Esther 7:1-10
7 Cuticun siangpahrang le Haman cu Siangpahrang nu Esther rawl danghnak ah an kal.
2 A nihnihnak mitsur zu an din lioah siangpahrang nih Esther kha “Siangpahrang nu Esther, zeidah nawl na ka duh? Kaan pek lai. Zeidah hal na ka duh? Ka pennak hnarcheu na ka hal hmanh ah kaan pek lai!” tiah a ti.
3 Siangpahrang nu Esther nih “Maw siangpahrang, na mithmai ṭha ka hmuh i na duhnak a si ahcun nawl kaan duhmi cu ka nunnak khamh awkah a si i hal kaan duhmi cu ka miphun pawl nunnak zuah awkah a si.
4 Zeicahtiah keimah le ka miphun cu hloh awk, thah awk le hrawh awkah zuar kan si cang. Salnu le salpa si awk men in zuar kan si ahcun dai tein ka um ko hnga. Asinain hi thil ṭhalo nih hin siangpahrang cung zong ah sunghralhnak a chuahter lai caah awnh awk a si lo” tiah a ti.
5 Siangpahrang Ahasuerus nih Siangpahrang nu Esther kha “Cu bantuk thil a tuah ngammi cu ahodah a si i khoika ah dah a um?” tiah a hal.
6 Esther nih “A kan dotu le kan ral cu hi miṭhalo pa Haman hi a si” tiah a ti.
Mah tikah Haman nih siangpahrang le siangpahrang nu cu a ṭih tuk hna.
7 Siangpahrang cu a thin a hung tuk i mitsur zu dinnak in a tho. Cun siangpahrang inn i dum ah a kal. Haman cu siangpahrang pa nih dan a ka tat cang lai ti a hngalh caah Siangpahrang nu Esther kha a nunnak caah nawl ding in a tho.
8 Siangpahrang cu dum in mitsur zu dinnaklei a kir tikah Haman cu Esther ṭhutnak ah a bawhmi kha a hmuh. Mah tikah siangpahrang nih “Keimah ka innchung lila ah maw mah pa nih siangpahrang nu hi tlaihhrem a timh” tiah a au. Cutin a aule cangka Haman cu a hmai an khuh.
9 Bawi pakhat a simi Harbona nih “Siangpahrang, na nunnak aan khamhtu Mordekai thlainak caah Haman nih tung pakhat a bunh. Tung cu dong 50* a sang i Haman inn ah a dir ko” tiah a ti. Mah tikah siangpahrang nih “Cuka tung ah cun amah kha thlai u” tiah a ti.
10 Cucaah Haman cu Mordekai caah a rak timhmi tung cung ah khan an thlai. Cu tikah siangpahrang cu a thinhunnak a dam.
Footnotes
^ Pe 73 (22.3 m) hrawng. Thlaihhlei B14 ah zoh.
