Luke 23;1-56
23 Ntre mmọ ẹdaha ke enyọn̄ ke akwa udịm, kpukpru mmọ, ẹnyụn̄ ẹda enye ẹsọk Pilate.+
2 Ndien mmọ ẹtọn̄ọ ndidori enye ikọ,+ ẹte: “Nnyịn imokụt owo emi nte abiatde+ idụt nnyịn onyụn̄ akpande ete ẹkûkpe tax+ ẹnọ Caesar onyụn̄ ọdọhọde ete ke imọ idi Christ edidem.”+
3 Edi Pilate obụp enye ete: “Nte afo edi edidem mme Jew?” Enye ọbọrọ ete: “Afo ke idemfo ọdọhọ.”+
4 Ekem Pilate ọdọhọ mbọn̄ oku ye otuowo ete: “N̄kwe nte owo emi abiatde ibet.”+
5 Edi mmọ ẹsọn̄ọ ẹdọhọ ẹte: “Enye esịn ntịme ke otu mbio obio ke ndikpep mmọ n̄kpọ ke ofụri Judea, ọtọn̄ọde ke Galilee tutu esịm mi.”
6 Ke ini Pilate okopde emi, enye obụp m̀mê owo oro edi eyen Galilee,
7 ndien, ke ini odụn̄ọrede ọfiọk ete enye oto ikpehe ukara Herod, enye ọnọ enye ẹsọk Herod,+ emi nde okodude ke Jerusalem ke mme usen oro.
8 Ke ini Herod okụtde Jesus, enye adara etieti, koro enye okoyoyom ke anyan ini ndikụt+ enye koro okokopde+ aban̄a enye, ama onyụn̄ odori enyịn ete iyokụt enye anamde ndusụk idiọn̄ọ.
9 Ekem enye ọtọn̄ọ ndibụp enye ata ediwak mbụme; edi enye ibọrọke baba ikọ kiet.+
10 Nte ededi, mbọn̄ oku ye mme scribe* ẹdaha ẹda ẹnyụn̄ ẹdọdiọn̄ ẹdori enye ikọ.+
11 Herod ye mbonekọn̄ ukpeme esie ẹsuene enye,+ ndien enye asak enye nsahi+ ke ndisịne enye nsemnsem ọfọn̄idem, onyụn̄ ọnọ enye ẹfiak ẹda ẹsọk Pilate.
12 Herod ye Pilate+ ke emi ẹkabade ẹdi ufan ye kiet eken kpa ke usen oro; koro mmọ ẹkedide usua ke mbemiso.
13 Ndien Pilate okot mbọn̄ oku ye mme andikara ye mbio obio obon ọtọkiet
14 onyụn̄ ọdọhọ mmọ ete: “Mbufo ẹkeda owo emi ẹsọk mi nte owo emi anamde mbio obio ẹsọn̄ ibuot, ndien, sese! mma ndụn̄ọde enye ke iso mbufo edi n̄kwe ntak+ edori ikọ eke mbufo ẹdoride enye.
15 Ke akpanikọ, Herod ikonyụn̄ ikwe, koro enye ama ọnọ enye ẹfiak ẹda ẹsọk nnyịn; ndien, sese! enye inamke baba n̄kpọ kiet eke odotde n̄kpa.+
16 Ntre nyamia+ enye nnyụn̄ nsana enye nyak.”
17 * ——
18 Edi ofụri udịmowo oro ẹfiori, ẹte: “Men owo emi fep,+ edi sana Barabbas yak nọ nnyịn!”+
19 (Ẹketop owo emi ẹsịn ke ufọk-n̄kpọkọbi ke ntak ndutịme emi enye ekedemerede ke obio ye ke ntak oro enye okowotde owo.)
