MON rapel en zour bomaten ki ti byen fre plizyer lannen pase Brookings, South Dakota, Leta-z-ini. Mon ti santi ki sezon lafreser ti pou vini byento. Mon ti dan en stor lo laferm ki ti napa sofaz avek en pti group dimoun e nou tou nou ti pe ganny lakranp. Nou ti pe debout o bor en gro tenk ranpli avek delo e sa delo ti fre! Les mwan rakont ou en pti pe mon lavi pour ki ou kapab konpran akoz nou ti la.

Mon ti ne le 7 Mars, 1936, dernyen dan kat zanfan. Nou ti reste lo en pti laferm dan les South Dakota. Travay lo laferm ti en keksoz enportan dan nou fanmir, me i pa ti sa keksoz pli enportan. Mon paran ti batize konman Temwen Zeova an 1934. Zot ti’n dedye zot lavi pour servi Zeova, alors sa keksoz pli enportan pour zot ti pour fer son lavolonte. Mon papa, Clarence e pli tar mon tonton Alfred, ti servi konman company servant (ki konmela i ganny apele kordinater konsey ansyen) dan nou pti kongregasyon Conde, South Dakota.

Nou fanmir ti souvan al nou bann renyon e pres portanport pour koz avek lezot konsernan sa lespwar merveye ki trouve dan Labib. Legzanp mon paran e sa bon labitid ki zot ti donn nou, ti ed nou pour kontan Zeova. Mwan ek mon ser Dorothy, ti vin bann proklanmater Rwayonm ler nou ti annan sis an. An 1943, mon ti zwenn Lekol Minister Teokratik ki ti’n fek konmanse.

Bann lasanble ti en keksoz enportan dan nou lavi. Mon rapel en lasanble ki ti ganny fer Sioux Falls, South Dakota an 1949.  Frer Grant Suiter ti fer sa diskour “It Is Later Than You Think!” (I pli tar ki ou ti pe mazinen!) I ti fer resorti ki tou bann Kretyen ki’n dedye zot lavi i bezwen pres sa bon nouvel lo Rwayonm Bondye. Apre sa, mon ti dedye mon lavi avek Zeova. Le 12 Novanm 1949, mon ti batize Brookings dan sa lot lasanble rezyonal ki ti swiv. Sanmenm sa ki mon ti dan sa stor fre lo laferm, ki mon’n koz lo la pli boner. Kat nou ti pe espere pour ganny batize dan en gran tenk feray.

Apre sa, mon ti deside pour fer pionye. Mon ti konmans le 1 Zanvye 1952, ler mon ti annan 15 an. Labib i dir: “Si ou frekant en saz, ou menm, ou ava vin saz” e i ti annan plizyer dimoun saz dan mon fanmir ki ti siport mon desizyon pour fer pionye. (Proverb 13:20) Souvan mon ti al prese avek mon tonton ki apel Julius, ki ti annan 60 an. Menm si i ti bokou pli vye ki mwan, nou ti kontan pas letan ansanm dan predikasyon. Mon ti aprann bokou avek li ek son bon leksperyans lavi. Pa bokou letan apre, Dorothy osi ti vin en pionye.

Ler mon ti ankor zenn, mon paran ti envit plizyer sirveyan rezyonal ek zot madanm pour reste avek nou. En koup ki ti ed mwan en kantite ti Jesse ek Lynn Cantwell. Zot ti enterese avek mwan e zot ti ankouraz mwan. Ler zot ti pe servi dan bann kongregasyon ki pa ti tro lwen avek nou, parfwa zot ti envit mwan pour al prese avek zot. Mon ti vreman kontan sa letan ki mon ti pase avek zot! Mon ti anvi byen okipe dan servis Zeova parey zot e dan servis pionye.

Bud Miller ti nou lot sirveyan rezyonal. Ler i ti vin vizit kongregasyon ansanm avek son madanm Joan, mon ti annan 18 an. Sa letan mon ti bezwen pas devan en komite ki deside lekel ki devret zwenn servis militer. Zot ti anvi mon fer serten travay ki mon ti santi ti kont sa komannman Zezi pour pa pran kote dan bann zafer politik. Me mon ti anvi pres lo bon nouvel Rwayonm. (Zan 15:19) Alor mon ti demande ki zot konsider mwan konman en minis relizye.

