Anie Ededi Ete Nnyịn eke Heaven Emi?

EDIWAK owo ẹkeme nditịn̄ Akam Ọbọn̄ ke ibuot, kpa akam oro Jesus ekekpepde mme mbet esie. (Matthew 6:9-13) Mmọ ẹsikot Abasi “Ete Nnyịn” kpukpru ini oro mmọ ẹbọn̄de akam emi. Edi owo ifan̄ ke otu mmọ ẹnen̄ede ẹfiọk Abasi?

Nso kaban̄a fi? Ndi afo emenen̄ede ọfiọk Abasi? Ndi emesisan̄a ekpere enye, eneme nneme ye enye, onyụn̄ asian enye ini emi esịt enemde fi ye ini esịt mînemke fi? Nso ke ndifiọk Abasi enen̄ede ọwọrọ?

“Jehovah Edi Enyịn̄ Esie”

N̄kukụre se eyennsek ekemede ndidiọn̄ọ mban̄a ete esie edi ke enye ekere Papa. Edi ke enye ama okokpon, enye edi edifiọk enyịn̄ ye mme edu ete esie, onyụn̄ ama enye. Nso kaban̄a Ete nnyịn eke heaven? Ndi ọmọfiọk enyịn̄ esie ye se enyịn̄ oro ọwọrọde?

Okposụkedi ediwak owo ẹsidọhọde, “Yak ikpono enyịn̄ Fo” ke ini ẹbọn̄de Akam Ọbọn̄, edieke obụpde mmọ, “Nso idi enyịn̄ oro?” ekeme ndidi mmọ idifiọkke. (Edisana Ŋwed Abasi Ibom) Ikpaenyọn̄ oro ntantaọfiọn̄ ẹyọhọde, ikpọ obot, ediye inyan̄ibom oro mme odu-uwem n̄kpọ ẹyọhọde—kpukpru emi ẹwụt ke Abasi odu. Edi mme n̄kpọ emi inamke owo ọfiọk enyịn̄ Abasi. Bible kpọt asian nnyịn enyịn̄ Abasi. Enye etịn̄ ibio ibio ete: “Jehovah edi enyịn̄ esie.”—Exodus 15:3.

Abasi oyom nnyịn ifiọk ke imọ ikere Jehovah. Ntak-a? Sia enyịn̄ esie anam ifiọk orụk owo emi enye edide. Jehovah ọwọrọ “Enye Anam Akabade Edi.” Oro ọwọrọ ke enye esikabade edi se ededi oro enye oyomde man osu uduak esie. Ke uwụtn̄kpọ, ete oro ekerede aban̄a ubon esie esinọ mmọ udia, ọnọ item, ebiere mfịna, ekpeme, onyụn̄ ọnọ mmọ ukpep. Kpasụk ntre, enyịn̄ oro, Jehovah enen̄ede owụt ke Abasi ekeme ndinam  se enye aduakde man kpukpru mbon oro ẹnamde n̄kpọ esie ẹbọ ufọn, inamke n̄kpọ m̀mê nso itịbe.

Ẹyak ineme nsio nsio n̄kpọ oro edima Abasi nnyịn esinamde man ekekem ye se enyịn̄ esie ọwọrọde. Emi ayanam ifiọk orụk Abasi emi Jehovah edide, onyụn̄ anam ifiọk se ikpanamde man isan̄a ikpere enye.

“Abasi Ima ye Emem”

Apostle Paul okokot Andibot, “Abasi ima ye emem.” (2 Corinth 13:11) Ntak-a? Jesus Christ ama etetịn̄ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Abasi ama enen̄ede ama ubonowo tutu enye ọnọ edima Eyen esie edifak mmọ, man owo ekededi eke ọbuọtde idem ye enye ekpenyene nsinsi uwem oro mîsan̄ake ye ndutụhọ ye ubiak oro idiọkn̄kpọ Adam akadade edi. Ntak edi oro Paul okonyụn̄ ọdọhọde ete: “N̄kpọ eyenutom idiọkn̄kpọ edi n̄kpa, edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.” (Rome 6:23) Ndi oro ikpanamke nnyịn ima Abasi inyụn̄ isan̄a ikpere enye?