20 Pilate ọtọn̄ọ ntak okot mmọ, sia enye oyomde ndisana Jesus nyak.+
21 Ndien mmọ ẹtọn̄ọ ndifiori, ẹte: “Kọn̄ enye ke eto! Kọn̄ enye ke eto!”+
22 Enye obụp mmọ ọyọhọ utịm ikata ete: “Ntak-a, nso idiọkn̄kpọ ke owo emi akanam? N̄kwe baba n̄kpọ kiet eke anamde enye odot n̄kpa; ntre nyamia enye nnyụn̄ nsana enye nyak.”+
23 Edi mmọ ẹsọn̄ọ ẹyịre ye ọkpọsọn̄ uyo, ẹyom ẹte ẹkọn̄ enye ke eto; ndien uyo mmọ akan.+
24 Ntre Pilate ọnọ ubiere ete ẹnam se mmọ ẹben̄ede:+
25 enye asana owo emi mmọ ẹben̄ede ayak,+ kpa owo emi ẹkesịnde ke ufọk-n̄kpọkọbi ke ntak ndutịme ye uwotowo, edi ayak Jesus ọnọ mmọ ete ẹnam ye enye nte uduak mmọ edide.+
26 Ndien nte mmọ ẹdade enye ẹdaha, mmọ ẹmụm Simon, amanaisọn̄ eyen Cyrene, emi otode obio-in̄wan̄ edi, ẹnyụn̄ ẹmen eto ndutụhọ ẹnọ enye ẹte obiom etiene Jesus.+
27 Edi akwa udịmowo ye iban emi ẹyịbide idem ke mfụhọ ẹnyụn̄ ẹsemede enye ẹtiene enye.
28 Jesus ọwọn̄ọde ese iban oro onyụn̄ ọdọhọ ete: “Nditọiban Jerusalem, ẹkûtua mi. Ẹkam ẹtua idem mbufo ye nditọ mbufo;+
29 koro, sese! mme usen ke ẹdi emi mme owo ẹdidọhọde ẹte, ‘Mme ada, ye idịbi emi akanam mîmanke eyen ye mme eba eke akanam nditọ mîwapke ẹkop inemesịt!’+
30 Ekem mmọ ẹyetọn̄ọ ndidọhọ ikpọ obot ẹte, ‘Ẹduọn̄ọ ẹfụk nnyịn!’ ẹnyụn̄ ẹdọhọ n̄kpri obot ẹte, ‘Ẹfụk nnyịn!’+
31 Koro edieke mmọ ẹnamde mme n̄kpọ emi ke ini eto esehede, nso iditịbe ke ini eto akpade?”+
32 Edi ẹda owo iba en̄wen n̄ko, emi ẹdide mme anamidiọk, ẹsan̄a ye enye ẹka ndiwot.+
33 Ndien ke ini mmọ ẹsịmde ebiet emi ẹkotde N̄kpọkpọrọ,+ mmọ ẹkọn̄ enye do ke eto ye mme anamidiọk oro, kiet ke nnasia, kiet ke ufien.+
34 [[Edi Jesus ọdọhọ ete: “Ete, fen+ nọ mmọ, koro mmọ mîfiọkke se mmọ ẹnamde.”]] N̄ko-n̄ko, mmọ ẹsịn afia ẹdeme ọfọn̄idem esie.+
35 Ndien mme owo ẹdada ẹse.+ Edi mme andikara ẹsak enye nsahi, ẹte: “Enye akanyan̄a mmọ en̄wen; yak enye anyan̄a+ idemesie ise, edieke enye edide Christ Abasi, kpa Enye Oro Ẹmekde.”+
36 Mbonekọn̄ ẹnyụn̄ ẹda enye ẹnam nsahi,+ ẹsan̄a ẹkpere ẹnyụn̄ ẹnọ enye n̄kpakpai wine+
37 ẹnyụn̄ ẹdọhọ ẹte: “Edieke afo edide edidem mme Jew, nyan̄a idemfo.”