Mon ti vreman kontan ler Frer Miller ti dir  mwan ki i pou vin avek mwan renyon sa komite. I pa ti en dimoun timid e dimoun pa ti fer li per. I ti osi konn byen Lekritir. Avek li dan mon kote, sa ti donn mwan bokou kouraz! Ver lafen lete 1954, gras a sa renyon, komite ti aksepte mon demann pour ganny konsidere konman en minis relizye. Aprezan mon ti lib pour fer plis pour Zeova.

Zis apre sa, mon ti ganny envite pour servi dan Betel, ki sa letan ti apel Watchtower Farm, lo Staten Island, New York. Mon ti servi pour apepre trwa-z-an laba. Mon ti ganny bokou zoli leksperyans, parski mon ti zwenn plizyer frer ek ser saz e mon’n travay ansanm avek zot.

Lo sa laferm lo Staten Island ti osi annan stasyon radyo WBBR. Depi 1924 ziska 1957 zis bann Temwen Zeova ki ti travay kot sa stasyon radyo. Zis 15 a 20 manm lafanmir Betel ki ti ganny demande pour travay lo laferm. Laplipar parmi nou ti zenn e pa tro eksperyanse. Me, Frer Eldon Woodworth ki ti en Kretyen swazir pli aze, ti travay avek nou. I ti parey en papa pour nou e i ti montre nou en kantite keksoz. Parfwa ler nou ti vwar li difisil pour travay avek kanmarad, Frer Woodworth ti pou dir, “Sirman i en keksoz merveye sa ki Senyer in fer avek sa ki i annan pour travay avek.”

Frer Frederick Franz ti osi avek nou e i ti ed nou tou. I ti saz, konn son Labib tre byen e i ti enterese avek sakenn parmi nou. Nou kwizinyen ti Harry Peterson. I ti pli fasil pour nou apel li par son sinyatir, olye son vre non, Papagyropoulos. I ti en Kretyen swazir li osi e i ti kontan son predikasyon. Frer Peterson ti fer byen son travay kot Betel, me i pa ti zanmen negliz son predikasyon. Tou le mwan, i ti plas plis ki san magazin. I ti osi konn byen Labib, ki ti fer li kapab reponn plizyer nou bann kestyon.

Kot laferm, nou ti prepar bann fri ek legim e met zot dan bann bwat pour konserve. Apepre 42,600 lit fri ek legim ti ganny konserve pandan en lannen pour lafanmir Betel.  Mon ti travay avek Etta Huth ki ti en ser byen saz. I ti fer sa bann reset ki nou ti servi pour prepar bann fri ek legim. Lezot ser dan sa landrwa ti vin travay avek nou e Etta ki ti ede organiz zot travay. Menm si Etta ti konn tre byen sa prosedir pour konserv bann fri ek legim, i ti toultan respekte bann frer ki ti pe sirvey laferm. I ti kit en bon legzanp pour nou tou.

Angela Romano ti enn parmi sa bann zenn ser ki ti vin ede lo laferm. Etta ki ti’n ed li ler i ti vin dan laverite. Avril 1958, mon ti marye avek Angie e apre sa, nou ti servi Zeova dan lazwa pour 58 an. Pandan sa bann lannen, fidelite Angie anver Zeova in fer nou maryaz solid. I en dimoun saz e mon definitivman kapab kont lo li dan nenport ki difikilte ki nou fer fas avek.

An 1957 ler bann frer ti vann stasyon WBBR ki ti lo Staten Island, mon ti servi kot Betel Brooklyn pour en pti pe letan. Apre sa, mon ti marye avek Angie, alor nou ti bezwen kit Betel. Pour trwa-z-an, nou ti fer pionye lo Staten Island. Pour en serten letan, mon ti menm travay pour sa nouvo propriyeter stasyon radyo ki ti apel WPOW.

