Kestyon sorti kot nou lekter . . .

Kote Kaen ti ganny son madanm?

▪ “Si Adan ek Ev ti annan zis de zanfan, Kaen ek Abel, kote madanm Kaen ti sorti?” Menm si sa kestyon i souvandfwa ganny demande pour met en dimoun dan pyez par bann ki dout Labib, i annan ase detay dan Labib ki donn nou en larepons satisfezan.

Zenez sapit 3 ek 4 i donn nou sa bann lenformasyon swivan: (1) Ev ti “manman tou dimoun vivan.” (2) Lakantite letan ki ti pase depi nesans Kaen ziska ler i ti ofer sa sakrifis ki Bondye ti rezete. (3) Apre ki i ti ganny pouse e vin en ‘vagabon e mars an tayan,’ Kaen ti per ki “nenport” dimoun ki ti trouv li ti pou kapab esey touy li. (4) Bondye ti etablir en siny pour protez Kaen e sa i montre ki son bann frer, ser oubyen lezot manm son fanmir ti pou kapab esey touy li. (5) “Apre” Kaen ti annan relasyon seksyel avek son madanm dan pei Nod.—Zenez 3:20; 4:3, 12, 14-17.

Dapre sa ki’n ganny mansyonnen anler, nou kapab dir ki madanm Kaen ti en desandans Ev, me son dat nesans pa’n ganny mansyonnen. Zenez 5:4 i dir ki pandan sa 930 an ki Adan ti viv, i ti “vin papa bann garson ek fiy.” Byensir, Labib pa dir direkteman ki madanm Kaen ti fiy Ev. Me vi ki son madanm i ganny mansyonnen apre ki Kaen ti’n ganny pouse, sa i montre ki ase letan ti’n pase pour li kapab vin pti zanfan Adan ek Ev. Pour sa rezon, The Amplified Old Testament i dekrir madanm Kaen senpleman konman “enn bann desandans Adan.”

Adam Clarke, en ekriven dan diznevyenm syek ti panse ki Bondye ti etabli sa siny an rezilta lafreyer ki Kaen ti annan akoz ti deza annan plizyer zenerasyon desandans Adan, ki fer ki i ti pou annan ase dimoun “pour fer plizyer vilaz.”

Pour serten dimoun konmela, zot trouv sa lide ki Kaen ti’n kapab marye avek son ser oubyen avek en lot son fanmir dan lwen vreman mal. Normalman sa i akoz i pa ganny aksepte dan lasosyete oubyen akoz lafreyer ki i pou kree bann defo zenetik. Toudmenm, Frank LaGard Smith ti fer sa komanter dan The Narrated Bible in Chronological Order: “I paret ki i ti normal pour sa bann premye frer ek ser marye avek kanmarad, menm si bann dimoun ki ti pou vini plitar pa ti pou vwar sa apropriye si sa ti kontinyen arive dan zot letan.” I osi enteresan pour note ki relasyon seksyel ant fanmir pros ti ganny enterdi spesifikman an 1513 A.N.L. kan Bondye ti donn Moiz lalwa pour nasyon Izrael.—Levitik 18:9, 17, 24.

Ozordi, nou vreman lwen avek sa leta parfe ki nou premye paran ti annan plizyer milener pase. Petet bann problenm zenetik oubyen erediter ki nou fer fas avek ozordi pa ti en problenm pour zot. Deplis, bann letid ki’n ganny fer tou resaman tel parey sa enn ki ti ganny pibliye dan Journal of Genetic Counseling, i montre ki zanfan bann kouzen ek kouzin pros ki marye avek kanmarad i annan mwens risk pour ne avek defo konpare avek sa ki dimoun an zeneral i panse. I rezonnab pour dir ki sa pa ti en problenm serye dan lepok Adan oubyen menm avan letan Noe. Alor, nou kapab tir sa konklizyon ki madanm Kaen ti enn son fanmir.