Ang Diwa sa Pasko​—Ikapakita ba Kini sa Tibuok Tuig?

“Himaya sa Diyos sa kahitas-an, ug sa yuta pakigdait taliwala sa mga tawo nga iyang gikahimut-an.”—Lucas 2:14.

MILYONMILYONG tawo ang sinati niining gipamulong sa mga manulonda sa Diyos nga nagpahibalo bahin sa pagkatawo ni Jesus ngadto sa mga magbalantay nga nagbantay sa ilang mga hayop panahon sa kagabhion. Atol sa petsa nga gipangangkon sa mga relihiyon nga maoy natawhan ni Jesus, daghang nag-angkong mga Kristohanon ang maghimog linaing paningkamot sa pagbinuotan. Ang dakong interes nga gipakita panahon sa Pasko bahin sa kalipay, pakigdait, ug maayong kabubut-on—mga hiyas nga gihisgotan diha sa gimantala sa mga manulonda—kasagarang gitumong nga maoy diwa sa Pasko.

Ang maong dalayegong mga tinamdan nakadani pa gani sa mga tawong wala magsaulog sa Pasko. Sila nakaapresyar usab sa mainitong pagbati nga daw gipasiugda sa maong kasaulogan. Kon panahon sa Pasko walay trabaho o walay klase, ang mga tawo makahigayon sa pagrelaks, pagpakig-uban sa ilang pamilya ug mga higala, o kaha sa paglingawlingaw. Siyempre, daghang sinserong mga tawo ang naglantaw sa Pasko, sa panguna, ingong panahon sa pagpasidungog kang Jesu-Kristo.

Bisan unsa pay ilang panglantaw sa Pasko, ang kadaghanan moangkon nga ang maayong mga pagbati nga dala sa maong kasaulogan dali rang mahanaw. Ang mga tawo mobalik ra dayon sa ilang naandang panggawi. Ang usa ka sinulat nga nag-ulohang “Ang Diwa sa Pasko,” nga gipatik sa Royal Bank of Canada, nag-ingon: “Ang kadaghanan matawag lang nga ‘Kristohanon’ sulod sa pipila lamang ka semana kada tuig, nga nagpakitag maayong kabubut-on sa ilang isigkatawo hangtod ra sa Bag-ong Tuig, ug pagkahuman mobalik na sa ilang hinakog nga tinamdan nga walay pagpakabana sa kaayohan sa ubang mga tawo.” Ang “dakong sayop” sa diwa sa Pasko, mipadayon ang maong sinulat, mao nga ang mga tawo wala magpakita niini sa “tibuok tuig.”

Mouyon ka man o dili sa maong pahayag, kana mopatungha ug hinungdanong mga pangutana. Makahimo kaha ang mga tawo sa pagpasundayag ug permanenteng pagkamanggihatagon ug pagkamasinaboton sa usag usa? Aduna bay realistikong paglaom nga mamatuman ang gimantala sa manulonda sa gabii nga natawo si Jesus? O ang paglaom mahitungod sa tinuod nga pakigdait usa ba lamang ka damgo?