Esther 9:1-32
9 Siangpahrang nawl chuah ning in tuah dingmi ni, Adar* tiah auhmi thla 12nak thla, ni 13nak ni a hung phan. Mah ni ah Judah mi kha an ral pawl nih kan tei hna lai tiah an i ruahchan nain an i ruahchan ning in a si lo. Judah mi nih anmah a huatu hna kha an tei hna.
2 Anmah harnak pek aa timmi hna kha doh awkah Judah mi cu Siangpahrang Ahasuerus ukmi peng dihlak i khua hna ah an i pum. Asinain mi nih Judah mi kha an ṭih tuk hna caah an do kho hna lo.
3 Peng uktu bawi, siangpahrang kut tang uktu bawi, ram uktu le siangpahrang rian a ṭuanmi dihlak nih Mordekai cu an ṭih caah Judah mi kha an bawmh hna.
4 Mordekai cu siangpahrang inn ah nawl a hung ngei. A nawlngeihnak cu a ṭhawn chin lengmang caah peng dihlak ah a min a thang.
5 Judah mi nih an ral dihlak kha vainam in an tuk hna, an thah hna i an hrawh hna. Anmah a huatu kha an duh paoh in an tuah hna.
6 Siangpahrang umnak* Shushan* khua ah Judah mi nih mi 500 an thah hna i an hrawh hna.
7 Cun Parshandatha, Dalphon, Aspatha,
8 Poratha, Adalia, Aridatha,
9 Parmashta, Arisai, Aridai le Vaizatha zong kha an thah hna.
10 Annih cu Judah mi hna an ral Hammedatha fapa Haman i a fapale pahra an si. Asinain an thah hna hnuah an thilri tu cu zeihmanh an la lo.
11 Cu ni ah siangpahrang umnak Shushan khua ah mi pa zeizat dah thah an si ti kha siangpahrang sinah thawng an thanh.
12 Siangpahrang nih Siangpahrang nu Esther kha “Siangpahrang umnak Shushan khua ah Judah mi nih mi 500 le Haman fapale pahra kha an thah hna i an hrawh hna. Ka ukmi peng dangdang ah zeizat ko dik an va si hnga? Atu zeidah nawl na ka duh? Kaan pek lai. Zeidah hal chap na ka duh? Kaan pek lai” tiah a ti.
13 Esther nih “Siangpahrang, na duhnak a si ahcun Shushan khua i Judah mi cu nihin nawlbia ning in thaizing zong ah tuah awkah nawl awnh si hna seh. Cun Haman fapale pahra cu tung cung ah thlai si hna seh” tiah a ti.
14 Cutin tuah awkah siangpahrang nih nawl a pek hna i Shushan khua ah nawlbia chuah a si. Cun Haman fapale pahra cu tung cung ah thlai an si.
15 Shushan khua i Judah mi hna cu Adar thla, ni 14nak zong ah hmunkhat ah an i pum ṭhan i Shushan ah mi 300 an thah hna. Asinain an thilri tu cu zeihmanh an la lo.
16 Siangpahrang ukmi peng dangdang i Judah mi hna zong an nunnak i runven awkah hmunkhat ah an i pum. An ral pawl kha an hloh dih hna i anmah a huatu mi 75,000 kha an thah hna. Asinain an thilri tu cu zeihmanh an la lo.
17 Mah cu Adar thla, ni 13nak ni ah a si. A ni 14nak ah cun an i din i mah ni kha puai tuah ni le lunglawmhnak ni ah an ser.
18 Shushan khua i Judah mi hna cu ni 13nak le ni 14nak ni ah hmunkhat ah an i pum. A ni 15nak ni ah an i din i mah ni kha puai tuah ni le lunglawmhnak ni ah an ser.
19 Cucaah peng kiken ah a ummi khuate lei Judah mi hna nih Adar thla, ni 14nak kha lunglawmhnak ni, puai tuah ni, nuamhnak ni le pakhat le pakhat tirawl laksawng i pek ni ah an ser.
20 Mordekai nih mah kong kha a ṭial i lamhla, lamnai ah a ummi Siangpahrang Ahasuerus ukmi peng dihlak i Judah mi vialte sinah a kuat hna.
21 Kum fatin Adar thla, ni 14nak le ni 15nak ni ah puai nan tuah lai tiah a fial hna.
22 Zeicahtiah mah ni hna ah Judah mi cu an ral hna kut in an luat i mah thla ah an ngaihchiatnak cu lunglawmhnak ah le an ṭahnak cu puai tuah ni ah aa thleng. Cucaah mah ni hna kha rawl danghnak ni, lunglawmhnak ni, pakhat le pakhat tirawl i pek ni le misifak laksawng pek ni ah an ser lai.
23 Judah mi cu an rak thawkmi mah puai kha tuah peng awk le Mordekai cakuat ning in tuah awkah an hna a tla.
24 Zeicahtiah Judah mi hna an ral Agag mi, Hammedatha fapa Haman nih Judah mi kha hrawh awkah khua a rak khaan. Judah mi kha ṭhihphaih awk le hrawh awkah Pur tiah auhmi camcawhfung a rak zuh.
25 Asinain Esther cu siangpahrang hmai i a luh tikah siangpahrang nih “Judah mi cung i a ṭhalomi a khuakhannak cu amah lu cung lila ah tla ko seh” tiah nawl a chuah i a ṭial. Cun Haman le a fapale cu tung cung ah thlai an si.
26 Cucaah mah ni hna kha Pur* timi min la in Purim tiah an auh. Mordekai cakuat chung i aa ṭialmi ruang ah le anmah theng nih an hmuhmi le an tonmi ruang ah,
27 Judah mi cu anmah theng le an tefa hna le anmah sinah aa fonhmi hna he mah nihnih ah pel lo tein puai tuah awk, kum fatin rikhiahmi caan a phanh tikah cakuat chung ah aa ṭialmi ning in tuah awkah an hna a tla.
28 Puai cu chungkhar kip, peng kip le khua kip ah chankhat hnu chankhat philh loin an tuah awk a si. Mah ni ah a cangmi kha anmah le an tefa hna nih an philh awk a si lo i Purim tiah auhmi puai kha an tuah zungzal awk a si.
29 Cu hnuah Abihail fanu Siangpahrang nu Esther le Judah mi Mordekai nih an nawlngeihnak vialte kha hmang in Purim he aa tlaimi cakuat pahnihnak kha an ṭial.
30 Daihnak bia le zumhawk a tlakmi bia hmang in ṭial a si i Ahasuerus ukmi peng 127 ah a ummi Judah mi vialte sinah kuat a si.
31 Judah mi Mordekai le Siangpahrang nu Esther lamhruainak ning in rikhiahmi caan a phanh tikah rawl ulhnak, nawlnak hna i telin Purim puai tuah ding timi nawlbia kha fehter awkah a si. Judah mi zong anmah theng le an tefa hna nih cutin tuah awkah an hna a tla.
32 Purim he aa tlaimi kong kha Esther nih nawl a chuah i a fehter. Mah kong cu cauk ah ṭial a si.