Nou de Angie nou ti gard en lavi senp pour ki nou kapab lib pour al servi nenport landrwa kot i ti annan en bezwen. Sa in fer ki an 1961 nou ti aksepte en lenvitasyon pour servi konman pionye spesyal Falls City, Nebraska. Me pa bokou letan apre ki nou ti’n ariv laba, nou ti ganny envite pour al South Lansing, New York, pour en mwan pour al asiste Lekol Minister Rwayonm. Nou ti kontan sa formasyon ki nou ti gannyen e nou ti krwar ki apre sa lekol nou ti pou retourn Nebraska. Alor, nou ti vreman sirprann ler nou ti ganny nou nouvo responsabilite. Nou ti pe al servi konman misyonner Cambodia! Dan sa zoli pei dan Sides Lazi, nou ti trouve, tande e gout bann keksoz ki ti nouvo pour nou. Nou ti vreman anvi koz lo sa bon nouvel Rwayonm avek bann dimoun laba.

Me apre sityasyon politik ti sanze Cambodia e nou ti bezwen al Sid Vyetnanm. Apre de-z-an mon ti byen malad e malerezman nou ti bezwen retourn Leta-z-ini. Mon ti bezwen en pe letan pour mwan rekipere. Ler mon ti’n byen, nou ti rekonmans fer pionye.

An Mars 1965, nou ti konmans vizit bann kongregasyon. Pour 33 lannen, mwan ek Angie nou’n byen apresye nou travay sirveyan rezyonal e distrik e nou’n ede dan bann lasanble. Mon ti kontan sa travay, vi ki bann lasanble in toultan en letan eksitan pour mwan. Pour detrwa lannen nou’n vizit bann kongregasyon dan Lavil New York e dan son zalantour. Plizyer sa bann lasanble ti ganny fer dan Yankee Stadium.

Nou de Angie nou ti ganny plizyer nouvo responsabilite difisil dan bann lannen ki’n  swiv. An 1995, mon ti ganny demande pour ansenny Lekol Formasyon Ministeryel. Trwa-z-an pli tar, nou ti ganny envite Betel. Apre 40 lannen, mon ti kontan pour retourn Betel kot mon ti konmans mon servis a plen tan. Pour en serten letan, mon ti travay dan Departman Servis e konman en enstrikter dan plizyer lekol. An 2007, Konsey Direkter ti form Departman Lekol Teokratik pour okip tou bann lekol ki Betel ti ansennyen e pour detrwa lannen mon ti sirveyan sa departman.

Tou resaman, plizyer sanzman in ganny fer avek bann lekol Betel. Sa lekol pour bann ansyen ti konmans an 2008. Pour sa prosen de-z-an, plis ki 12,000 ansyen ti ganny ansennyen Patterson e kot Betel Brooklyn. Sa lekol i aprezan pe kontinyen dan plizyer lezot landrwa. An 2010 non sa Lekol Formasyon Ministeryel ti sanze pour vin Lekol pour frer selibater e en nouvo lekol ti ganny formen ki ti apel Lekol pour koup Kretyen.

An Septanm 2014, sa de lekol ti vin en sel lekol e i ti vin Lekol pour bann predikater Rwayonm. Bann zelev ki asiste i kapab bann koup marye, frer selibater ouswa ser selibater. Bann frer ek ser partou dan lemonn ti kontan pour tande ki zot pou ganny sa lekol dan zot prop pei. I eksitan pour konnen ki plis pou annan sa loportinite pour asiste sa bann lekol. Mon vreman rekonesan pour rankontre plizyer ki’n fer bann sanzman dan zot lavi pour kapab arive ganny sa formasyon.

Ler mon mazin mon lavi depi avan mon ti batize dan sa stor byen fre lo laferm ziska ozordi, mon remersye Zeova pour sa bann dimoun saz ki mon’n zwenn. Zot in ed mwan pour konn e servi Zeova pli byen. Serten ti pli zenn ki mwan e lezot ti pli vye. Plizyer parmi zot ti sorti dan bann kiltir ki ti diferan avek sa ki pour mwan. Me mon’n vwar dapre zot bann aksyon ek latitid ki zot ti vreman kontan Zeova. Mon vreman rekonesan pour annan plizyer zanmi ki saz parmi pep Zeova ki mon kapab aprann avek zot.