Esther 8:1-17
8 Mah ni ah khan Siangpahrang Ahasuerus nih Judah mi hna an ral Haman inn* kha Siangpahrang nu Esther cu a pek; cun Esther nih Mordekai he an i pehtlaih ning kha a chimh caah Mordekai cu siangpahrang hmaiah a rak chuak.
2 Siangpahrang nih Haman sinin a lak ṭhanmi a min khenhnak kutdonghrolh kha a phoih i Mordekai cu a pek. Esther nih Mordekai kha Haman inn zohkhenhtu ah a chiah.
3 Esther cu siangpahrang hmaiah biachim ding in a chuak ṭhan. Agag mi Haman nih Judah miphun harnak pek ding in aa timhnak kha let ṭhan awkah siangpahrang kehram ah a bawk i a ṭah buin a nawl.
4 Siangpahrang nih sui bawifung a hlerpiak tikah Esther cu a tho i siangpahrang hmaiah a dir.
5 Cun hitin a ti: “Siangpahrang na duhnak a si i na mithmai ṭha ka hmuh ahcun, siangpahrang nih aa tlak tiah na ruah i na lung ka tlin ahcun siangpahrang ukmi peng vialte chung ah a ummi Judah mi hna hrawh awkah ṭhatlonak in khua a khangtu Agag mi, Hammedatha fapa Haman ṭialmi ca kha let ṭhan awkah nawlbia pakhat in ṭial si seh.
6 Ka miphun pawl harnak an tonmi le ka rualchan pawl thah an simi cu zeitindah ka zoh sawhsawh khawh lai?”
7 Siangpahrang Ahasuerus nih Siangpahrang nu Esther le Judah mi Mordekai cu “Haman nih Judah miphun pawl hrawh a timh hna caah amah cu tung cung ah ka thlai cang i a inn zong Esther ka pek cang.
8 Siangpahrang min in ṭial i siangpahrang min khenhnak kutdonghrolh in khenhmi nawlbia cu let ṭhan khawh a si ti lo, cucaah Judah mi caah aa tlak nan timi paoh kha ka min in ṭial u law ka min khenhnak kutdonghrolh in khenh u” tiah a ti hna.
9 Cucaah siangpahrang caṭialtu pawl cu Sivan* tiah auhmi thla thumnak thla, ni 23nak ni ah auh an si. Annih nih Judah mi sin lawng ah si loin India in Ethiopia tiang peng 127 chung ah a ummi siangpahrang kut tang uktu bawi hna, uktu hna le peng uktu hna sinah Mordekai nawl pek ning in ca an ṭial. Peng pakhat cio kha anmahle an ca cio in le miphun pakhat cio kha anmahle an holh cio in an kuat hna. Judah mi zong kha anmah an ca le an holh in an kuat hna.
10 Mordekai nih Siangpahrang Ahasuerus min in a ṭial i siangpahrang min khenhnak kutdonghrolh in a khenh. Mah cakuat kha caphortu pawl a pek hna; caphortu hna nih siangpahrang rian caah zuatmi, tlik a ṭhawngmi rang kha an i cit i an phorh.
11 Cakuat chung ah siangpahrang nih khua kip ah a ummi Judah mi kha hmunkhat ah i pumh in an nunnak i runven awkah nawl a awnh hna. Anmah a dotu cu zei bantuk miphun le peng an si hmanh ah, nu an si ah, ngakchia an si ah hloh awk, thah awk, hrawh awk le an thilri lak awkah nawl a awnh hna.
12 Mah hihi Adar* tiah auhmi thla 12nak thla, ni 13nak ni ah Siangpahrang Ahasuerus ukmi peng dihlak ah nikhat te ah tuah ding a si.
13 Ca chung ah aa ṭialmi cu peng kip ah nawlbia in chuah a si lai i mikip sinah thanh a si lai. Cuticun Judah mi cu mah ni ah an ral pawl lehrulh awkah timhcia an si kho lai.
14 Siangpahrang nawl peknak ning in caphortu hna nih siangpahrang rian caah hmanmi rang kha i cit in khulrang in an kal. Cun siangpahrang umnak* Shushan* khua zong ah mah nawlbia kha an thanh.
15 Mordekai cu bawi thilthuam a dummi le a raangmi aa hruk i maimaw rong tuuhmul puan aa aih, sui bawiluchin aa chinh i siangpahrang hmai in a chuak. Cun Shushan khuami hna cu lunglawmhnak in an au.
16 Judah mi cu an hna a ngam,* lunglawmhnak in an khat i mi nih an hun upat hna.
17 Siangpahrang nawlbia a phanhnak peng vialte le khua vialte ah Judah mi cu lunglawm, thanuam in an um i rawl danghnak puai an tuah. Cuka ram i a ummi mi tampi nih Judah mi kha an ṭih hna caah Judah mi kan si tiah an i ti.
