi Newtok odude ọtọn̄ọ nditara. Frank emi odụn̄de do ekeseme ete: ‘Nyomke aba ndidụn̄ mi. Enye ebịt akaha.’ Mme ndụn̄ọde oro ẹnamde ẹwụt ke ekeme ndidi mme obio mbenesụk emi idisịmke isua duop.

Itieutom oro ẹsede ẹban̄a idaha eyo ẹdọhọ ke “eyo enen̄ede ofiop.” Nte eyo ofiopde owụt ke se itieutom emi ẹtịn̄de edi akpanikọ. Idaha eyo ndikpụhọde edi ntak unana edịm, ọkpọsọn̄ ufiop, ọkpọsọn̄ edịm, ye oyobio ke ofụri ererimbot. Nso iditịbe inọ isọn̄ emi? Nte usọbọ odu?

Ndifiọk Se Ifịnade Isọn̄

Isọn̄ etie nte owo udọn̄ọ emi odude ke ufọkibọk, ndien ntaifiọk oro ẹkpepde n̄kpọ ẹban̄a idaha eyo ke ẹse enye idem. Satallite ke ese nte ice atarade eketre; mme andise n̄kpọ mban̄a edịm ke ẹse udomo edịm oro edepde; masịn ke odomo nte inyan̄ibom ofiopde m̀mê ebịtde etre; enyene ubomofụm emi odomode ofụm ke enyọn̄. Ẹtan̄ kpukpru ntọt emi ẹdọn̄ ke ata ikpọ kọmputa. Ntaifiọk ẹkeme ndifiọk nte idaha eyo editiede ke ini iso, idem ke ediwak isua ikie ke iso.

Nso inam isọn̄? Ndusụk owo ẹdọhọ ke ofụm oro esinamde isọn̄ enen̄ede ofiop ọyọyọhọ kpukpru ebiet. Time magazine ọdọhọ ke nte ofụm okofiopde ke ofụri ererimbot ke 2006 kpọt ama akak inyan̄ uyo. Utọ ofụm oro anam isọn̄ enen̄ede ofiop. Nso iditịbe inọ isọn̄ ke ini iso? Itieutom oro ẹsede ẹban̄a idaha eyo ẹdọhọ ke edieke ẹkade iso ẹsabade ofụm nte ẹsụk ẹsabarede idahaemi, ke “idaha eyo oyokpụhọde ofụri ofụri ke ofụri ererimbot”; oro onyụn̄ ekeme ndinam idaha eyo ọdiọk akan emi. Ediwak owo ẹdọhọ ke se idisiode isọn̄ ke afanikọn̄ emi edi nditehede ube ke nte ẹsabarede ofụm. Nte ededi,  idem ọkpọkọm ẹtetehede ube ke nte ẹsabarede ofụm idahaemi, kọmputa oro esinamde ntaifiọk ẹfiọk nte idaha eyo editiede owụt ke etie nte “isọn̄ edisụk akaka iso ofiop ke ediwak isua ikie.”

Anie Ekeme Nditịn̄ Se Iditịbede Inọ Isọn̄?

Imemke utom ndifiọk nte idaha eyo editiede. N̄wed Earth Observatory oro odude ke Intanet obụp ete: “Nso iditịbe inọ ntọn̄enyọn̄ nte Isọn̄ akade-ka iso ofiop? Ndi ntọn̄enyọn̄ oro etiede nte ọkọm oro mîyakke ufiop enen̄ede esịm isọn̄ ayatara, anamde isọn̄ emi enen̄ede ofiop? N̄wed emi ọbọrọ ete: “Ntaifiọk ikemeke ndibọrọ mbụme emi idahaemi.”

Edi Bible ọsọn̄ọ ke Jehovah Abasi edi “andinyene enyọn̄ ye isọn̄,” ke enye okonyụn̄ emen “afia enyọn̄ owụk ke ikpa-enyọn̄.” (Genesis 14:19; Mme N̄ke 8:28) Abasi ọdọhọ ke imọ ikeme “ndibat mbubịt enyọn̄ ke ifiọk.” Ke akpanikọ, Jehovah etịm ọfiọk se ntaifiọk mîfiọkke.—Job 38:37.

