Belēdi be se̱medi o Bibe̱l be be̱n ngińa ninde̱ne̱ o tukwa longe̱ la bato. Jombweye byembilan beba be mabole̱ ni mboṅ: Ricardo na Andres.

RICARDO: Ke̱ na be̱n 15 la mbu, na lati na bato ba njo. Ma mako̱m mam ma ta ma be̱ne̱ ngińa jita omo̱ń am. Na po̱i o dikala lena mpuli mam mu tano̱ nde ná na tombise̱ dom la mbu o beboa! Nika ńe ná e be̱ mańaka. Nde o mundi mam, bato bena ba tombise̱ ponda o beboa ba ta be̱ ba ninabe̱ ba bolabe̱ pe̱ edube. Mba pe̱ na ta na pula be̱ ka babo̱.

Na boli mambo me̱se̱ mako̱m mam ma tano̱ ma bola, ka no̱ngo̱ la banga, musonje, na bolane̱ la njo. Bulu bō̱, na no̱ngi dongo o ewe̱nj’a ngadi. No̱nge̱le̱ ná na wusa bwabe̱, nde na busi oten esibe̱ ele̱m. Ombusa nika, na botedi o dutea na iwiye̱ jombwea longe̱ lam na mambo na tano̱ na bupe̱, na mba na no̱ngo̱ bedomsedi o tukwa. Nde ne̱ni e? We̱ni kusa jongwane̱ e?

Belongi bam ba mbia jita be si ta bonam. Ba ta ba be̱ne̱ mitakisan jita. Nde e si ta nika o mbia ma mulal’am mō̱. Na ta na bia ná be nde bato ba bwam, na ná ba madie̱le̱ nde longe̱ labu bupisane̱ bete̱sedi ba Bibe̱l. Ba ta ba lee̱ mba buńa bō̱ ná dina la Loba ná Yehova. Son a ponda ombusa y’ewe̱nji na ngadi, na kane̱ Yehova na dina lao, ná ongwane̱ mba. O mańaka mam me̱se̱, buńa bo bupe̱, Mboṅ a Yehova po̱ ńumbi jo̱mbe̱ lam! A timbi be̱ mokwe̱le̱ mba Bibe̱l.

Na pomane̱ kusa mitakisan minde̱ne̱. Mako̱m mam ma kwaṅ ma ta be̱ ma bele̱ mba, ná na tombise̱ ponda na babo̱. Na ta na banga, to̱ná nika e si tano̱ bu. Na ta na bama o bedomsedi bam ba walane̱ jokwa lam la Bibe̱l oboso, ne pe̱ muńe̱nge̱ ná na boli nika! Longe̱ lam di tuko, na so̱ pe̱ bonam ba mbale̱.

No̱nge̱le̱ ná na ta na langwea Loba o muka ná na mapula tombise̱ dom la mbu o beboa ná na bolabe̱ edube. Na baise̱ so̱ mo̱ ná ese̱le̱ mba na boleye mo̱ o bosadi bwe̱se̱ dom la mbu ka paonia ńa pond’a mususu, ná nongwane̱ bape̱pe̱ ka ne̱ni bongwane̱no̱ mba. Loba alabe̱ muka mam, ebanja ne o bolea ka paonia ńa pond’a mususu yā we̱nge̱ 17 la mbu! Omo̱ń a nika, na s’alo o beboa tom.

Nde jita la mako̱m mam ma kwaṅ be o beboa ońola mimbu jita. Bape̱pe̱ ba wedi. Nombo te̱ ombusa, na matimbise̱le̱ belongi bam ba mbia be Mboṅ a Yehova masoma jita. Bemedi o be̱ diwengisan na o die̱le̱ longe̱ labu bupisane̱ bete̱sedi ba Bibe̱l. Na timbi o be̱ne̱ye̱ babo̱ edube, buka ye na tano̱ na be̱ne̱ye̱ mako̱m mam ma kwaṅ. Omo̱ń a me̱se̱, na matimbise̱le̱ Loba masoma ońolana a lee̱ mba mbad’a longe̱ ńe bwam buka ye̱se̱.

 ANDRES: Na yabe̱ nde na koka pe̱ o mundi ma tue wuma banga, mabandan, ebwan na mbamba ba tano̱ jita. Sango am a ta nde muso̱kedi na muńo̱ banga nunde̱ne̱. Mo̱ na ńango am ba ta nde mitango n’ewe̱nji ponda ye̱se̱.

O mimbu mam misadi, na botedi ńo̱ belam na banga. Na ta na tombise̱ dongo dinde̱ne̱ la pond’am o ngea, o jiba na o jandise̱ nje na tano̱ niba. O bokoka bam, sango am a puli ná di be̱ batabata nde a si no̱ngedi mambo o mbad’a bwam; a lee̱ nde mba ne̱ni jinge̱le̱ na jandise̱ banga na mambo mape̱pe̱ ma ta mbenda o ekombo. Na pomane̱ kusa mo̱ni jita. Buńa bō̱, polisi i po̱i o mboa. I damedi mba, na kusa pe̱ mbako a beboa ńa mbu mitanu ońolana na puli bwa moto.

Idiba iwo̱, bobia bo bolabe̱ o ndabo a beboa ná ba be̱se̱ be ńo̱ngi bukeye o jakwalisane̱ la Mbȯn a Yehova di se̱medi o Bibe̱l. Na no̱ngi bedomsedi o jukea oten. Nje na sengino̱ e ta e te̱nge̱ne̱, na mba na botea jokwa Bibe̱l na Mboṅ a Yehova. Ba si lee̱ mba buka te̱ dongo la Betiledi di do̱lisan mba, nde ba lee̱ mba bete̱sedi ba Loba basam jombwea bedangwedi.

Na pomane̱ so̱ṅtane̱ ná na titi ná na wana mawengisan mangame̱n esibe̱ jongwane̱, tobotobo ponda na kusino̱ misisan ma mako̱m mam ma beboa mena ma si ta ma pula ná nokwe. Na kane̱ so̱ ná na kuse ngińa na dibie̱, na Yehova ongwane̱ mba. Na we̱li na mo̱me̱ne̱ langwea mako̱m mam ma beboa nje Bibe̱l e malee̱no̱.

Pond’am ńa busa e po̱ino̱, na ta nde na pula tika ja o beboa ebanja longe̱ l’eboko di ta di bwese̱ mba bo̱ngo̱. Ke̱ ne o busa, jita la mako̱m mam ma beboa di some̱le̱ mba wala la bwam. Bō̱ ba kwalane̱ na mba ná: “A pasto nisadi wala bwam e!”

Na masoa na bo̱ngo̱ ke̱ no̱nge̱le̱ ne̱ni longe̱ lam di wusano̱ be̱ esibe̱ ná nemea ná Loba okwe̱le̱ mba. Na matimbise̱le̱ Loba masoma jita ná a to̱ndi mba na ná a s’e̱n mba ka moto nu titi ná nu tukwa. *