Mme N̄ke 8;1-36
8 Nte ọniọn̄ ifiorike ikot,+ mbufiọk inyụn̄ isioroke uyo?+
2 Enye ada ke enyọn̄ edikon̄ ebiet,+ ke usụn̄, ke n̄wan̄a-usụn̄.
3 Ke mben inuaotop, ke inuaotop obio,+ enye ofiori ke ọkpọsọn̄ uyo ke mme usụn̄ inuaotop, ete:+
4 “Ami mmokot mbufo, O mme owo, mmonyụn̄ mmenede uyo mi nnọ nditọ owo.+
5 O mbufo mme ọkọi, ẹnyene mbufiọk;+ ndien mbufo mme ndisịme, ẹnyene esịt ikike.+
6 Ẹkpan̄ utọn̄, koro ami ntịn̄de ata akpan n̄kpọ,+ nnyụn̄ n̄kụbọrede n̄kpọkinua mi ntịn̄ se inende.+
7 Koro nsịn̄ mi etịn̄de akpanikọ+ ke sụn̄sụn̄ uyo; idiọkido onyụn̄ edi mbubiam n̄kpọ ọnọ n̄kpọkinua mi.+
8 Kpukpru ikọ inua mi ẹdi ndinen.+ Baba kiet ke otu mmọ iyụrọkede inyụn̄ ikwan̄ake.+
9 Kpukpru mmọ ẹdi nnennen ẹnọ owo mbufiọk, ẹnyụn̄ ẹdi ndinen ẹnọ mmọ eke ẹkụtde ifiọk.+
10 Mbufo ẹbọ ntụnọ mi ẹkûnyụn̄ ẹbọ silver, ẹbọ ifiọk utu ke eti gold.+
11 Koro ọniọn̄ ọfọnde akan eme,+ kpukpru mme n̄kpọ eken emi ẹnọde idatesịt inyụn̄ imenke udomo ye enye.+
12 “Ami, ọniọn̄, ndụn̄ ye mbufiọk,+ mmonyụn̄ n̄kụt ifiọk ye ukeme ukere n̄kpọ.+
13 Ndibak Jehovah ọwọrọ ndisua idiọk.+ Ami nsasua iseri ye ntan̄idem+ ye idiọk usụn̄ ye idiọk inua ikọ.+
14 Mmenyene item+ ye ata ọniọn̄.+ Mmenyene asian;+ mmenyene odudu.+
15 Ndidem ẹda mi ẹkara, ikpọ owo ẹnyụn̄ ẹda mi ẹwụk ndinen ewụhọ.+
16 Mbọn̄ ẹda mi ẹkara nte mbọn̄,+ ikpọ owo ẹnyụn̄ ẹda mi ẹkpe ikpe ke edinen ido.+
17 Ami mmama mbon oro ẹmade mi,+ mme andiyom mi ẹnyụn̄ ẹkụt mi.+
18 Inyene ye ubọn̄ ẹdu ye ami,+ udeme inyene ye edinen ido.+
19 Mbun̄wụm mi ọfọn akan gold, akan gold emi ẹdụhọrede, mfri mi onyụn̄ ọfọn akan eti silver.+
20 Ami nsan̄a ke usụn̄ edinen ido,+ ke ufọt ọkpọusụn̄ edinen ikpe,+
21 man nnam mbon oro ẹmade mi ẹnyene nsinsi inyene;+ nnyụn̄ nnam mme ufọk ubonn̄kpọ mmọ ẹyọhọ.+
22 “Jehovah okobot mi nte ntọn̄ọ usụn̄ esie,+ kpa ntọn̄ọ utom esie eke eset.+
23 Ẹkenịm mi toto ke ata eset,+ toto ke editọn̄ọ, mbemiso ẹkebotde isọn̄.+
24 Ẹkeman mi nte ke ubiak uman ke ini mme udem mîka idụhe kan̄a,+ ke ini mme idịm eke mmọn̄ etịmde awak mîka idụhe kan̄a.
25 Ẹkeman mi nte ke ubiak uman mbemiso ikpọ obot ẹkewọrọde ẹwụhọ,+ mbemiso n̄kpri obot,
26 ke enye mîka inamke kan̄a isọn̄+ ye mme unaisọn̄ ye akpa n̄kukụk ntanisọn̄.+
27 Ami mma ndu ke ini enye anamde enyọn̄;+ ke ini enye ewetde ekara ke iso udem,+
28 ke ini enye ọsọn̄ọde owụk obubịt enyọn̄ ke enyọn̄,+ ke ini enye anamde udem inyan̄ ọsọn̄ọ ọdiọhọ,+
29 ke ini enye owụkde inyan̄ ewụhọ esie ete mmọn̄ okûbe adan̄a emi enye enịmde,+ ke ini enye esịnde itiat idakisọn̄ ọnọ isọn̄,+
30 ami n̄kodu enye ke n̄kan̄ nte ata anamutom,+ ami n̄konyụn̄ ndi se idatde enye esịt+ kpukpru usen, ndara ndidu ke iso esie kpukpru ini,+
31 ndara mban̄a isọn̄+ esie emi owo odụn̄de, ndien se ikọnọde mi idatesịt ekedi nditọ owo.+
32 “Ndien, ke emi, O nditọ, ẹkpan̄ utọn̄ ẹnọ mi; ih, mbon oro ẹkpemede usụn̄ mi ẹkop inemesịt.+
33 Ẹbọ ntụnọ man ẹnyene ọniọn̄,+ ẹkûnyụn̄ ẹsịn enye.+
34 Owo emi akpan̄de utọn̄ ọnọ mi, emi atabade idap etie ke enyịnusụn̄ mi ke usen ke usen, onyụn̄ etiede ke inuaotop mi ekpeme, okop inemesịt.+
35 Koro owo eke okụtde mi oyokụt uwem,+ onyụn̄ ọbọ Jehovah mfọn.+
36 Edi owo eke mîkwe mi abiat ukpọn̄ esie;+ kpukpru mmọ eke ẹnen̄erede ẹsua mi ẹdi mme ama n̄kpa.”+