Kop se Abasi eketịn̄de mi ke Bible n̄kpọ nte isua 2,700 emi ẹkebede aban̄a edịm: ‘Edịm oto enyọn̄ osụhọde, ndien ifiakke ika do, tutu ẹbịt isọn̄.’ (Isaiah 55:10) Omokụt do nte Abasi adade ikọ ifan̄ kpọt etịn̄ nte mmọn̄ esisan̄ade akanade! Uye mmọn̄ esidọk enyọn̄ akakabade idiọkenyọn̄ oro esidepde edịm onyụn̄ “ebịt isọn̄.” Eyo ama amia isọn̄, anam uye ‘afiak aka do,’ oro edi ikpaenyọn̄, man afiak ekedep ebịt isọn̄. Ke ata anyan ini ko, Bible ama etetịn̄ n̄kpọ aban̄a idaha eyo mbemiso ntaifiọk ẹdifiọk. Ndi oro inamke nnyịn inen̄ede ibuọt idem ke Andibot ye ke se enye ekemede ndinam? Mmọdo, edieke iyomde ndifiọk se iditịbede ke ini iso ke emi idaha eyo ọdiọkde ntem, nte ikpowụtke ifiọk ndibịne Enye emi Bible okotde ‘ete edịm’ ye ‘andibon ntọi mbara,’ kpa enye emi ọfiọkde nte ekondo emi asan̄ade?—Job 38:28.

Ẹkebot Isọn̄ ye Uduak

Okposụkedi mme owo ẹnyenede nsio nsio ekikere ẹban̄a se iditịbede inọ isọn̄, se ikpenyenede ndifiọk edi nte ke isọn̄ emi inyeneke mbiet. Enye itiehe nte mme ekondo eken, mme odu-uwem n̄kpọ ẹyọyọhọ isọn̄ ke utọ ke utọ. Nso inam mme odu-uwem n̄kpọ ẹdu ke isọn̄? Ntaifiọk ẹnọ nsio nsio ntak. Mmọn̄ odu barasuene ke isọn̄; isọn̄ ikpereke inyụn̄ iyomke usụn̄ ikpọn̄ utịn ikaha; ofụm oro onyụn̄ odude ke isọn̄ ekem ye se mme odu-uwem n̄kpọ ẹyomde.

Idem ekeme ndikpa fi ndifiọk ke n̄wed Genesis etịn̄ aban̄a nsio nsio n̄kpọ emi. Ke uwụtn̄kpọ, Genesis 1:10 ọdọhọ ke Abasi okokot “mmọn̄ emi obohode, ete Inyan̄”—emi owụt ke mmọn̄ enen̄ede awak ke isọn̄.  Genesis 1:3 okot ete: “Ekem Abasi ọdọhọ ete, Yak un̄wana odu: ndien un̄wana odu.” Isọn̄ ikpereke utịn ikaha tutu edi se kpukpru mmọn̄ oro odude ke isọn̄ ọdọk enyọn̄ nte uye, ndien ntak edi oro ikade iso inyene mmọn̄ ke isọn̄.

Genesis 1:6 ọdọhọ ke Abasi akanam “ikpa-enyọn̄.” Ufan̄ikọ 11 ye 12 ẹtịn̄ nte Abasi anamde mbiet, ikọn̄, ye eto. Kpukpru emi ẹwụt ke ofụm oro ẹkotde oxygen odu, kpa se mme owo ye mme unam ẹn̄wekde ẹdu uwem.

Nso ndien ke ikpetịn̄? Anaedi ama enyene se ikanamde Abasi obot isọn̄ onyụn̄ owụk enye ke ata nnennen itie, anam akpakịp mmọn̄ odu, onyụn̄ obot ofụm oro owo ye unam ẹkemede ndin̄wek ndu uwem. Bible asian nnyịn ke ‘Abasi ikobotke isọn̄ ke ikpîkpu, edi ke okobot enye man ẹdụn̄ ke esịt.’ (Isaiah 45:18) Psalm 115:16 ọdọhọ ke “Enyọn̄ edi heaven Jehovah: edi enye ada isọn̄ ọnọ nditọ owo.” Ih, Abasi okobot isọn̄ man mme owo ẹdụn̄ọ.

N̄wed Abasi ọdọhọ ke Abasi okobot akpa n̄wan ye ebe enịm ke In̄wan̄ Eden, kpa ediye paradise. Mmọ ẹkenyene ‘ndidiọn̄ nnyụn̄ n̄kpeme enye.’ (Genesis 2:15) Abasi ama ọdọhọ mmọ n̄ko ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye.” (Genesis 1:28) Kam kere utọ utịbe utịbe ini iso oro Abasi ọkọnọde mmọ! Mmọ ẹkenyene ndinam ofụri ererimbot akabade Paradise ẹnyụn̄ ẹdụn̄ do ke nsinsi. Nso utịbe utịbe ini iso ke oro ekedi ntem!

