Esther 5:1-14
5 A nithumnak ni ah Esther cu siangpahrang nu thilthuam aa thuam i siangpahrang inn hmaiah a ummi innchung tual ah a dir. Mah lioah siangpahrang cu siangpahrang inn luhnaklei hoih in a bawiṭhutdan cung ah a ṭhu.
2 Siangpahrang nu Esther inntual ah a dirmi kha a hmuh tikah mithmai ṭha a pek i a kut ah aa putmi sui bawifung kha a hlerpiak. Esther zong nih a hun naih i bawifung parte kha a tawngh.
3 Siangpahrang nih “Siangpahrang nu Esther, zeidah na herh? Zeidah hal na ka duh? Ka pennak hnarcheu na ka hal hmanh ah kaan pek lai” tiah a ti.
4 Esther nih “Siangpahrang, na lung a tlin ahcun nihin na caah ka timhmi rawl danghnak ah Haman he rak ra u ti ka duh” tiah a ti.
5 Mah tikah siangpahrang nih a salle kha “Esther sawmnak ning in Haman cu ratpi zok u” tiah a ti hna. Cun siangpahrang le Haman cu Esther timhmi rawl danghnak ah an kal.
6 Mitsur zu an din lioah siangpahrang nih Esther cu “Zeidah nawl na ka duh? Kaan pek lai. Zeidah hal na ka duh? Ka pennak hnarcheu na ka hal hmanh ah kaan pek lai” tiah a ti.
7 Mah tikah Esther nih hitin a leh: “Nawl kaan duhmi le hal kaan duhmi cu,
8 na mithmai ṭha ka hmuh ahcun, kaan nawlmi ning in pek na ka duh i kaan halmi ning in tuah na duh ahcun thaizing ah siangpahrang le Haman caah ka timh dingmi rawl danghnak ah ra ṭhan u. Thaizing tu ah na chim ning in kaan hal te lai.”
9 Cu ni ah Haman cu lunglawm thanuam ngai in a ṭin. Asinain siangpahrang kutka ah a ummi Mordekai nih a dirpiak lomi le therphang in a um lomi kha a hmuh tikah Haman cu a thin a hung tuk.
10 Asinain a thin aa sum i inn ah a ṭin. Cun a hawile le a nupi Zeresh kha a auh hna.
11 Haman nih zeitluk in dah a rum, fapa pa zeizat dah a ngeih ti le siangpahrang nih a reng a kaiternak kong le bawi hna le sal hna cung ah a hlorhnak kong kha porhlaw ngai in a chim.
12 Cun Haman nih hitin a ti chap: “Mah lawng hmanh a si rih lo. Siangpahrang nu Esther nih a timhmi rawl danghnak ah siangpahrang he kal awkah keimah dah ti lo cu ahohmanh a sawm hna lo. Cun thaizing zong ah siangpahrang he a sinah eiṭi awkah a ka sawm rih.
13 Asinain siangpahrang kutka ah Judah mi Mordekai a ṭhutmi ka hmuh chung paoh cu kaa nuam kho lai lo.”
14 Cucaah a nupi Zeresh le a hawile dihlak nih “Dong 50* a sangmi tung pakhat bunh si seh law cuka ah Mordekai kha thlai awkah siangpahrang cu zinglei ah va chim. Mah hnuah rawl danghnak ah siangpahrang he lunglawm tein va kal” tiah an ti. Ruahnak an cheuhmi cu Haman nih a duh ngai caah tung cu a bunhter hna.
Footnotes
^ Pe 73 (22.3 m) hrawng. Thlaihhlei B14 ah zoh.
