1. Eáni eú kapas áwewe mi áiti ngenikich lamoten ach sipwe áfánni ewe fansoun sia nóm lón me met a fiffis únúkkúch. (Ppii ewe sasing lepoputáán ei lesen.)

 EWE mwichelap epwele poputá. Ewe chón átettel a fetál ngeni ewe stage me a etiwa meinisin chón fiti ewe mwichelap. Ewe nikáttik epwele poputá le ttik. Ekkewe chón fiti ewe mwichelap ra silei pwe a tori ewe fansoun ar repwe mómmóót. Ra mochen aúseling ngeni ewe nikáttik mi múrinné, me ra mwétéresiti ar repwe rongorong ekkewe afalafal repwe katowu. Nge neman ekkóch chón fiti rese fen áfánni ewe chón átettel are áfánni pwe a ttik ewe nikáttik. Iwe, rese mirititi pwe ewe mwichelap a fen poputá, me ra chúen feilfetál are pwóppwóróusfengen me chiechier kewe. Ei mettóch a áiti ngenikich met a tongeni fis ika sise áfánni ewe kulók are met a fiffis únúkkúch. A mmen lamot ei lesen ngenikich pokiten ekiseló chék och mettóch mi fókkun watte epwele poputá le fis, nge mi lamot sipwe mmólnetá ngeni. Met ena?

2. Pwata Jesus a ereni néún kewe chón káé, “Oupwe mamasa”?

² Jesus Kraist a éúréúra néún kewe chón káé usun lamoten ar repwe mammasa me ammólnatá fán iten ewe “fansoun sopolan.”  A ereniir: “Oupwe mamasa o afälikemi, pun ousap silei inet ewe fansoun epwe war.” Mwirin ena a ereniir fán fite: “Oupwe mamasa.” (Mat. 24:3; álleani Markus 13:32-37.) Ewe puken Mateus a pwal pwáraatá pwe Jesus a éúréúra néún kewe chón káé usun ei mettóch. A ereniir: “Iei mine oupwe mamasa, pun ousap silei lon meni rän ämi Samol epwe wareto.” A pwal éúréúrer sefál: “Iei mine pwal ämi, oupwe molotä fansoun meinisin, pun Nöün Aramas epwe war lon eu otun ousap ekieki ngeni.” Mwirin a pwal apasa sefál: “Iei mine oupwe mamasa, pun ousap silei lon meni rän ika kulok Nöün Aramas epwe war lon.”​—Mat. 24:42-44; 25:13.

3. Pwata sia aúseling ngeni án Jesus kapasen éúréúr?

³ Chón Pwáraatá Jiowa ra aúseling ngeni án Jesus na kapasen éúréúr. Sia silei pwe sia nónnóm lón ewe “fansoun sopolan” me ewe riáfféú mi lapalap epwele poputá ekiseló chék. (Tan. 12:4; Mat. 24:21) Néún Jiowa kewe aramas ra afalafala ewe kapas allim usun ewe Mwú wóón unusen fénúfan, usun met Jesus a fen oesini. Nge lón pwal ei atun, sia kúna pwe a fiffis maun, semmwen, chechchechin fénú, me echik lón chómmóng fénú. Aramas ra osukosuk ren ar lamalam mi otupureló me a lapóló atai allúk me féfférún akkachofesá lap seni lóóm. (Mat. 24:7, 11, 12, 14; Luk. 21:11) Iei sia mwétéres le witiwiti ewe fansoun Jesus epwe war me i epwe apwénúetá letipen Seman we.​—Mark. 13:26, 27.

4. (a) Pwata sia tongeni lúkú pwe Jesus a silei ineet ewe Armaketon epwe fis? (b) Inaamwo ika sise silei ineet ewe riáfféú mi lapalap epwe poputá, nge met sia tongeni lúkúlúkú?

⁴ Lupwen sia fiti eú mwichelap, sia silei ika kulók fite epwe poputá kinikinin lón ewe prokram. Iwe nge, ese tufich ach sipwe silei kulókun are ránin poputáán ewe riáfféú mi lapalap. Atun Jesus a nóm fénúfan, iei met a erá: “Esap wor eman a silei ewe rän are ewe kulok ekei mettoch repwe fis lon, sap mwo nge ekewe chon läng are ewe Nau, nge ewe Sam echök a silei.” (Mat. 24:36) Pwúngún, ese mwáál Jesus a silei iei ineet epwe fis ena maun pún i ewe epwe wisen emmweni ewe maunen Armaketon. (Pwär. 19:11-16) Nge kich sise silei ránin are kulókun warotoon ewe sópwólóón. Ina popun mi fókkun lamot ach sipwe mammasa. Jiowa a fen filatá menni rán ewe riáfféú mi lapalap epwe poputá, me iteiten rán sia fetál ngeni warotoon ena rán. “Epwe fokun pwönüetä, nge esap mang.” (Álleani Apakuk 2:1-3.) Ifa usun sia tongeni silei ena?