Ke adianade ye ndima ofụri ubonowo, Abasi ama owo kiet kiet oro anamde n̄kpọ esie. Moses ọkọdọhọ nditọ Israel emi ẹkesimade ndisọn̄ ibuot ete: “Nte mbufo ẹsio usiene ntem ẹnọ Jehovah, mbon ndisịme ye unana ibuot? Nte idịghe enye edi usọ emi akafakde fi? Edi enye akanam fi, onyụn̄ ọdiọn̄ fi enịm.” (Deuteronomy 32:6) Ndi ọmọfiọk se emi ọwọrọde? Kpa nte edima ete, Jehovah okosụk amama ikọt esie kpa ye oro mmọ ẹkedide mme anana-mfọnmma owo. Enye ama ọnọ mmọ kpukpru akpan n̄kpọ oro mmọ ẹkeyomde onyụn̄ ese aban̄a mmọ ke n̄kan̄ eke spirit.

Kpukpru nnyịn imesinyene nsio nsio mfịna, ndien emi esitịmede nnyịn esịt onyụn̄ anam ifụhọ. Nnyịn imesiyom owo oro ọfiọkde mfịna nnyịn an̄wam nnyịn. Anie ekeme ndin̄wam nnyịn? Jehovah ada Ikọ esie, kpa Bible, ọnọ nnyịn item onyụn̄ ese aban̄a nnyịn. Edisana N̄wed Abasi anam nnyịn ifiọk ntak emi ibọde ufen ntem, ye se ikpanamde man ikeme ndiyọ. Kpa nte ima anamde ete ese aban̄a eyen esie oro ọduọde ada unan, ima esinam Jehovah osụhọde ke ebekpo esie edin̄wam nnyịn. Ke akpanikọ, Jehovah ekeme ndinyan̄a mbon oro ẹbuọtde idem ye enye.—Isaiah 59:1.

Jehovah ndisikop akam nnyịn owụt n̄ko ke enye ama nnyịn. (Psalm 65:2) Ntak idọhọde ntre? Apostle Paul ọdọhọ ete: “Ẹkûtịmede esịt ke baba n̄kpọ kiet, edi ke kpukpru n̄kpọ ẹda akam ye n̄kpeubọk ọkọrọ ye ekọm ẹsian Abasi eben̄e mbufo; ndien emem Abasi emi akande kpukpru ekikere eyekpeme esịt mbufo ye ukeme ukeren̄kpọ mbufo ke Christ Jesus.” (Philippi 4:6, 7) Afo n̄ko emekeme ndinyene “emem Abasi emi akande kpukpru ekikere” edieke ọbọn̄de akam ke ofụri esịt ọnọ Abasi onyụn̄ anamde se Ikọ esie etemede.

“Abasi Ifiọk”

Bible ọdọhọ ke Jehovah Abasi ‘etịm ọfiọk n̄kpọ.’ Sia enye edide “Abasi ifiọk,” enye ọfiọk nte nnyịn itiede ye se nnyịn iyomde akan owo ekededi. (Job 36:4; 1 Samuel 2:3) Abasi ama ada Moses asan̄autom esie anam nditọ Israel ẹfiọk ke “idịghe uyo ikpọn̄-ikpọn̄ ke owo ada odu uwem, ke edi kpukpru se itode Jehovah ke inua ke owo ada odu uwem.” (Deuteronomy 8:3; Matthew 4:4) Emi owụt ke edieke iyomde  ndinen̄ede n̄kop inemesịt, ke oyom inyene n̄kpọ en̄wen ke adianade ye mme n̄kpọ obụkidem.