38 N̄ko, ẹma ẹwet n̄kpọ ẹdian ke enyọn̄ ibuot esie ẹte: “Emi edi edidem mme Jew.”+
39 Edi owo kiet ke otu mme anamidiọk emi ẹkọn̄ọde ke eto ọtọn̄ọ ndisụn̄i+ enye ete: “Nte afo udịghe Christ? Nyan̄a idemfo nyụn̄ nyan̄a nnyịn.”
40 Edi enye eken ọbọrọ onyụn̄ asua ọnọ enye ete: “Nte afo usụk ufeheke Abasi, ke emi afo odude kpa ke ubiomikpe oro?+
41 Ke akpanikọ, nnyịn ibọ ufen nte enende, koro nnyịn ibọ ọyọhọ utịp eke odotde ye se nnyịn ikanamde; edi owo emi ikanamke baba ndudue kiet.”+
42 Ndien enye ọdọhọ ete: “Jesus, ti mi ke ini afo odụkde obio ubọn̄ fo.”+
43 Ndien enye ọbọrọ ete: “Ke akpanikọ ke ndọhọ fi mfịn emi, Afo oyodu ye ami+ ke Paradise.”+
44 Ndien, emi ekedi n̄kpọ nte ọyọhọ hour itiokiet,* edi ekịm ofụk ofụri isọn̄ tutu esịm ọyọhọ hour usụkkiet,*+
45 koro un̄wana utịn enịmede; ndien ikpehe+ edisana ebiet asiaha ke ufọt.+
46 Ndien Jesus ofiori ke ọkpọsọn̄ uyo ete: “Ete, mmayak spirit mi nsịn fi ke ubọk.”+ Ke ini enye ama ọkọdọhọ ntem, enye ọduọk akpatre ibifịk.+
47 Ke ini akwa owoekọn̄ okụtde se itịbede, enye ọnọ Abasi ubọn̄, ete: “Ke akpanikọ owo emi ekedi edinen owo.”+
48 Ndien ke ini ofụri otuowo emi ẹkesopde idem do ọtọkiet ndise n̄kpọ emi ẹkụtde se iketịbede, mmọ ẹmia ikpanesịt mmọ ẹnyụn̄ ẹfiak ẹnyọn̄ọ.
49 Akan oro, kpukpru mmọ oro ẹmehede ye enye ẹda nsannsan.+ N̄ko, iban, emi ẹketode Galilee ẹsan̄a kiet ye enye, ẹda do ẹse mme n̄kpọ emi.+
50 Ndien, sese! owo kiet emi ekerede Joseph, emi edide owo Akwa Esop, onyụn̄ edide eti ye edinen owo+—
51 owo emi ikenyịmeke uduak ye edinam mmọ+—enye okoto Arimathea, obio mbon Judea, okonyụn̄ etie ebet obio ubọn̄ Abasi;+
52 owo emi aka ebịne Pilate onyụn̄ ekeben̄e okpo Jesus.+
53 Ndien enye ọkọn̄ọde okpo,+ ada eti linen awan̄ enye, onyụn̄ enịm enye ke udi+ emi ẹketụn̄de ke itiat, eke akanam mînịmke owo ke esịt.+
54 Ekedi usen Mben̄eidem,+ ndien un̄wana mbubreyo sabbath+ ke ekekpere.
55 Edi iban, emi ẹketode Galilee ẹsan̄a ye enye, ẹtiene ke edem ẹnyụn̄ ẹnyụn̄ọ ẹse udi+ ye nte ẹnịmde okpo esie;+
56 ndien mmọ ẹfiak ẹnyọn̄ọ man ẹketịm ufuọn̄n̄kpọ ye enem-utebe aran.+ Edi, mmọ ẹduọk odudu ke sabbath+ nte ewụhọ etemede.
Mme Ikọ Idakisọn̄
^ “Ọyọhọ hour itiokiet,” oro edi, n̄kpọ nte n̄kanika duopeba uwemeyo.
^ “Ọyọhọ hour usụkkiet,” oro edi, n̄kpọ nte n̄kanika ita uwemeyo.