5. Apwóróusa eú pwóróus mi áweweei pwe án Jiowa oesini ra chék pwénúetá lón wesewesen ewe fansoun a fen filatá.

⁵ Án Jiowa kewe oesini ra chék pwénúetá lón wesewesen ewe fansoun a fen filatá! Áwewe chék, ekieki usun ewe rán Jiowa a angasaaló néún kewe aramas seni lón Isip. Ina ewe rán Nisan 14 lón ewe ier 1513 mwen Kraist. Iei met Moses a makkeei mwirin usun ena rán: “Lon amüchülan ränin ekewe föpükü ilik ier, ekewe mwicheichen aramas än ewe Samol mi Lapalap meinisin ra towu seni ewe fanü Isip.” (Eks. 12:40-42) Lón Nisan 14 lón ewe ier 1943 mwen Kraist, 430 ier me mwen án chón Israel ngaseló seni lón Isip, án Jiowa pwon ngeni Apraham pwe epwe efeiéchú mwirimwirin kewe a pwénúetá. (Kal. 3:17, 18) Mwirin och fansoun, Jiowa a ereni Apraham: “Iei kopwe fokun silei pwe mwirimwirum kana repwe wasöla lon eu fanü sap fanüer. Aramas repwe nöüniir amanau ikenan, repwe küna riaföü lon ükükün föpükü ier.” (Ken. 15:13; Föf. 7:6) Ekkena 400 ier ra poputá lón ewe ier 1913 mwen Kraist, lupwen Ismael a poputá le turunufaseei Isaak. Ekkena ier ra muchúló lón ewe rán Jiowa a angasaaló chón Israel  seni Isip. (Ken. 21:8-10; Kal. 4:22-29) Ewer, fitepúkú ier me mwan, Jiowa a fen filatá ewe rán epwe angasaaló néún kewe aramas lón!

6. Pwata sia tongeni lúkúlúk pwe Jiowa epwe amanawa néún kewe aramas?

⁶ Josua i emén lein ekkewe chón Israel mi ngaseló seni lón Isip. Fite fite ier mwirin, a áchema ngeni néún Kot aramas: “Ämi meinisin oua silei seni lelukemi me letipemi, pwe ewe Samol mi Lapalap a ngenikemi ekewe mettoch mi mürina meinisin a pwon ngenikemi. Iteiten ekewe pwon a eäni ngenikemi ra pwönüetä, nge esap wor eu me leir esap pwönüetä.” (Jos. 23:2, 14) Jiowa a fen pwonei pwe I epwe amanawa néún kewe aramas seni ewe riáfféú mi lapalap me ngeniir manaw esemuch lón ewe ótót sefé. Sia tongeni lúkúlúk pwe an na pwon epwe pwénútá. Iwe, ika sia mochen nónnóm lón ena ótót sefé, mi lamot sipwe mammasa.

7, 8. (a) Ifa wisen emén chón mmas lón fansoun lóóm lóóm, me met sia tongeni káé seni? (b) Áweweei met a tongeni fis ika ekkewe chón mmas ra annutoló me túmúnúngaw.

⁷ Sia tongeni káé seni ekkewe chón mmas mi mammasa ekkewe telinimw lóóm lóóm. Chómmóng me lein ekkena telinimw, kapachelong Jerusalem, ttitir a tekia me a pwelliireló pwe ekkewe chón oputer resap tongeni tolong lóór. Ekkewe chón mmas ra útá wóón ekkena ttit, me ra tongeni kúna unusen ewe fénú mi pwelli ewe telinimw. Ekkóch chón mmas ra útá ppen asamen ttitin ewe telinimw. Mi lamot chókkana repwe mammas lerán me lepwin, me ika ra kúna chón koputer pwe ra feito, iwe repwe éúréúra chón ewe telinimw. (Ais. 62:6) Ra silei watteen lamoten ar repwe nenneló me mammasaéchú met a fiffis. Ika ra túmúnúngaw, chómmóng aramas ra tongeni máló.​—Is. 33:6.

⁸ Josephus, ewe a mak usun uruwoon chón Jus, a áweweei ifa usun ekkewe chón Rom ra tolong lón Jerusalem lón ewe ier 70. Ekkewe chón mmas mi wisen mammasa eú kinikinin ewe telinimw ra annutoló. Iwe, pokiten ena, ekkewe soufiun Rom ra tongeni tolong lón ena telinimw. Ra ló ngeni ewe imwenfel me kenaló, mwirin ra ataieló unusen ena telinimw. Ina ewe sáingoon mettóch mi fis lón ewe riáfféú mi lapalap seni meinisin ewe mwúún Jus a fen kúna.

