Hebreohanon 5:1-14
5 Kay ang matag hataas nga saserdote nga gikuha gikan sa mga tawo gitudlo alang sa mga tawo labot sa mga butang nga iya sa Diyos,+ aron siya makatanyag ug mga gasa ug mga halad alang sa mga sala.+
2 Siya makahimo sa pagpakiglabot sa kasarangan nga paagi sa mga walay alamag ug sa mga masalaypon sanglit gilibotan usab siya sa iyang kaugalingong mga kaluyahon,+
3 ug tungod niini kinahanglan siya nga mohimog mga paghalad alang sa mga sala nga iyang kaugalingon ug ingon man usab sa katawhan.+
4 Dugang pa, maangkon sa usa ka tawo kini nga dungog, dili sa iyang kaugalingong pagbuot,+ kondili kon siya tawgon lamang sa Diyos,+ ingon usab kang Aaron+ kaniadto.
5 Sa ingon usab ang Kristo wala maghimaya sa iyang kaugalingon+ pinaagi sa pagkahimong hataas nga saserdote,+ apan gihimaya+ niya nga naghisgot may kalabotan kaniya: “Ikaw mao ang akong anak; ako, karong adlawa, ako nahimong imong amahan.”+
6 Ingon sa iyang gisulti usab sa laing dapit: “Ikaw usa ka saserdote hangtod sa kahangtoran sa paagi nga sama kang Melquisedek.”+
7 Sa mga adlaw sa iyang pagkaunodnon [si Kristo] naghimog mga pangamuyo ug mga pangaliya+ usab ngadto sa Usa nga arang makaluwas kaniya gikan sa kamatayon, uban ang makusog+ nga mga pagtuaw ug mga luha, ug gidungog siya nga may pag-uyon tungod sa iyang diyosnong kahadlok.+
8 Bisan tuod siya Anak, nakakat-on siya sa pagkamasinugtanon gikan sa mga butang nga iyang giantos;+
9 ug human siya mahingpit+ siya nahimong may kaakohan alang sa walay kataposang kaluwasan+ sa tanan nga masinugtanon kaniya,+
10 tungod kay ang Diyos sa linain nagtawag kaniya nga hataas nga saserdote sa paagi nga sama kang Melquisedek.+
11 Mahitungod kaniya daghan pa ang among ikasulti ug nga lisod ipatin-aw, sanglit nahabol man kamo sa inyong pandungog.+
12 Kay, sa pagkatinuod, bisan tuod kamo angay na unta nga mahimong mga magtutudlo+ tungod sa panahon, gikinahanglan na usab ninyo nga adunay magatudlo kaninyo gikan sa sinugdan sa paninugdang mga butang+ sa sagradong mga pahayag sa Diyos;+ ug nahisama kamo sa nagkinahanglan ug gatas, dili sa gahing pagkaon.+
13 Kay ang matag usa nga nagainom ug gatas wala masinati sa pulong sa pagkamatarong, kay bata pa man siya.+
14 Apan ang gahing pagkaon maoy alang sa mga tawong hamtong, alang kanila nga pinaagi sa paggamit nakabansay sa ilang mga gahom sa pagsabot+ aron sa pag-ila sa maayo ug sa daotan.+