Andibot ọnọ nnyịn eti ndausụn̄ ke Ikọ esie, kpa Bible. Ke ini ikpepde Bible inyụn̄ idade se ikpepde isịn ke edinam, nnyịn iyọbọ ufọn ito “kpukpru se itode Jehovah ke inua.” Ke uwụtn̄kpọ, n̄wan kiet emi ekerede Zuzanna etịn̄ se mmọ ẹsinamde ke ubon mmọ ete: “Nditie ọtọkiet n̄kot Bible, ndụk mme mbono esop Christian ọtọkiet, nnyụn̄ nsan̄a kiet n̄ka ukwọrọikọ ọsọn̄ọ ndọ nnyịn. Ndausụn̄ oro Abasi ọnọde anam nnyịn inyene ukem utịtmbuba, ndien emi anam nnyịn inen̄erede idiana kiet.”

Didie ke afo ekeme ndibọ ufọn nto item ye ndausụn̄ oro Abasi ọnọde? Abasi eyenen̄ede ọdiọn̄ fi edieke ekpepde Bible kpukpru ini onyụn̄ adade se ekpepde esịn ke edinam.—Mme Hebrew 12:9.

“Abasi Edinyan̄a”

Ererimbot mfịn ọyọhọ ye afanikọn̄. Owo ifiọkke se n̄kpọn̄ edidade edi. Edieke afo odụn̄de ke ebiet oro ẹn̄wanade ekọn̄, ekeme ndinen̄ede ndọn̄ fi ndidu ke emem. Ke ediwak ebiet, mme owo ẹdu ke ndịk ke ntak ubiatibet ye afai, nsọn̄ọn̄kpọ, ye edinam oyomonsia. Anie edinyan̄a nnyịn osio ke kpukpru emi? Ubonowo ẹnen̄ede ẹyom ukpeme ye edinyan̄a ẹkan nte akanam ẹyomde.

Bible ọdọhọ ke “enyịn̄ Jehovah edi ọkpọsọn̄ tower: eti owo efehe odụk ke esịt, ndien odu ke ifụre.” (Mme N̄ke 18:10) Ndifiọk enyịn̄ Abasi nnyụn̄ mbuọt idem ke enye ayanam ikere iban̄a se enye anamde idahaemi, ye se enye edinamde ke ini iso man anyan̄a mbon oro ẹbuọtde idem ye enye. Jehovah Abasi enen̄ede owụt ke imọ imekeme ndinyan̄a ikọt imọ. Ke uwụtn̄kpọ, enye ama anyan̄a Israel ke ndisobo mme chariot ekọn̄ Pharaoh ye udịm esie. Jehovah ama owụt ke imọ idi Abasi akpanikọ, Abasi oro etide mbon oro ẹfịkde onyụn̄ anyan̄ade mmọ.—Exodus 15:1-4.

Edieke nnyịn n̄ko inyenede mbuọtidem ke Jehovah Abasi nte Andinyan̄a, nnyịn iyenyene nsinsi uwem. Edidem David oro akakarade Israel eset ama osobo ekese afanikọn̄, onyụn̄ owụt ke imenyene mbuọtidem ke Abasi nte Andinyan̄a imọ; ntak edi oro enye ọkọdọhọde Jehovah ete, ‘Afo edi Abasi edinyan̄a mi.’ (Psalm 25:5) Apostle Peter eketịn̄ ye ọyọhọ mbuọtidem ete: “Jehovah ọfiọk nte anyan̄ade mbon uten̄e Abasi osio ke idomo.”—2 Peter 2:9.

