Konman ou kapab konpran Labib

Aksepte led avek lezot

Kan eksplorater Edward Eyre ti fer en vwayaz difisil pour travers en dezer ki apel Plato Nullarbor, bann Aborizin laba ti montre Edward konman pour anmas delo dan bann din dan disab e dan bann pye Kaliptis. Lefet ki i ti aksepte led avek sa bann ki ti deza konn sa landrwa, sa ti sov son lavi pli tar.

PAREY sa legzanp i montre, pour kapab arive byen termin en latas difisil, souvan nou bezwen ganny led sorti kot en dimoun ki pli eksperyanse ki nou. Sa i osi leka kan ou deside pour lir Labib.

Zezi pa ti ekspekte ki son bann disip ti pou konpran Labib san okenn led. En fwa “i ti ouver zot lespri pour zot kapab konpran Lekritir.” (Lik 24:45) Zezi ti konnen ki sa bann ki lir Labib i bezwen ganny ede pour zot sezi sans sa bann lansennyman dan Parol Bondye.

Avek lekel pour ganny led?

Zezi ti donn lord son bann vre disip pour zot aport sa led avek lezot. Avan ki i ti mont dan lesyel, i ti donn sa komannman: “Ale e fer tou pep vin mon bann disip. . . . Ansenny zot pour obei tou sa ki mon’n konmande.” (Matye 28:19, 20) Pour ansenny lezot i sa travay prensipal ki bann Kretyen in ganny konfye avek e sa i vedir ki zot bezwen eksplik lezot konman pour aplik bann prensip Labib dan zot lavi tou le zour. Bann vre Kretyen i ed lezot pour konpran Labib.

Pa bokou letan apre ki Zezi ti’n donn son bann disip sa travay pour fer, en keksoz vreman enteresan ti arive. Labib i koz lo en zofisye ki ti sorti dan pale larenn Etyopi ki ti pe lir profesi Izai. Kan i ti pe lir, i ti annan serten verse ki i pa ti konpran. Dapre sa ki Labib i dir nou, sa bann verse ki ti konfiz li, i lir koumsa: “I ti konman en mouton ki zot pe anmenn  labatwar. Parey en lanyo ki reste trankil devan bann ki koup son lalenn. I pa ti ouver labous. I ti ganny imilye e zot pa ti fer li lazistis. Ki sennla ki pou kapab tras son desandans? Parski son lavi lo later in ganny terminen.”—Akt 8:32, 33; Izai 53:7, 8.

Sa zofisye ti demann Filip, en Kretyen eksperyanse ki ti annan en bon konnesans lo Lekritir: “Lo lekel ki sa profet pe koze? Eski i pe koz lo limenm ou lo en lot dimoun?” (Akt 8:34) Sa Etyopyen ki ti senser, ti sorti ador Bondye Zerizalenm e i kapab ki i ti’n priy Bondye pour gid li. Evidaman, i ti pe lir avek lantouzyasm e i ti osi annan limilite. Me kantmenm sa, sa zofisye pa ti ankor nobou konpran sinifikasyon sa bann verse. I ti abes li pour demann Filip son led. Sa leksplikasyon ki Filip ti donn li ti fer li telman kontan ki i ti ganny motive pour vin en Kretyen li osi.—Akt 8:35-39.

Ozordi, bann Temwen Zeova i ankor pe kontinyen fer sa travay ki Filip ek bann  premye Kretyen ti fer. Dan plis ki 235 pei, volonterman Temwen Zeova pe ed dimoun pour konpran ki Labib i vreman dir. Zot fer sa par etidye diferan topik lo Labib. Sa metod ki zot servi pour etidye Labib i enplik egzamin sa ki Labib i dir konsernan en topik oubyen size, e sa i ganny fer lo en baz kontinyel. *—Vwar sa bwat “Larepons satisfezan pour bann kestyon lo Labib.”

“Mon ti ganny larepons pour tou mon kestyon”

Steven, Valvanera ek Jo-Anne, ki sa premye lartik ti mansyonnen, ti konmans etidye Labib avek Temwen Zeova. Steven ti dir: “I etonan pour aprann ki, par zis konpar detrwa resi oubyen prensip, souvan ou arive dekouver laverite lo en size ki’n toultan la dan Labib. Avan ki mon ti etidye avek Temwen Zeova, personn pa ti’n zanmen montre mwan konman pour fer sa. I ti en soulazman pour konpran Labib san bann gran deba ki zanmen fini ek bann lopinyon ki an kontradiksyon avek kanmarad.”

Valvanera ti partaz menm pwennvi. I ti dir: “Tou sa ki mon ti aprann ti lozik e fer sans. Keksoz pa ti vre zis akoz ‘Legliz’ ki’n dir, me akoz i ti annan en leksplikasyon ki fer sans pour tou keksoz.” Jo-Anne ti rakonte: “Lefet ki tou mon bann kestyon ti ganny reponn atraver Labib, sa ti fer mwan annan lakrent ek en gran respe pour Loter sa liv, vi ki i ti’n prevwar larepons satisfezan pour nenport ki kestyon en imen i kapab demande.”

Eski ou konn en Temwen Zeova? Pa i ti a bon si ou demann li pour montre ou konman en letid i ganny fer? Si ou pa konn en Temwen Zeova personnelman, silvouple kontakte zot lo sa bann ladres ki trouve lo paz 2 dan sa magazin. Avek lespri sen Bondye, en lespri ouver ek led en ansenyan Labib kalifye, i pou fasil pour konpran Parol Bondye. Ou kapab konpran Labib.

[Not anba lo paz]

[Box/​Picture on page 8]

Larepons satisfezan pour bann kestyon lo Labib

Serten topik ki ganny konsidere par Temwen Zeova dan zot progranm letid Labib:

• Ki plan Bondye pour later?

• Kote bann dimoun mor i ale?

• Eski nou pe viv dan “bann dernyen zour”?

• Akoz Bondye i les nou soufer?

• Konman mon kapab fer mon lavi fanmir ere?

[Portre lo paz]

Pour konpran Labib . . . priye pour ganny lespri sen, lir avek en lespri ouver e aksepte led lezot