Sofonias 2:1-15
2 Pagtigom kamo, oo, pagtigom,+ Oh nasod nga wala mangluspad sa kaulaw.+
2 Sa dili pa ang lagda magpatunghag bisan unsa,+ sa dili pa molabay ang adlaw sama sa tahop, sa dili pa modangat kaninyo ang nagasilaob nga kasuko ni Jehova,+ sa dili pa modangat kaninyo ang adlaw sa kasuko ni Jehova,+
3 pangitaa ninyo si Jehova,+ kamong tanang maaghop sa yuta,+ nga nagbuhat sa Iyang hudisyal nga hukom. Pangitaa ang pagkamatarong,+ pangitaa ang pagkamaaghop.+ Tingali+ kamo pagatagoan sa adlaw sa kasuko ni Jehova.+
4 Kay, kon mahitungod sa Gaza, siya mahimong biniyaan nga siyudad;+ ug ang Askelon mahimong awaaw.+ Kon mahitungod sa Asdod,+ sa udtong tutok ilang pagaabogon siya;+ ug kon mahitungod sa Ekron, siya pagalukahon.+
5 “Alaot kadtong nagapuyo sa rehiyon sa daplin sa dagat, ang nasod sa mga Keretnon!+ Ang pulong ni Jehova batok kaninyo. Oh Canaan, ang yuta sa mga Filistehanon, ako maglaglag usab kanimo, aron wala nay molupyo.+
6 Ug ang rehiyon sa daplin sa dagat mahimong mga sibsibanan,+ nga may mga atabay alang sa mga magbalantay sa kahayopan ug mga batong toril alang sa mga karnero.
7 Ug kini mahimong usa ka rehiyon alang sa mga nahibilin sa balay sa Juda.+ Diha niana sila magasibsib. Sa mga balay sa Askelon, sila manghigda sa kagabhion. Kay si Jehova nga ilang Diyos magliso sa iyang pagtagad ngadto kanila+ ug tinong magtigom pagbalik sa mga nabihag kanila.”+
8 “Nadungog ko ang pakaulaw sa Moab+ ug ang mapasipalahong mga pulong sa mga anak ni Ammon,+ nga pinaagi niini sila nagpakaulaw sa akong katawhan ug nagpasibantog batok sa ilang teritoryo.
9 Busa, ingon nga ako buhi,”+ nagaingon si Jehova sa mga panon, ang Diyos sa Israel, “ang Moab mahimong sama sa Sodoma,+ ug ang mga anak ni Ammon+ sama sa Gomora, usa ka dapit sa mga dapawong tanom, ug usa ka gahong sa asin, ug usa ka awaaw, hangtod gayod sa panahong walay tino.+ Pagaagawan sila sa mga nahibilin sa akong katawhan, ug ang nahibilin sa akong nasod magapanag-iya kanila.+
10 Kini mao ang ilang maangkon inay ang ilang garbo,+ tungod kay sila nagpakaulaw ug nagpasibantog batok sa katawhan ni Jehova sa mga panon.+
11 Si Jehova mahimong makalilisang batok kanila;+ kay siya magaut-ot gayod sa tanang diyos sa yuta,+ ug ang katawhan moyukbo kaniya,+ ang tagsatagsa gikan sa iyang dapit, ang tanang kapuloan sa kanasoran.+
12 “Kamo usab, kamong mga Etiopianhon,+ kamo mahimong mga pinatay sa akong espada.+
13 “Ug iyang pagatuy-oron ang iyang kamot paingon sa amihanan, ug iyang laglagon ang Asirya.+ Ug iyang himoon ang Nineve nga awaaw,+ usa ka walay-tubig nga rehiyon sama sa kamingawan.
14 Ug sa iyang taliwala, ang mga panon sa kahayopan manglubog, ang tanang ihalas nga mananap sa usa ka nasod.+ Ang pelikano ug ang porcupino+ magpalabay sa kagabhion diha sa iyang mga ulo-ulo sa haligi.+ Usa ka tingog magpadayon sa pag-awit diha sa bentana. Aduna unyay paggun-ob diha sa pultahan; kay iyang himoon nga hubo ang sulod nga mga bungbong niini.+
15 Mao kini ang masadyaong siyudad nga nahimutang sa kasegurohan,+ nga nag-ingon diha sa iyang kasingkasing, ‘Ako, ug wala nay lain.’+ Oh naunsa ba nga siya nahimo mang usa ka butang nga makapahingangha, usa ka dapit nga pagalubgan sa ihalas nga mga mananap! Ang tagsatagsa nga moagi kaniya motaghoy; siya mowarawara sa iyang kamot.”+