9. Met chómmóng aramas lón ei fansoun rese mirititi?

⁹ Lap ngeni ekkewe mwú lón ei fansoun ra néúnéú soufiu, camera, me metakkan le mammasa me túmúnú kiánin fénúer. Ekkena mwú ra mammasa ika mi wor emén are och mettóch mi tongeni atai núkúnúkéchún fénúer kana. Nge rese mirititi pwe mi wor eú mwú mi fókkun manaman mi nóm láng nge Jesus Kraist i ewe sou nemenem lón. Ekiseló chék, ena mwú epwe maunei meinisin ekkewe mwúún fénúfan. (Ais. 9:6, 7; 56:10; Tan. 2:44) Sia wikkitiwiti warotoon ena fansoun me sia mochen sipwe mmólnetá ngeni. Ina minne sia aúselingéch ngeni ekkewe oesini lón Paipel me akkangang ngeni Jiowa fán tuppwél.​—Kölf. 130:6.

10, 11. (a) Met a lamot sipwe túmúnú senikich, iwe pwata? (b) Pwata ka fókkun lúkú pwe ewe Tefil a fen etipetipa aramas pwe resap áfánni ekkewe oesini lón Paipel?

¹⁰ Anchangei emén chón mmas mi fen nenneló unusen eú pwiin. Lón ekkewe sáingolóón awa a mmas, a mmen weires an epwe chúen nenneló pún a fókkun pekkus. Pwal ina chék usun ren kich, iei sia nónnóm lón ekkewe ránin lesópwólóón ótóten ei fénúfan. A weiresiló ach sipwe chék nenneló lón ei fansoun a fókkun arapakkanoto ena rán. A ifa me elichippúngún ika sise likiitú lón ach mammasa! Sipwe pwóróus wóón  úlúngát mettóch mi tongeni eppetikich lón ach nenneló.

¹¹ Ewe Tefil a otupu aramas. I ewe “samolun ei fanüfan.” Ekiseló me mwen án Jesus epwele máló, fán úlúngát i a áchema ngeni néún kewe chón káé usun ena mettóch. (Joh. 12:31; 14:30; 16:11) Ewe Tefil a áeá lamalam chofona le otupu aramas. Ina ewe popun chómmóng aramas ikenái rese áfánni ekkewe oesini lón Paipel mi wesewesen affata pwe sópwólóón ei ótót a fókkun arapoto. (Sef. 1:14) A ffat pwe Satan a “achuna ekiekin letipen chokewe resap lükü.” (2 Kor. 4:3-6) Iwe, pokiten ena, lupwen sia achocho le ereni aramas pwe a chék arapoto sópwólóón ei ótót me iei Kraist a poputá le nemenem, chómmóng leir rese mochen aúseling. Fán chómmóng ra kan erá: “Use mochen rongorong.”

12. Pwata mi lamot sisap mut ngeni ewe Tefil an epwe otupukich?

¹² Mi lamot sisap lichippúng ren án chómmóng rese mochen rongorong ngeni ekkewe oesini lón Paipel. Sia silei ewe popun mi lamot sipwe chék mammasa. Paulus a ereni pwiin kewe Chón Kraist: “Ämi oua püsin silefichi, pwe ewe rän ach Samol epwe war lon epwe usun chök än eman chon solä war lepwin.” (Álleani 1 Tesalonika 5:1-6.) Jesus a éúréúrakich: “Oupwe molotä, pun Nöün Aramas epwe war lon eu otun ousap ekieki ngeni.” (Luk. 12:39, 40) Ekiseló chék, Satan epwe otupu aramas ar repwe ekieki pwe mettóch meinisin wóón fénúfan a “kinamwe o nükünüköch.” Iwe, mwittir chék, ránin Jiowa we epwe war, me aramas repwe máirú. Nge ifa usun kich? Ika sia mochen mmólnetá ngeni ena rán me sisap tupuló usun chék ekkewe ekkóch, mi lamot “sipwe nenela o mamasafichi.” Ina ewe popun mi lamot sipwe álleani án Kot we Kapas iteiten rán me ekilonei met Jiowa a erenikich.

