[Mga Pag-init Diha sa Katubigan].

Usa ka dapit diin gigukod sa mga Israelinhon ang kasundalohan sa Canaanhong mga hari sa amihanan nga nakig-alyansa kang Jabin human nila pildiha sila didto sa katubigan sa Merom. (Jos 11:1-5, 8) Sa dihang ang Yutang Saad gibahinbahin ingong pahat nga mga panulondon, ang dapit nga nagsukad sa Lebanon hangtod sa Misrepot-maim wala pa mailog. (Jos 13:​2, 6) Gituohan sa pipila nga ang Misrepot-maim lagmit mao ang mga kagun-oban sa Khirbet el-Musheirefeh (Horvat Mashref), mga 20 km (12 mi) sa AAS sa Aco (ʽAkko). Kini nga lokasyon lagmit maoy nagpaarang sa mga lungsoranon sa Misrepot-maim nga makaadto sa mga siyudad sa Patag sa Aco ug usab sa Dal-as sa Hula. Lagmit nga kini ginganlan ug Misrepot-maim (nagkahulogang “Mga Pag-init Diha sa Katubigan”) tungod sa mainit nga mga tubod nga nahimutang mga 180 m (590 p) gikan sa maong dapit.