Esther 6:1-14
-
Mordekai cu siangpahrang nih upatnak a pek (1-14)
6 Cu zan ah cun siangpahrang cu aa hngilh kho lo. Cucaah tuanbia cauk kha rak pu u tiah a ti hna i siangpahrang cu an relpiak.
2 Cauk chung ah siangpahrang kutka cawngtu bawi pahnih Bigthana le Teresh nih Siangpahrang Ahasuerus thah an timhmi Mordekai nih a phuannak kong kha an hmuh.
3 Khi tikah siangpahrang nih “Mah caah hin Mordekai cu upatnak le laksawng pek a si cang maw?” tiah a hal hna. Siangpahrang bultawltu hna nih “Zeihmanh pek a si rih lo” tiah an ti.
4 A hnuah siangpahrang nih “Inntual ah ahodah a um?” tiah a hal hna. Mah lioah Haman cu a bunhmi tung cung ah Mordekai thlai ding in siangpahrang chimh awkah lenglei tual ah a rak phan.
5 Siangpahrang bultawltu hna nih “Inntual ah Haman a um” tiah an ti tikah siangpahrang nih “Rak luhter u” tiah a ti hna.
6 Haman a rak luh tikah siangpahrang nih “Upatnak pek ka duhmi pa caah zeidah tuahpiak ah a ṭhat lai?” tiah a hal. Mah tikah Haman nih a lung chung in “Siangpahrang nih upatnak pek a duhmi cu keimah dah ti lo cun ahodah a um hnga?” tiah a ruah.
7 Cucaah Haman nih siangpahrang kha hitin a ti: “Siangpahrang nih upatnak pek a duhmi pa caah,
8 siangpahrang nih aa hrukmi thilthuam kha rak pu hna seh law siangpahrang nih aa citmi, a lu ah a hleikhun in ṭamhmi rang kha ratpi hna seh.
9 Thilthuam le rang cu siangpahrang bawi hna lak i pakhat sinah pek si seh. Cun siangpahrang nih upatnak pek a duhmi pa cu thuamh hna seh, rang kha citter hna seh law khua chung tual ah chawhpi hna seh. ‘Siangpahrang nih upatnak pek a duhmi pa cu hitin tuah a si!’ tiah a hmai in au hna seh.”
10 Cu tikah siangpahrang nih Haman kha “Khulrang in thilthuam le rang cu va la law siangpahrang kutka ah a ṭhumi Judah mi Mordekai caah na chim ning in va tuah. Na chimmi cu pakhat hmanh hrelh hlah” tiah a ti colh.
11 Cucaah Haman nih thilthuam le rang cu a lak, Mordekai cu a thuamh i rang kha a citter. Cun khua chung tual ah a chawhpi i “Siangpahrang nih upatnak pek a duhmi pa cu hitin tuah a si!” tiah a hmai in a au.
12 Mah hnuah Mordekai cu siangpahrang kutka ah a kir ṭhan. Asinain Haman tu cu a ṭah bu le a lu khuh buin inn ah khulrang in a ṭin.
13 Haman nih a nupi Zeresh le a hawile kha a tonmi thil vialte cu a chimh hna. A mifim pawl le a nupi Zeresh nih “Atu thawk in Mordekai hmaiah na sung cang. Mordekai cu Judah mi a si ahcun na tei lai lo; na sung hrimhrim ko lai” tiah an ti.
14 Bia an i ruah lioah cun siangpahrang bawi pawl an rak phan i Haman cu Esther timhmi rawl danghnak ah khulrang in an kalpi.