Abasi ọn̄wọn̄ọ ọnọ owo ekededi oro ọbuọtde idem ye imọ ete: “Nyanam enye ọbọhọ . . . koro enye ọfiọkde enyịn̄ mi.” (Psalm 91:14) Mme asan̄autom Abasi mfịn ẹkụt ke ikọ emi edi akpanikọ. Henryk emi odude ke Poland ọmọsọn̄ọ ada anam n̄kpọ Jehovah ke ofụri isua 70 kpa ye afanikọn̄ ye ukọbọ. Ke ini enye ekedide eyen isua 16 kpọt, ẹma ẹda ete esie ẹkesịn ke itienna ekikere  ke Auschwitz. Ẹma ẹmụm Henryk ye eyeneka esie ẹkedọn̄ ke ufọk-n̄kpọkọbi nditọwọn̄. Ke oro ebede, ẹma ẹsisịn enye ke nsio nsio itienna ekikere. Kpa ye ofụri emi, Henryk ọdọhọ ete: “Jehovah ikọkpọn̄ke mi ke ofụri ini afanikọn̄ emi. Okposụkedi eketiede nte ke ẹmọn̄ ẹwot mi ediwak ini, Jehovah ama esin̄wam mi nsọn̄ọ nda.” Ke akpanikọ, Jehovah esinọ mme asan̄autom esie ukeme ye uko ndiyọ.

Ibịghike, Abasi ayanyan̄a kpukpru mbon oro ẹbuọtde idem ye enye. Enye ọdọhọ ete: “Ami, ami ndi Jehovah; ndien baba andinyan̄a kiet idụhe ke mîbọhọke ami.” (Isaiah 43:11) “Abasi Ata Ọkpọsọn̄” ayanyan̄a ndinen owo onyụn̄ osobo mme idiọk owo ke “ekọn̄ akwa usen” esie. (Ediyarade 16:14, 16; Mme N̄ke 2:21, 22) Jehovah ọn̄wọn̄ọ ọnọ nnyịn ete: “Mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.”—Psalm 37:11.

Ndikabade Ndi “Nditọ Abasi”

Ke eyo prọfet Malachi, nditọ Israel ẹkedọhọ ke Jehovah edi Ete mmimọ. Edi mmọ ikesinọhọ Jehovah ukpono nte Ete. Mmọ ẹkesida edidehe uyo ye unam emi ẹdide mbụn̄ọ ye nnan ẹdiwa ẹnọ Jehovah. Ntak edi oro Jehovah okobụpde mmọ ete: “Edieke ami ndide ete, ukpono mi odu mmọn̄?”—Malachi 1:6.

Kûtiene uwụtn̄kpọ mme ọsọn̄ibuot nditọ Israel emi. Utu ke oro, nnyịn isịn udọn̄ inọ fi ite ekpep n̄kpọ aban̄a Jehovah Abasi onyụn̄ asan̄a ekpere enye. James mbet eyen Abasi ọkọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.”—James 4:8.

Ndida Jehovah nte Ete nnyịn asan̄a ye mbiomo. Edieke odomode ndikpono Abasi onyụn̄ anam se enye oyomde kpukpru ini, enye idifreke ukeme oro afo esịnde. Edi enye ayanam fi asan̄a ke usụn̄ oro adade esịm obufa ererimbot oro enye ọn̄wọn̄ọde, kpa ererimbot oro ‘n̄kpa, mfụhọ, ntuan̄a, m̀mê ubiak mîdidụhe aba.’ (Ediyarade 21:4) Ini oro, ẹyenam kpukpru mbon oro ẹkopde item Abasi ‘ẹbọhọ ufụn itie mbiara ẹnyụn̄ ẹnyene ubọn̄ ubọn̄ ifụre eke nditọ Abasi.’—Rome 8:21.

[Se ẹwetde ke ikpọ abisi ke page 5]

Abasi oyom nnyịn ifiọk ke imọ ikere Jehovah, emi ọwọrọde, “Enye Anam Akabade Edi”

[Se ẹwetde ke ikpọ abisi ke page 6]

“Jehovah ikọkpọn̄ke mi ke ofụri ini afanikọn̄ emi.”—HENRYK

[Se ẹwetde ke ikpọ abisi ke page 7]

“Nditie ọtọkiet n̄kot Bible, ndụk mme mbono esop Christian ọtọkiet, nnyụn̄ nsan̄a kiet n̄ka ukwọrọikọ ama ọsọn̄ọ ndọ nnyịn.”—ZUZANNA