Eski nou bezwen en Mesi?

PETET ou kapab demann sa kestyon, “Eski nou bezwen en Mesi?” I fer sans pour demann ou lekor sa kestyon, eski Mesi pou annan en lefe lo mon lavi?

Petet serten dimoun ki ou byen respe zot lopinyon, pou dir ou ki definitivman ou bezwen en Mesi, zis parey tou lezot dimoun i bezwen. En spesyalis dan lalwa Zwif, dan premye syek ti ekrir sa lo Mesi: ‘Tou bann promes Bondye i trouv dan li zot Wi.’ I ti fer resorti sa rol enportan ki Mesi i annan pour zwe dan plan Bondye, pour beni tou bann nasyon lo later. (2 Korentyen 1:20) Lefe ki Mesi i annan en rol vreman enportan pour zwe, sa in fer ki bann profesi dan Labib i baze lo son larive ek son lavi isi lo later. Dan en liv ki plizyer milyon dimoun in servi pandan sa dernyen 70 an, dapre Henry Halley Ansyen Testaman ti ganny ekrir avek bi pour fer dimoun anvi vwar larive Mesi, e pour prepar semen pour li. Eski son larive i enportan? Akoz sa i devret enteres ou?

“Mesi” oubyen “Kris” i vedir “sa enn ki’n ganny swazir.” Encyclopædia Britannica pibliye an 1970, i apel Mesi “sa pli gran sover.” I ti bezwen vin lo later akoz sa ki Adan ek Ev ti’n fer. Zot ti’n ganny kree parfe, avek sa lespwar pour reste pour touzour dan paradi. Malerezman zot ti perdi sa lespwar. En lanz ki ti rebele, ki’n ganny apele Satan, ti dir zot ki zot Kreater ti pe tro priv zot. I ti dir ki zot ti pou pli byen si zot ti deside pour zot menm sa ki byen ek sa ki mal.—Zenez 3:1-5.

Ev ti tonm dan sa pyez e i ti krwar sa ki Satan ti’n dir li. Vi ki Adan ti pli kontan son madanm ki reste fidel avek Bondye, i ti osi zwenn Satan dan son rebelyon. (Zenez 3:6; 1 Timote 2:14) Par zot aksyon, zot pa ti zis perdi zot lespwar pour viv eternelman dan paradi, me zot ti osi transmet pese avek zot desandans e sa in anmenn lanmor.—Romen 5:12.

Deswit, nou Kreater ti vwar en mwayen pour retir sa move lefe ki sa rebelyon in anmennen. Pour kapab rekonsilye avek imen, Zeova ti servi en mwayen ki plitar ti vin en prensip dan Lalwa Moiz. Sa prensip i ki ou devret donn egzakteman parey sa ki’n perdi. (Deterononm 19:21; 1 Zan 3:8) Pour ki desandans Adan i ganny lavi eternel dan paradi, parey Bondye ti anvi depi okonmansman, i ti pou bezwen servi sa prensip legal. E sa i anmenn nou ver Mesi.

Kan i ti pe pas santans lo Satan, dan premye profesi Labib, Zeova ti dir: “Mon pou met en laenn ant ou ek sa fanm, ant ou desandans ek son desandans. I pou kraz ou latet e ou pou kraz son talon.” (Zenez 3:15) En spesyalis Labib ti dir ki sa parol dan Zenez 3:15 i premye profesi dan Labib ki koz lo Mesi. En lot spesyalis ti fer resorti ki Mesi i sa mwayen ki Bondye pou servi pour retir sa move sitiasyon ki nou premye paran in anmennen. Anmenmtan sa pou anmenn benediksyon pour limanite.—Ebre 2:14, 15.

Petet ou kapab remarke ki definitivman ozordi imen pa pe ganny beni. Okontrer zot dan en gran dezespwar. The World Book Encyclopedia i dir ki “en kantite Zwif i ankor pe esper en Mesi vini” e dapre zot i ‘pe vini pour retir sa ki mal e detrir zot bann lennmi.’