Ewe Paipel ese móróló a nómoffóch. Pokiten ena, ka tongeni angei lón ei fansoun eú Paipel me álleani. Lupwen ka filatá eú afféún Paipel mi múrinné, ka tongeni lúkúlúk pwe ka álleani eú kapiin mi núkúchar, kapiin ewe popun makken Paipel. * Fán chómmóng mi amwarar pwóróusen án ewe Paipel ese móróló. Nge pwata ese móróló inaamwo ika ekkewe taropwe ra mak lón ra tatakkisiló, a wor angangen ú ngeni, me aramas ra sótun siwili ewe pwóróus lón? Met aúchean ewe Paipel mi asokkaaló seni ekkewe ekkóch puk?

Chómmóng aramas mi káé Paipel ra pwal tipeeú ngeni met aposel Paulus a fen apwúngaló, a makkeei: “Kapasen lon ekewe Toropwe mi Pin meinisin ra pop seni Ngünün Kot.” (2 Timoty 3:16) Ra lúkú pwe ewe Paipel ese móróló pokiten ina án Kot we Kapas mi kkóló aúchean me pokiten Kot a túmúnú tori lón ach ei fansoun. Faizal, ewe sia fen fós usun lón ewe lesen akkomw, a filatá mwirin och fansoun an epwe pwisin etittina ekkena mettóch aramas ra apasa usun Paipel ren an káé ena puk. A máirú ren minne a káé. Mwirin och fansoun, a kúna pwe chómmóng ekkewe mettóch ekkewe lamalam mi erá pwe iir Chón Kraist ra kan eáni káit, ese mak lón Paipel. Pwal och, a chúng letipan ren met án Kot we Kapas a pwáraatá usun letipen Kot ngeni fénúfan.

Faizal a erá: “Iei ua fókkun lúkú pwe ewe Paipel mi nóm rei, eú liffang seni Kot. . . . Pún ika Kot a tongeni fératá unuselapen láng me fénúfan, iwe itá esap pwal wor an manaman le awora ngenikich eú puk me túmúnú fán itach? Ach erá pwe Kot ese tongeni féri ena, usun nge sia aúkúkú an manaman. Ngang ié pwe upwe aúkúkú manamanen Ewe mi Unusen Manaman seni Meinisin?”​—Aisea 40:8.