2 Juan 1:1-13
1 Ang ansiyano+ nganha sa pinili nga ginang+ ug sa iyang mga anak, nga sa pagkatinuod akong gihigugma,+ ug dili lamang ako, kondili silang tanan usab nga nakadangat sa kahibalo sa kamatuoran,+
2 tungod sa kamatuoran nga nagpabilin dinhi kanato,+ ug kini magpabilin kanato hangtod sa kahangtoran.+
3 Magauban kanato ang dili-takos nga kalulot,+ kaluoy ug kalinaw gikan sa Diyos nga Amahan+ ug gikan kang Jesu-Kristo nga Anak sa Amahan, uban ang kamatuoran ug ang gugma.+
4 Ako nagmaya pag-ayo tungod kay akong nakaplagan nga ang pipila sa imong mga anak+ nagalakaw diha sa kamatuoran,+ sumala sa sugo nga nadawat namo gikan sa Amahan.+
5 Busa karon ako naghangyo kanimo, ginang, ingong ako usa nga nagsulat kanimo, dili sa usa ka bag-ong sugo,+ kondili sa usa nga atong nabatonan sukad pa sa sinugdan,+ nga maghigugmaay kita sa usag usa.+
6 Ug kini mao ang kahulogan sa gugma,+ nga kita magpadayon sa paglakaw sumala sa iyang mga sugo.+ Kini mao ang sugo, ingon sa inyong nadungog sukad pa sa sinugdan, nga kamo kinahanglang magpadayon sa paglakaw diha niini.+
7 Kay daghang maglilimbong ang nagapanungha sa kalibotan,+ mga tawo nga wala magpahayag nga si Jesu-Kristo mianhi sa unod.+ Kini mao ang maglilimbong+ ug ang antikristo.+
8 Magbantay sa inyong kaugalingon, nga kamo dili kapildihan sa mga butang nga among gihagoan sa pagpatungha, kondili nga kamo makabaton sa bug-os nga ganti.+
9 Ang matag usa nga mag-una+ ug dili magpabilin+ diha sa pagtulon-an ni Kristo wala makabaton sa Diyos.+ Siya nga nagpabilin niini nga pagtulon-an mao ang nakabaton sa Amahan ug sa Anak.+
10 Kon adunay moanha kaninyo ug wala magdala niini nga pagtulon-an, ayaw gayod siya pasak-a sa inyong mga balay+ o mangomosta kaniya.+
11 Kay siya nga mangomosta kaniya maoy mag-aambit sa iyang daotang mga buhat.+
12 Bisan tuod daghan pa ako ug isulat kaninyo, dili ko tinguha nga himoon kini pinaagi sa papel ug tinta,+ apan naglaom ako nga makaanha kaninyo ug makapakigsulti kaninyo nga nawong sa nawong,+ aron mabug-os ang inyong kalipay.+
13 Ang mga anak sa imong igsoong babaye, ang usa nga pinili, nangomosta kanimo.+
