Esther 2:1-23
2 Mah hnuah Siangpahrang Ahasuerus cu a lung a hung dam i Vashti nih a tuahmi le zeitindah dantat ding tiah biakhiahnak a rak tuahmi kha a hun hngalh ṭhan.
2 Siangpahrang bultawltu hna nih hitin an ti: “Siangpahrang caah aa dawhmi ngaknu thiang hna kha kawlpiak si seh.
3 Siangpahrang nih a ukmi peng vialte ah mi kha thim hna seh law annih nih aa dawhmi ngaknu thiang hna kha Shushan* siangpahrang inn* i nu pawl umnak inn ah ratpi hna seh. Siangpahrang inn i nu pawl a zohkhenhtu tildit mi* Hegai kut tang ah chiah si hna seh law ṭamhmawih si hna seh.*
4 An lakin siangpahrang lung a tong bikmi nu cu Vashti canah siangpahrang nu si seh.” Mah ruahnak cheuhnak nih siangpahrang cu a lung a ton ngaingai i cuticun a tuah.
5 Shushan khua siangpahrang inn ah Judah mipa pakhat a um. A min cu Mordekai a si. A pa cu Jair a si, Jair cu Shimei fapa a si, Shimei cu Benjamin phun Kish fapa a si.
6 Anih cu Babilon Siangpahrang Nebukhadnezzar nih Judah Siangpahrang Jekhoniah* he Jerusalem in sal ah a kalpimi hna lakah aa tel ve.
7 Mordekai cu dankhat a far* Esther tiah auhmi Hadassah* a zohkhenhtu a si. Zeicahtiah anih cu nulepa a ngei ti lo. Esther cu a pumrua le a muisam aa dawh tuk. A nu le a pa an thih tikah Mordekai nih a fanu bantuk in aa cawm.
8 Siangpahrang nawl chuah ning in ngaknu tampi cu Shushan khua siangpahrang inn ah ratpi an si. Esther zong siangpahrang inn ah ratpi a si ve i nu pawl zohkhenhtu Hegai kut tang ah chiah a si.
9 Esther nih Hegai cu a lung a ton ngaingai i a mithmai ṭha a hmu. Cucaah amah ṭamhmawih awk le a hleikhunmi rawl dangh awkah Hegai nih a timhtuah colh i siangpahrang inn in nu pasarih kha a pek. Esther le a sinum nu hna cu nu pawl umnak inn i a ṭha bikmi hmun ah a chiah hna.
10 Mordekai nih bia a cah bantuk in Esther nih a miphun kong siseh, a chungkhar kong siseh zeihmanh a chim lo.
11 Esther cu zeidah a lawh i zeitindah a um ti hngalh awkah Mordekai cu nu pawl umnak inntual hmaiah nifate aa chawk.
12 Ngaknu pawl cu mura chiti in thla ruk, balsam chiti le a dang rimhmui chiti a phunphun in thla ruk an ṭamhmawih hna. Cuticun thla 12 chung an ṭamhmawih hna hnuah Siangpahrang Ahasuerus hmaiah pakhat hnu pakhat in chuahpi an si.
13 Siangpahrang hmaiah a chuakmi ngaknu nih nu pawl umnak inn in siangpahrang innlei a kal tikah a duhmi paoh a hal khawh.
14 Zanlei ah siangpahrang sinah a lut i zinglei ah nu pawl umnak a pahnihnak inn ah a kir. Mah inn cu nuchun pawl a zohkhenhtu tildit mi Shaashgaz kut tang ah a um. Siangpahrang lung a ton i a min in auh ṭhan a si lawng ah siangpahrang hmaiah a lut ṭhan lai.
15 Mordekai nih a fanu bantuk in aa cawmmi Abihail fanu, dankhat a far Esther cu siangpahrang sin luh caan a phanh tikah nu pawl a zohkhenhtu tildit mi Hegai nih a pekmi dah ti lo cu zeihmanh a hal lo. (Esther cu a hmumi paoh nih an dawt.)
16 Siangpahrang Ahasuerus a bawi kum sarihnak, Tebeth* tiah auhmi a thla hranak thla ah Esther cu siangpahrang inn ah an luhpi.
17 Siangpahrang nih Esther cu a dang nu vialte nakin a duh deuh. A dang ngaknu hna nakin a lung a ton deuh i mithmai ṭha a pek caah siangpahrang nu lukhuh kha a khuh i Vashti canah siangpahrang nu ah a ser.
18 Cun siangpahrang nih a bawi hna le a salle vialte caah rawl danghnak puai nganpi a tuah. Mah cu Esther puai a si. A ukmi peng chung ah luatnak nawl* a thanh i siangpahrang lawng nih a pek khawhmi laksawng kha a pek hna.
19 Ngaknu pawl a voihnihnak an ratpi hna lioah Mordekai cu siangpahrang kutka ah a ṭhu.
20 Mordekai nih a cah bantuk in Esther nih a chungkhar le a miphun kong zeihmanh a chim lo; Mordekai zohkhenhnak tang ah a rak um lio bantuk in a nawl a ngaih peng.
21 Mordekai cu siangpahrang kutka i a ṭhut lioah kutka cawngtu bawi pahnih Bigthan le Teresh cu Siangpahrang Ahasuerus cung ah an thin a hung i thah an timh.
22 Mordekai nih mah kong cu a theih tikah Siangpahrang nu Esther kha a chimh colh. Cun Esther nih Mordekai canah siangpahrang kha a va chimh.
23 Mah kong kha an dothlat i a hmaan ti an hmuh tikah kutka cawngtu pahnih cu tung cung ah an thlai hna. Mah kong cu siangpahrang hmaiah tuanbia cauk ah an ṭial.
Footnotes
^ Asiloah “Susa.”
^ Asiloah “ralhau, ralhruang.”
^ Biafang Fianternak ah zoh.
^ Asiloah “hmeh si hna seh.”
^ 2Si 24:8 ah Jehoiachin tiah auh a si.
^ Asiloah “a pa unau fanu.”
^ A sullam “Martal kung.”
^ Thlaihhlei B15 ah zoh.
^ Mah cu ngunkhuai in luatnak, ralkap tlaknak in luatnak, thonginn in luatnak asiloah mah vialte in luatnak a si kho.
