Ang ngalan sa ika-6 nga lunar nga bulan sa sagradong kalendaryo sa mga Hudiyo human sa pagkadestiyero, apan ang ika-12 nga bulan sa sekular nga kalendaryo, nga katumbas sa bahin sa Agosto ug bahin sa Septiyembre. Ang kahulogan niini nga ngalan dili matino.

Niining kataposang bulan sa ting-init, ang mga datiles hinog na, sama sa pangunang pananom nga mga igos. Ang katibuk-ang pag-ani sa mga ubas himoon, ug sa kataposan sa bulan adunay dagayang bag-ong bino.​—Lev 26:5; Num 13:23; Jer 8:13.

Sa bulan sa Elul natapos ni Nehemias ang 52-ka-adlaw nga proyekto sa pagtukod pag-usab sa mga paril sa Jerusalem. (Neh 6:15) Sa ubang mga teksto sa Kasulatan ang bulan sa Elul gihisgotan lamang nga ikaunom nga bulan.​—1Cr 27:9; Eze 8:1; Hag 1:​1, 15.

Ang mga talaan nga giandam ni Parker ug Dubberstein, diha sa Babylonian Chronology, 626 B.C.–A.D. 75 (1971, pp. 27-47), nagpakita nga ang bulan sa Elul sal-angsal-ang nga gigamit sa mga Babilonyanhon ingong intercalary o isal-ot nga bulan uban sa bulan sa Adar.