Edi n̄kpọ mfụhọ nditịn̄ ke akpa ete ye eka nnyịn ẹma ẹmek ndisọn̄ ibuot ye Abasi, kpa utọ uwem oro ekese owo ẹdude mfịn. (Genesis 3:1-6) Nso idi utịp? Utu ke ndidiọn̄ isọn̄ nnyụn̄ n̄kpeme enye, owo akam ‘ososobo isọn̄’ ke usụn̄ oro akanam owo mîsoboke. (Ediyarade 11:18) Edi se ikemede ndidọn̄ nnyịn esịt edi nte ke Abasi ikpụhọke uduak esie. Bible ọn̄wọn̄ọ ete: “[Abasi] odori isọn̄ ke itie esie, idisehekede ke nsinsi-nsinsi.” (Psalm 104:5) Jesus ama ọn̄wọn̄ọ n̄ko ke Ukwọrọikọ esie ke Obot ete: “Inemesịt edi eke mme enyene ifụre ifụre ido, koro mmọ ẹyeda isọn̄ ẹnyene.” (Matthew 5:5) Emi edisan̄a didie etịbe?

Nyayama Ini Iso

Akani adaibuot ukara United States ọkọdọhọ ke “mfịna eyo edi mfịna ofụri ererimbot.” Ntem, nte afo unyịmeke ke oyom ẹkọk mfịna emi ke ofụri ererimbot? Jesus Christ ama etịn̄ se idikọkde mfịna emi—Obio Ubọn̄ Abasi. Enye ọkọdọhọ mme mbet esie ẹbọn̄ akam ete: “Yak obio ubọn̄ fo edi.” (Matthew 6:9, 10) Ntịn̄nnịm ikọ Bible anam ifiọk ke Obio Ubọn̄ heaven emi edi ukara ofụri ererimbot oro edisọpde “[anuak] onyụn̄ ama kpukpru mme idụt emi [oro edi, ukara eyomfịn].” (Daniel 2:44) Ke adianade do, enye “[oyosobo] mmọ oro ẹsobode isọn̄.” (Ediyarade 11:18) Ke akpanikọ,  Abasi oyokot mbon oro ẹsobode isọn̄ ẹdinam ibat onyụn̄ osobo mmọ.

Nso ndien iditịbe inọ isọn̄ nnyịn oro ẹma ẹkebiat mi? Fiọk ete ke ini Jesus okodude ke isọn̄, enye ama owụt ke imenyene odudu ikan mme utọ n̄kpọ nte ofụm ye inyan̄. Enye eketịn̄ ikọ ifan̄ kpọt akwa oyobio odobo. (Mark 4:35-41) Jesus emi edide “Ọbọn̄ mbọn̄ ye Edidem ndidem” eyenen̄ede akara isọn̄ onyụn̄ enyene odudu akan mme n̄kpọ-obot nte ofụm ye inyan̄. (Ediyarade 17:14) Ke nditịm ntịn̄, Jesus okokot ukara esie “ini ẹdifiakde ẹbot mme n̄kpọ.” (Matthew 19:28) Edisana Ŋwed Abasi Ibom ọdọhọ ke ukara Jesus edidi “ini ẹdinamde n̄kpọ ẹkabade ẹdi mbufa.” Jesus ayafiak obot, m̀mê anam isọn̄ edi obufa, man eketie nte In̄wan̄ Eden. Paradise ayafiak odu ke isọn̄. (Luke 23:43) Ih, Obio Ubọn̄ Abasi oyosio isọn̄ ke afanikọn̄.

Idem idahaemi, afo emekeme ndibọ ufọn nto ukara Obio Ubọn̄ Abasi. Didie? Jesus ọkọdọhọ ke “ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” (Matthew 24:14) Emi anam ediwak miliọn owo ẹkop eti mbụk emi, ẹnyụn̄ ẹkpụhọde uwem mmọ. Ndusụk mmọ ẹtre mbumehe oro ekemede ndiwot owo. Uwem ubon mmọ ọfọn akan nte ekedide. Mbon oro ẹkesuade kiet eken sia ẹtode nsio nsio orụk ẹkabade ẹma kiet eken. Ke akpanikọ, Obio Ubọn̄ Abasi ke anam se ukara owo ndomokiet mîkemeke ndinam. Enye anam n̄kpọ nte owo miliọn itiaba ke idụt 235 ẹkabade nditọeka. Ih, sia mmọ ẹdude ke idak Obio Ubọn̄ Abasi, ke ẹtịm mmọ idem idahaemi ndidu ke nsinsi ke Paradise ke isọn̄ emi.

Isọn̄ ọyọbọhọ. Afo akpakam etiene ọbọhọ!

[Ndise ke page 27]

Ke ata anyan ini ko, Bible ama etetịn̄ nte mmọn̄ esisan̄ade akanade mbemiso ntaifiọk ẹdifiọk

[Ndise ke page 28]

Jesus “aduat ofụm onyụn̄ ọdọhọ inyan̄ ete: ‘Dobo! Na sụn̄!’ Ndien ofụm odobo, onyụn̄ ana sụn̄”

[Ndise ke page 29]

Isọn̄ idifiopke aba ntem ke ini enye edifiakde edi Paradise

[Ebiet Ẹdade Ndise Ẹto ke page 26]

Godo-Foto