13. Ifa usun ekiekin fénúfan a etipetipa aramas, me ifa usun sia tongeni túmúnúkich seni ena etipetip mi efeiengaw?

¹³ Ekiekin fénúfan a etipetipa án aramas ekiek. Chómmóng aramas ikenái rese meefi lamoten ar repwe silei Kot. (Mat. 5:3) Nge ra fen áeá watteen ar péchékkúl me fansoun le achommongaaló minne a nóm rer. (1 Joh. 2:16) Pwal och, lón ei fansoun lap seni lóóm, a wor chómmóng sókkopaten minen apwapwa mi luki letipen aramas me etipetiper le aúcheani met epwe apwapwaai  pwisin mocheniir. (2 Tim. 3:4) Ekkena mettóch ra eriki aramas seni minne mi fókkun lamot, me rese ekieki usun ar riri ngeni Kot. Ina popun Paulus a áchema ngeni ekkewe Chón Kraist lamoten ar repwe “pwätä seni möür” ren ar resap akkomwa lón manawer ar apwénúetá mochenin futuker.​—Rom 13:11-14.

14. Ifa ewe kapasen éúréúr mi mak lón Lukas 21:34, 35?

¹⁴ Sia mochen sipwe nóm fán emmwenien án Kot we manaman mi fel nge esap fen án ei fénúfan ekiek. Ren án Jiowa we manaman mi fel, i a fen álisikich le weweéchúti met epwele fis. (1 Kor. 2:12) ^[1] Nge mi lamot ach sipwe túmúnúéch. Pwal mwo nge ekkewe mettóch sia kan féri rán me rán ra tongeni erikikicheló seni ach angang ngeni Jiowa. (Álleani Lukas 21:34, 35.) Ekkóch ra tongeni erenikich pwe sia umwes ren ach lúkú pwe sia nónnóm lón ránin lesópwólóón ei fénúfan. (2 Pet. 3:3-7) Nge mi lamot sisap lichippúng rer. A nóm rech pisekin ánnet mi fókkun ánnetatá pwe epwele war ewe sópwólóón. Ika sia mochen án Kot we manaman mi fel epwe emmwenikich, mi lamot sipwe fiti pwiich kewe Chón Kraist le mwichfengen iteitan.

15. Met a fis ngeni Petrus, James, me Johannes, me ifa usun minne a fis ngeniir a pwal tongeni fis ngenikich?

¹⁵ Ach apwangapwang a áweiresi ach sipwe mammasa. Jesus a weweiti pwe aramas rese unuséch me mi wor ar apwangapwang. Ekieki met a fis lón ewe pwinin me mwen an epwe máló. Inaamwo ika Jesus emén mi unuséch, nge a silei pwe mi lamot an epwe iótek ngeni Seman we an epwe álisi pwe epwe amwéchú an tuppwél. A tingorei aposel Petrus, James, me Johannes ar repwe nenneló atun i a iótek. Nge ekkena aposel rese mirititi úkúkún lamoten ar repwe nenneló. Ra pekkus, iwe ra annutoló. Jesus mi pwal pekkus nge a chék nenneló me ikkiótek ngeni Seman we. Itá úrúrún ekkena aposel repwe pwal ikkiótek lón ena atun.​—Mark. 14:32-41.

16. Me ren Lukas 21:36, met Jesus a áiti ngenikich ach sipwe féri pwe sipwe “mamasa”?

¹⁶ Met epwe álisikich ach sipwe “mamasa” me mmólnetá ngeni ránin Jiowa we? Mi lamot epwe péchékkúl ach mochen féri minne mi pwúng. Nge ese naf ena. Fitu rán me mwen án Jesus máló, a ereni néún kewe chón káé pwe a lamot repwe ikkiótek ngeni Jiowa pwe epwe álisiir. (Álleani Lukas 21:36.) Ren ach sipwe mammasa lón ei fansoun lesópwólóón, mi lamot sipwe pwal iótek ngeni Jiowa fansoun meinisin.​—1 Pet. 4:7.

17. Ifa usun sipwe túmúnúéch pwe sipwe mmólnetá ngeni met epwele fis ekiseló chék?

¹⁷ Jesus a erá pwe ewe sópwólóón epwe war “lon eu otun ousap ekieki ngeni.” (Mat. 24:44) Ina minne mi lamot sipwe mmólnetá fansoun meinisin. Esap iei ewe atun sipwe sótun manaweni ewe sókkun manaw án Satan ei fénúfan a ámmeef ngenikich pwe epwe atoto pwapwa. Ina eú chék ttan. Nge Jiowa me Jesus ra fen éúréúrakich me lón Paipel ifa usun sipwe mammasa. Iwe sipwe aúselinga ekkewe oesini lón Paipel me áfánni ifa usun ra pwéppwénútá. Amwo sipwe akkarap ngeni Jiowa me akkomwa an we Mwú lón manawach. Iwe sipwe mmólnetá lupwen a war ewe sópwólóón. (Pwär. 22:20) Manawach a lóngólóng wóón ena!